អតីតគណបក្សសង្គ្រោះជាតិ បានចាត់តាំង លោក អ៊ូ ច័ន្ទឬទ្ធិ ឲ្យធ្វើជាអ្នកនាំពាក្យគណៈកម្មាការរៀបចំដំណើរមាតុភូមិនិវត្តន៍ ក្រោយពីអតីតមេដឹកនាំបក្សប្រឆាំងនៅក្រៅប្រទេសអះអាងថា ពួកគេគ្រោងវិលត្រឡប់មកប្រទេសកម្ពុជាវិញនាពេលឆាប់ៗខាងមុខ។
សេចក្ដីប្រកាសព័ត៌មានចេញផ្សាយនៅថ្ងៃចន្ទនេះឲ្យដឹងថា ក្រុមមេដឹកនាំគណបក្សសង្គ្រោះជាតិនៅក្រៅប្រទេសបានសម្រេចបែបនេះ បន្ទាប់ពីពួកគេបានជួបប្រជុំគ្នា កាលពីថ្ងៃទី១៤ ខែមិថុនា ឆ្នាំ២០១៩។
លោក អ៊ូ ច័ន្ទឬទ្ធិ គឺជាមនុស្សម្នាក់ក្នុងចំណោមអតីតមន្ដ្រីជាន់ខ្ពស់គណបក្សសង្គ្រោះជាតិជាច្រើនរូបទៀត ដែលបាននិរទេសខ្លួនទៅនៅក្រៅប្រទេស ក្រោយពីគណបក្សសង្គ្រោះជាតិ ត្រូវបានតុលាការកំពូលរំលាយ កាលពីពាក់កណ្ដាលខែវិច្ឆិកា ឆ្នាំ២០១៧។
ចំណែក អតីតប្រធានគណបក្សសង្គ្រោះជាតិ លោក សម រង្ស៊ី ក៏កំពុងនិរទេសខ្លួននៅបរទេស បន្ទាប់ពីប្រឈមនឹងបណ្ដឹងជាច្រើន ដែលប្ដឹងដោយមេដឹកនាំបក្សកាន់អំណាច ក្នុងនោះមានទាំងបណ្ដឹងរបស់លោកនាយករដ្ឋមន្ត្រី ហ៊ុន សែន៕
