អ្នកឃ្លាំមើល ហៅការផ្លាស់ប្តូរមន្ត្រីតុលាការពីខេត្តមួយទៅខេត្តមួយទៀត មានប្រសិទ្ធភាពតិចតួចដល់យន្តការធ្វើកំណែទម្រង់ប្រព័ន្ធយុត្តិធម៌នៅកម្ពុជា។
តាមសំណើរបស់ក្រសួងយុត្តិធម៌ និងឧត្តមក្រុមប្រឹក្សានៃអង្គចៅក្រម ចុះថ្ងៃទី១២ ខែមិថុនា ស្នើទៅព្រះមហាក្សត្របានសម្រេចដំឡើងឋានៈព្រះរាជអាជ្ញា ព្រះរាជអាជ្ញារង ប្តូរប្រធានតុលាការសាលាដំបូង និងចៅក្រម ពីខេត្តមួយទៅខេត្តមួយទៀតតាមកាលកំណត់៤ឆ្នាំម្តង។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត ហៅការចល័តមន្ត្រីតុលាការនេះថា មិនបានជំរុញដល់ការធ្វើកំណែទម្រង់ប្រព័ន្ធយុត្តិធម៌តាមយន្តការប្រជាធិបតេយ្យទេ បើស្មារតីច្បាប់នៅតែតាក់តែងឡើងដើម្បីដាក់ទោសតែមនុស្សមួយក្រុម ហើយទុកចន្លោះឱ្យអ្នកនយោបាយប្រើឥទ្ធិពលគ្របដណ្តប់នោះ។
លោក ថា៖ «ជួនកាលក៏ជាការលើកទឹកចិត្តដល់ព្រះរាជអាជ្ញា និងចៅក្រមមួយចំនួនដែលធ្វើការល្អសម្រាប់រដ្ឋាភិបាល ធ្លាប់ការពាររដ្ឋាភិបាលកន្លងមកហ្នឹង»។
អ្នកជំនាញផ្នែកច្បាប់ លោកមេធាវី សុក សំអឿន មានប្រសាសន៍ថា វិធីចល័តមន្ត្រីតុលាការជាការកាត់បន្ថយការកាត់ក្តីដោយលំអៀង ប៉ុន្តែ ថា បើចង់ធ្វើកំណែទម្រង់ប្រព័ន្ធយុត្តិធម៌ ត្រូវធ្វើឱ្យស្ថាប័នតុលាការ និងឧត្តមក្រុមប្រឹក្សានៃអង្គចៅក្រមផង ជាស្ថាប័នឯករាជ្យ។
លោក បន្តថា៖ «ដើម្បីឲ្យប្រព័ន្ធយុត្តិធម៌ឯករាជ្យ ទី១ យើងត្រូវមើលទៅលើឧត្តមក្រុមប្រឹក្សានៃអង្គចៅក្រម សំខាន់ឲ្យពួកគាត់ឯករាជ្យ។ អាពាក្យ «ឯករាជ្យ» មិនប៉ះពាល់ដល់ការតែងតាំង ការដាក់ទណ្ឌកម្ម និងសុវត្ថិភាពការងាររបស់គាត់។ បន្ទាប់មកទៀត ពាក់ព័ន្ធនឹងតុលាការបើស្ថាប័នគេត្រូវមើលពីហិរញ្ញវត្ថុ»។
អតីតអនុប្រធានគណបក្សសង្គ្រោះជាតិ លោកស្រី មូរ សុខហួរ មានប្រសាសន៍ថា ការធ្វើកំណែទម្រង់ប្រព័ន្ធយុត្តិធម៌នៅកម្ពុជាកើតចេញពីឆន្ទៈនយោបាយ មិនកើតចេញពីការចល័តមន្ត្រីតុលាការទេ ដោយថា បច្ចុប្បន្ន មន្ត្រីជាន់ខ្ពស់របស់បក្សកាន់អំណាចជាច្រើន កំពុងកាន់តួនាទីសំខាន់ៗនៅស្ថាប័នយុត្តិធម៌។
លោកស្រី ថា៖ «ដូចជា ឯកឧត្តម ឌិត មន្ទី ជាប្រធានតុលាការកំពូល តូនាទីរបស់គាត់នៅក្នុងគណបក្សប្រជាជនកម្ពុជាខ្ពស់។ ចៅក្រមមួយចំនួនដែលបានចូលរួមកាត់សេចក្តីក្នុងរឿងនយោបាយ ហើយបានឡើងតួនាទី មិនអាចហៅថា ជាការកែទម្រង់ទេ»។
ក្រុមយុវជន១០០រាត្រី អះអាងក្នុងរបាយការណ៍របស់ខ្លួនថា មន្ត្រីជាន់ខ្ពស់នៅគណៈកម្មាធិការកណ្តាល និងគណៈអចិន្ត្រៃយ៍របស់គណបក្សប្រជាជនកម្ពុជា យ៉ាងតិច១០នាក់កាន់តួនាទីសំខាន់ៗនៅប្រព័ន្ធយុត្តិធម៌នេះ។ ក្នុងនោះមាន លោក ឌិត មន្ទី ជាប្រធានតុលាការកំពូល លោក អ៊ុំ សារិទ្ធិ សមាជិកឧត្តមក្រុមប្រឹក្សានៃអង្គចៅក្រម និងលោក អង្គវង្ស វឌ្ឍានា ជារដ្ឋមន្ត្រីក្រសួងយុត្តិធម៌ជាដើម។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានច្រានចោលការលើកឡើងនេះ ដោយអះអាងថា សមាជិកបក្សមកកាន់តួនាទីនៅស្ថាប័នយុត្តិធម៌ មិនមែនជាកត្តារារាំងដល់ការកាត់ក្តីដោយយុត្តិធម៌ និងរារាំងដល់ការធ្វើកំណែទម្រង់ប្រព័ន្ធយុត្តិធម៌ទេ។
អ្នកនាំពាក្យរូបនេះបានហៅការផ្លាស់ប្តូរមន្ត្រីតុលាការពីខេត្តមួយទៅខេត្តមួយទៀតរយៈពេល៤ឆ្នាំម្តងនេះ បានចូលរួមចំណែកកែទម្រង់ប្រព័ន្ធយុត្តិធម៌ និងទប់ស្កាត់អំពើពុករលួយ។
លោក មានប្រសាសន៍ថា៖ «យន្តការបក្សហ្នឹង វាមិនជាមានឥទ្ធិពលអីប៉ុន្មានទេ ព្រោះអីប្រទេសខ្លះក៏គេអនុញ្ញាតឲ្យចៅក្រមខ្លះជាសមាជិកនយោបាយរបស់បក្សដែរ ព្រោះនេះជាសិទ្ធិមូលដ្ឋានរបស់ពលរដ្ឋ។ មិនមែនគេមកបំពេញការងារសាធារណៈ គេត្រូវបាត់បង់សិទ្ធិនយោបាយទេ»។
តំណាងអ្នកមានជម្លោះដីធ្លីនៅឃុំតាជេស ស្រុកកំពង់ត្រឡាច ខេត្តកំពង់ឆ្នាំង អ្នកស្រី អ៊ុំ សុភី អះអាងថា អ្នកស្រីមានការភ្ញាក់ផ្អើលពីដំណឹងចល័តមន្ត្រីតុលាការបែបនេះ។
ស្ត្រីមានជម្លោះដីធ្លីរូបនេះ បញ្ជាក់ថា ពួកគាត់នឹងទៅរំឭកតុលាការម្តងទៀត ដើម្បីឱ្យដំណើរការសំណុំរឿងប្តឹង ក្រុមហ៊ុន KDC របស់លោកស្រី ជា ខេង ភរិយាលោក ស៊ុយ សែន រដ្ឋមន្ត្រីក្រសួងរ៉ែ និងថាមពល លើទំហំដី១១៨ហិកតា ប៉ះពាល់ពលរដ្ឋ៤៩គ្រួសារ ដែលថាបានអូសបន្លាយជាង១៣ឆ្នាំមកនេះ។
កាលពីខែកុម្ភៈឆ្នាំនេះ អង្គការគម្រោងយុត្តិធម៌ពិភពលោក (World Justice Project) បានចេញរបាយការណ៍មួយបន្ដចាត់ថ្នាក់កម្ពុជា ជាប្រទេសមានប្រព័ន្ធយុត្ដិធម៌ទន់ខ្សោយបំផុត ក្នុងចំណោមប្រទេស១២៦ កម្ពុជាមានពិន្ទុលើតែប្រទេសវេណេស៊ុយអេឡាមួយប៉ុណ្ណោះ។
អង្គការអន្ដរជាតិមួយនេះ បញ្ជាក់ថា ការផ្ដល់ពិន្ទុទាបដល់កម្ពុជាបែបនេះ តាមសូចនាករមួយចំនួន ដូចជា អំពើពុករលួយ តម្លាភាពរបស់រដ្ឋាភិបាល សិទ្ធិសេរីភាពមូលដ្ឋាន ការអនុវត្តច្បាប់ យុត្តិធម៌សង្គម និងយុត្តិធម៌ផ្នែកព្រហ្មទណ្ឌ ជាដើម៕