លោកនាយករដ្ឋមន្ត្រី ហ៊ុន សែន នៅមុននេះបន្តិច បានសរសេរនៅលើទំព័រហ្វេសប៊ុកថា លោកយល់ព្រមឲ្យលោក យន្ត មីន ដែលបច្ចុប្បន្នជាអភិបាលខេត្តព្រះសីហនុ លាលែងពីតំណែងក្រោយពីមានគ្រោះថ្នាក់បាក់អគារនៅខេត្តនេះ។
បើតាមទំព័រហ្វេសប៊ុក លោកនាយករដ្ឋមន្ត្រី សរសេរថា៖ «ក្នុងពេលបំពេញការងារនៅខេត្តព្រះសីហនុ ឯកឧត្តម យន្ត មីន អភិបាលខេត្តព្រះសីហនុបានទទួលស្គាល់កំហុសលើការគ្រប់គ្រងក្នុងដែនសមត្ថកិច្ចរបស់ខ្លួនដែលបណ្តាលអោយមានរឿងឈឺចាប់កើតឡើង។»
លោក គួច ចំរើន ដែលបច្ចុប្បន្នជាអភិបាលខេត្តកំពង់ចាម នឹងមកធ្វើជាអភិបាលខេត្តព្រះសីហនុជំនួសវិញនៅពេលខាងមុខ។ នេះបើតាមសំណេររបស់លោក ហ៊ុន សែន។
បន្ថែមពីនេះ លោកនាយករដ្ឋមន្ត្រីថា លោកបានសម្រេចចិត្តដក លោក ញឹម វណ្ណដា ចេញពីតំណែងជាទេសរដ្ឋមន្ត្រីនិងជាអនុប្រធានទី១ នៃគណៈកម្មាធិការជាតិគ្រប់គ្រង គ្រោះមហន្តរាយ ដោយមូហេតុខ្វះការទទួលខុសត្រូវ និងភូតភរ។
កាលពីចុងសប្តាហ៍ សំណង់អគារ៧ជាន់របស់ជនជាតិចិនមួយនៅក្នុងខេត្តព្រះសីហុន បានរលំបាក់ ដោយគិតមកដល់ម៉ោង១០ព្រឹកថ្ងៃទី២៤ ខែមិថុនានេះ សមត្ថកិច្ចរកឃើញកម្មករស្លាប់២៥នាក់ ខណៈរងរបួស២៤នាក់។
ករណីបាក់អគារ៧ជាន់នេះ សមត្ថកិច្ចបានឃាត់ខ្លួនជនជាតិចិន៣នាក់ ដោយថា សំណង់អគារនេះ គឺគ្មានច្បាប់អនុញ្ញាតនោះទេ ហើយអាជ្ញាធរបានចុះហាមឃាត់ចំនួន២ដងរួចហើយ ប៉ុន្ដែ ម្ចាស់ការដ្ឋានមិនស្ដាប់។
ជនជាតិ៣នាក់នោះរួមមានឈ្មោះ Chen Kun ជាម្ចាស់ការដ្ឋានសំណង់ ឈ្មោះ Deng Xing Gul ជាម្ចាស់ក្រុមហ៊ុនទទួលសាងសង់ និង ឈ្មោះ Gao Yu ជាអ្នកម៉ៅការបូកជញ្ជាំងអគារ។
ក្រៅពីជនជាតិចិនទាំង៣នាក់នេះ សមត្ថកិច្ចក៏បានឃាត់ខ្លួនជនជាតិខ្មែរម្នាក់ផងដែរ ដែលមានឈ្មោះ ញឹក ហ៊ុយ បន្ទាប់ពីបានជួលដីឱ្យជនជាតិចិនសាងសង់អគារសម្រាប់ធ្វើសណ្ឋាគារនេះ៕
