លោកនាយករដ្ឋមន្ដ្រី ហ៊ុន សែន បានជំរុញទៅបណ្ដាប្រទេសនៃវេទិកាអន្តរជាតិមួយឲ្យគាំទ្រគោលនយោបាយចិន «ខ្សែក្រវ៉ាត់ និងផ្លូវ» ដោយថា ដើម្បីពន្លឿនការតភ្ជាប់ និងពង្រឹងប្រព័ន្ធដឹកជញ្ជូនតំបន់។
យោងតាមសុន្ទរកថាដែលថ្លែងនៅក្នុងកិច្ចប្រជុំកំពូលលើកទី៥ នៃសន្និសីទស្ដីពីអន្ដរសកម្មភាព និងវិធានការកសាងទំនុកចិត្តនៅអាស៊ី (CICA) នៅទីក្រុងឌូសាន់បេ ប្រទេសតាជីគីស្ថាន កាលពីម្សិលមិញ លោក ហ៊ុន សែន លើកឡើងថា ចំណុចខ្លាំងរបស់តំបន់ស៊ីកា គឺការផ្ដោតលើការកសាងទំនុកចិត្ត និងការអភិវឌ្ឍរួមគ្នា ដើម្បីសុខសន្ដិភាព និងគោលដៅអភិវឌ្ឍន៍ប្រកបដោយចីរភាព ដូចជា ការបង្កើនសក្ដានុពលក្នុងវិស័យពាណិជ្ជកម្ម សេដ្ឋកិច្ច ការវិនិយោគ និងទេសចរណ៍។
ម្យ៉ាងទៀត លោក ហ៊ុន សែន លើកឡើងថា កម្ពុជាក៏មានគោលបំណងស្វែងរកកាលានុវត្តភាពពាណិជ្ជកម្ម និងការវិនិយោគជាមួយប្រទេសជាសមាជិកអាស៊ីកា ជាពិសេសទាក់ទងនឹងសហគ្រាសធុនតូច និងមធ្យម។
លោក ហ៊ុន សែន អះអាងទៀតថា ប្រទេសនៅតំបន់ស៊ីកាគួរទាញយកប្រយោជន៍ពី «គំនិតផ្ដួចផ្ដើមខ្សែក្រវ៉ាត់ និងផ្លូវ» របស់ចិន ដែលលោកថា នឹងផ្ដល់ឪកាសសម្រាប់ប្រទេសជាសមាជិកស៊ីកា ដើម្បីពន្លឿនការតភ្ជាប់តំបន់ និងពង្រឹងប្រព័ន្ធដឹកជញ្ជូនជាដើម។
ក្នងសុន្ទរកថា លោក ហ៊ុន សែន ថ្លែងថា៖ «ក្នុងសារតីនេះ យើងគួរធ្វើការកាន់តែជិតស្និតជាមួយនឹងគំនិតផ្ដួចផ្ដើមខ្សែក្រវ៉ាត់ និងផ្លូវ ដែលជាក់ស្ដែង នឹងផ្ដល់ឪកាសសម្រាប់ប្រទេសជាសមាជិកស៊ីកា ដើម្បីពន្លឿនការតភ្ជាប់តំបន់ និងពង្រឹងប្រព័ន្ធដឹកជញ្ជូន និងឡូជីស្ទីក»។
«ខ្សែក្រវ៉ាត់ និងផ្លូវ» ជាគំនិតផ្ដួចផ្ដើមរបស់ប្រធានាធិបតីចិន លោក ស៊ី ជិនពីង ក្នុងឆ្នាំ២០១៣។ គម្រោងនេះ មានប្រទេសជាដៃគូជាង ១០០ ដែលមកពីទ្វីបអាស៊ី អាហ្រ្វិក អាមេរិកឡាទីន រួមទាំងប្រទេសរុស្ស៊ី ព័រទុយហ្គាល់ និងក្រិច ក៏ចូលរួមផងដែរ។
តាមរយៈគំនិតផ្ដួចផ្ដើម ខ្សែក្រវ៉ាត់ និងផ្លូវ ចិនបានផ្ដល់ជាកម្ចីដល់ប្រទេសទាំងនោះក្នុងការអភិវឌ្ឍហេដ្ឋារចនាសម្ព័ន្ធនានា ដូចជា ផ្លូវដែកកំពង់ផែ ផ្លូវល្បឿនលឿន និងបង្កើតច្រកសេដ្ឋកិច្ចសម្រាប់តភ្ជាប់ប្រទេសចិនជាមួយពិភពលោកទាំងមូលទៀតផង៕