រដ្ឋមន្ត្រីក្រសួងមហាផ្ទៃ លោក ស ខេង បានឲ្យដឹងថាគិតត្រឹមយប់ម្សិលមិញ គណៈកម្មការត្រួតពិនិត្យគុណភាពសំណង់នៅខេត្តព្រះសីហនុ បានរកឃើញសំណង់ចំនួន៥កន្លែង កំពុងសាងសង់ដោយគ្មានច្បាប់អនុញ្ញាត។
លោក ស ខេង បានថ្លែងប្រាប់អ្នកសារព័ត៌មានបែបនេះ ក្នុងទិវាប្រឆាំងគ្រឿងញៀនអន្តរជាតិ នៅរាជធានីភ្នំពេញនាព្រឹកថ្ងៃទី២៦ ខែមិថុនា ឆ្នាំ២០១៩។
លោកមានប្រសាសន៍ថា៖ «គណៈកម្មការពិសេសមួយ ដើម្បីទៅត្រួតពិនិត្យសំណង់ទាំងអស់ ទាំងសំណង់ដែលបានធ្វើហើយ កំពុងដំណើរការអាជីវកម្មក៏យើងត្រូវពិនិត្យទាំងអស់ដែរ ហើយនឹងសំណង់កំពុងដំណើរការសាងសង់ ពិនិត្យឡើងវិញទាំងអស់។ គ្រាន់តែយប់មិញយើងទទួលព័ត៌មានពីឯកឧត្ដម ជា សុផារ៉ា មកថា ជាបឋមមានដូច ៥សំណង់ ៥កន្លែង ដែលថា កំពុងសាងសង់ តែអត់មានច្បាប់ទាំងអស់។ ដូច្នេះ នេះជាហានិភ័យមួយធំ ហើយយើងត្រូវធ្វើអាហ្នឹងទាំងអស់ឡើងវិញ»។
ការចុះទៅត្រួតពិនិត្យនេះ ធ្វើឡើង ក្រោយហេតុការណ៍បាក់អគារកម្ពស់៧ជាន់ នៅខេត្តព្រះសីហនុ កាលពីថ្ងៃទី២២ ខែមិថុនា ដែលបានបណ្ដាលឲ្យកម្មករខ្មែរ ២៨នាក់ស្លាប់ និង ២៦នាក់ទៀតរងរបួស។
ក្រោយមានហេតុការណ៍នោះ លោក ហ៊ុន សែន ក៏បានបញ្ជាដោយផ្ទាល់ឲ្យរដ្ឋមន្ដ្រីក្រសួងរៀបចំដែនដី លោក ជា សុផារ៉ា ពិនិត្យមើលឡើងវិញ និងចាត់វិធានការច្បាប់ឲ្យបានម៉ឺងម៉ាត់ចំពោះសំណង់អគារទាំងឡាយនៅខេត្តព្រះសីហនុ ដែលមិនមានច្បាប់អនុញ្ញាត និងមិនត្រូវតាមស្ដង់ការនៃការសាងសង់ ដើម្បីទប់ស្កាត់កុំឲ្យកើតមានសោដនាដកម្មបែបនេះសារជាថ្មី៕