ល្បែងស៊ីសងតាមអនឡាញដែលគ្មានប្រភពច្បាស់លាស់ បានផ្ញើសារអូសទាញពលរដ្ឋឲ្យចូលរួមលេងតាមទូរសព្ទដៃ ខណៈទីតាំងអាជីវកម្មល្បែងស៊ីសងត្រូវបានអាជ្ញាធរមានវិធានការជាបន្តបន្ទាប់នោះ។
នៅប៉ុន្មានខែនេះ សារតាមទូរស័ព្ទដែលសរសេរក្នុងន័យទាក់ទាញពលរដ្ឋឲ្យទាក់ទងដើម្បីចូលទៅលេងល្បែងស៊ីសងតាមអនឡាញ បានផ្ញើជាច្រើនមកកាន់អ្នកប្រើប្រាស់ទូរសព្ទដៃនៅកម្ពុជា។
អ្នកទំនាក់ទំនងព័ត៌មាននៃលេខដែលបានផ្ញើសារមួយបានឲ្យដឹងថា ការលេងហ្គេមកាស៊ីណូនេះជាការលេងល្បែងកាស៊ីណូតាម App ទូរស័ព្ទ ដែលទាញយកតាមរយៈ Playstore ឬ Appstore ដោយតម្រូវឲ្យអ្នកលេងដាក់លុយលេង ហើយការដាក់លុយលេងនោះទៀតសោត គឺអាចដាក់បានតាមសេវារបស់ធនាគារមួយចំនួន។
អ្នកទំនាក់ទំនងនោះលើកឡើងថា៖ «មានដូចជា ហ្គេមបាញ់ត្រី Live ចេញពីកាស៊ីណូ លេងបៀរ ឬក៏ចាក់បាល់ ឬអី ហើយនៅមានច្រើនទៀត។ ចំពោះការលេង ប្រសិនជាបងឈ្នះ បងអាចដកទឹកប្រាក់បាន។ […] ប្រសិនជាបងចង់ដក ឬដាក់ប្រាក់ បងអាចដក ឬដាក់បានតាមគណនី ABA វីង ឬ ទ្រូម៉ាន់នី » ។
សារដែលផ្ញើមកមានលេខខុសៗគ្នាតែអត្ថន័យស្រដៀងគ្នាជាច្រើន បានផ្ញើទៅកាន់លេខទូរសព្ទរបស់ពលរដ្ឋដោយបានសរសេរថា ហ្គេមបាញ់ត្រីអនឡាញ ដាក់ប្រាក់ លេង ឈ្នះ ដកប្រាក់ ហ្គេមកាស៊ីណូតាមទូរសព្ទដៃដាក់ប្រាក់ទទួលប្រាក់បន្ថែម៥ដុល្លារ និងហ្គេមតាមទូរសព្ទដៃងាយស្រួលឈ្នះទទួលយកទឹកប្រាក់១០ដុល្លារ ជាដើម។
ពលរដ្ឋរស់នៅរាជធានីភ្នំពេញ លោក ចក់ ចំរើន មានប្រសាសន៍ថា លោកទទួលបានជាញឹកញាប់នូវសារទាំងនេះដែលធ្វើឲ្យរំខានដល់លោកជាខ្លាំង តែលោកថា នៅពេលដែលសារនោះផ្ញើជាញឹកញាប់ដូចនេះ ក៏វាហាក់ទាញចំណាប់អារម្មណ៍របស់លោកផងដែរ។
លោក ចក់ ចំរើន៖ «ដំបូងឡើងយ ខ្ញុំអត់ដឹងថា ជាល្បែងអីទេ ព្រោះគាត់ផ្ញើមកទៅ ដែលមុនដំបូងរំខានដែរ ផ្ញើមកយូរៗទៅវាមានដូចជា ការទាក់ទាញ ដូចជា ការឲ្យលុយធ្វើជាទុនក្នុងការលេង ហើយមានការប្រូម៉ូសិនក្នុងការលេង ជាដើម ហើយគិតវាគឺជារឿងដែលចាប់អារម្មណ៍ដែរ ព្រោះវាមានការទាក់ទាញចង់ឲ្យលេង»។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន មានប្រសាសន៍ថា ការលេចចេញនូវការលេងល្បែងស៊ីសងក្រោមរូបភាពថ្មីនេះ កំពុងតែបង្កការលំបាកដល់អាជ្ញាធរជាខ្លាំង ដោយសារការលេងល្បែងនេះមិនមែនប្រមូលផ្ដុំគ្នាដូចកាលពីលើកមុននោះទេ ហើយការកំណត់រកទីតាំងក៏ពិបាកថែមទៀត។ ទោះជាយ៉ាងណា លោកថា នៅពេលនេះ សមត្ថកិច្ចកំពុងស្រាវជ្រាវកំណត់មុខសញ្ញាអ្នកផ្ញើសារ និង App សម្រាប់លេងនោះហើយ ដោយលោកថា ត្រូវការពេលបន្ថែមទៀតមុននឹងឈានដល់ការបង្ក្រាបករណីនេះ។
លោក ឆាយ គឹមខឿន៖ «ហ្គេមអនឡាញ យើងបង្ក្រាបច្រើនណាស់ហើយ តែច្រើនតែជនបរទេស។ តែឥឡូវនេះ យើងកំពុងរាវរកថា អ្នកណាដែលជាប្រភពនៃការផ្ញើសារឲ្យប្រជាពលរដ្ឋនេះ។ ព្រោះយើងរាវមួយចាប់មួយ អត់បានទេរឿងហ្នឹង ដូចវែកចកអញ្ចឹង ព្រោះនៅពេលយើងស៊ើបរួចរាល់អស់ហើយ ទើបយើងបើកប្រតិបត្តិការ តែសុំជម្រាបជូនប្អូនថា អត់ព្រងើយកន្តើយទេ តែគ្រាន់តែត្រូវការពេលវេលាបន្តិចសម្រាប់សមត្ថកិច្ច»។
ប្រធានបណ្ដាញយុវជនកម្ពុជា លោក ទឹម ម៉ាឡៃ មានប្រសាសន៍ថា ការរីកចម្រើននៃបច្ចេកវិទ្យាល្បែងស៊ីសងតាមអ៊ីនធឺណិតនេះ គឺជារឿងថ្មីមួយដែលរដ្ឋាភិបាលគួរមានវិធានការបន្ទាន់ ដើម្បីរក្សាផលប្រយោជន៍ដល់ពលរដ្ឋ និងសង្គម។
លោក ទឹម ម៉ាឡៃ៖ «គាត់ (ពលរដ្ឋ) អត់ដឹងអំពីការឆបោក អំពីការបន្លំនៃការបង្កើតល្បែងរបស់ក្រុមណាមួយ វាធ្វើឲ្យប៉ះពាល់ដល់ប្រយោជន៍សេដ្ឋកិច្ចរបស់គាត់ ខាតបង់ពេលវេលា និងធនធានរបស់គាត់។ លើសពីនេះ វាអាចបង្កជាបទល្មើសធុនមធ្យម ឬធ្ងន់អីបន្ថែមទៀត មានន័យថា ពេលដែលគាត់បាត់បង់ ឬក៏ខាតបង់ថវិកាកាន់តែច្រើនឡើង វាធ្វើឲ្យអ្នកលេងទៅជាប្រព្រឹត្តបទល្មើស ជាដើម»។
បើតាមលោក ម៉ាឡៃ រដ្ឋាភិបាលគួរតែមានវិធានការតាមដាន និងស្រាវជ្រាវទៅលើអ្នកដែលបានផ្ញើសារឲ្យពលរដ្ឋ ហើយគួរមានការផ្សព្វផ្សាយឲ្យបានទូលំទូលាយ ដើម្បីកុំឲ្យពលរដ្ឋចាញ់ការបោកបញ្ឆោតនេះ និងបង្កើតលេខពិសេសណាមួយសម្រាប់ពលរដ្ឋទាក់ទង ដើម្បីរាយការណ៍ពីករណីលេងល្បែងស៊ីសងអនឡាញនេះ៕
