ស្ថានទូតអាមេរិកប្រចាំកម្ពុជាបានសម្ដែងនូវក្ដីព្រួយបារម្ភចំពោះការសម្រេចផ្ដន្ទាទោសអ្នកបកប្រែ និងជាអ្នកសម្របសម្រួលឲ្យទូរទស្សន៍រុស្ស៊ី RT លោក រ៉ាត់ រត្នមុនី ដោយថា លោកមិនទទួលបានការជម្រះក្ដីដោយយុត្តិធម៌នៅក្នុងប្រព័ន្ធតុលាការកម្ពុជានោះទេ។
ក្នុងសេចក្ដីថ្លែងការណ៍កាលពីថ្ងៃទី២៦ ខែមិថុនាកន្លងទៅ ដែល VOD ទើបតែទទួលបាននៅថ្ងៃនេះ ស្ថានទូតអាមេរិកប្រចាំកម្ពុជាបានហៅការសម្រេចផ្ដន្ទាទោសលោក រ៉ាត់ រត្នមុនី ឲ្យជាប់ពន្ធនាគារចំនួន ២ឆ្នាំ ពីសំណាក់សាលាដំបូងរាជធានីភ្នំពេញថា មិនបានផ្ដល់យុត្តិធម៌ជូនលោកនោះឡើយ ហើយថា វារឹតតែធ្វើឲ្យប្រព័ន្ធយុត្តិធម៌នៅកម្ពុជា បាត់បង់ជំនឿចិត្តជាងមុនថែមទៀត។
ក្នុងសេចក្ដីថ្លែងការណ៍នោះ ស្ថានទូតអាមេរិកប្រចាំកម្ពុជាជំរុញឲ្យរដ្ឋាភិបាលរបស់លោកនាយករដ្ឋមន្ដ្រី ហ៊ុន សែន ធានានូវសិទ្ធិសេរីភាពក្នុងការបញ្ចេញមតិ និងសេរីភាពសារព័ត៌មាន ដែលត្រូវបានធានាដោយច្បាប់អន្ដរជាតិ និងរដ្ឋធម្មនុញ្ញរបស់កម្ពុជាផងនោះ។
ក្នុងសេចក្ដីថ្លែងការណ៍ ស្ថានទូតអាមេរិកប្រចាំកម្ពុជាលើកឡើងថា៖ «របាយការណ៍ពីសវនាការរបស់លោក មុនី បង្ហាញថា លោកមិនបានទទួលបានការធានាលើសវនាការប្រកបដោយយុត្តិធម៌ទេ។ ការដាក់ទោសលោករឹតតែធ្វើអោយគេបាត់បង់ជំនឿលើប្រព័ន្ធតុលាការរបស់ប្រទេសកម្ពុជាថែមទៀត»។
អ្នកនាំពាក្យក្រសួងយុត្តិធម៌កម្ពុជា លោក ជិន ម៉ាលីន ច្រានចោលសេចក្ដីថ្លែងការណ៍នេះ ដោយថា ស្ថានទូតអាមេរិកកំពុងជ្រៀតជ្រែកកិច្ចការរបស់តុលាការ និងលើកឡើងខុសពីការពិតទាក់ទងនឹងសេរីភាពសារព័ត៌មាននៅកម្ពុជា។
លោក បន្ដថា៖ «យើងយល់ថា ការថ្លែងសាររបស់អាមេរិកហ្នឹង គឺជាការជ្រៀតជ្រែកទៅនឹងកិច្ចការរបស់តុលាការ។ បានន័យថា ការវាយតម្លៃរបស់គាត់ វាអត់ផ្អែកទៅតាមមូលដ្ឋានច្បាប់ ហើយការលើកឡើងដែលថា ប៉ះពាល់សេរីភាពសារព័ត៌មានក៏មិនត្រឹមត្រូវទៀត។ អ្វីដែលតុលាការផ្ដន្ទាទោសហ្នឹង គឺមិនមែនដោយសារតែអនុវត្តន៍វិជ្ជាជីវៈអ្នកសារព័ត៌មាននោះទេ គឺការប្រព្រឹត្តនូវបទល្មើសបទបញ្ញត្តិច្បាប់ព្រហ្មទណ្ឌ»។
កាលពីថ្ងៃពុធ ទី២៦ខែមិថុនាកន្លងទៅ សាលាដំបូងរាជធានីភ្នំពេញបានសម្រេចផ្ដន្ទាទោសលោក រ៉ាត់ រត្នមុនី ឲ្យជាប់ពន្ធនាគារចំនួន២ឆ្នាំ ពីបទ «ញុះញង់ឲ្យមានការរើសអើង» ដោយចោទថា លោកបានបំពេញការងារជាមួយបណ្តាញសារព័ត៌មាន RT អំឡុងពេលផលិតភាពយន្តឯកសាររឿង «ម្តាយខ្ញុំ លក់ខ្ញុំ»ដែលនិយាយអំពីរឿងរ៉ាវរបស់ក្មេងស្រីកម្ពុជា ដែលបានលក់ខ្លួន ដើម្បីជួយសម្រាលភាពក្រីក្រក្នុងគ្រួសាររបស់ពួកគេ។
ប៉ុន្ដែ យោងតាមបណ្ដាញសង្គមហ្វេសប៊ុកផ្លូវការ កាលពីថ្ងៃម្សិលមិញផងដែរ ស្ថានទូតអាមេរិកប្រចាំកម្ពុជាបានបង្ហោះរបាយការណ៍របស់អង្គការ Freedom House ដែលនិយាយអំពី “សេរីភាពនៅក្នុងពិភពលោកឆ្នាំ២០១៩” ដែលថា សេរីភាពសារព័ត៌មាននៅកម្ពុជាបានបន្ដដាំក្បាលចុះ ពោលគឺកម្ពុជាបានធ្លាក់ដល់លេខ ២៦ ក្នុងចំណោមប្រទេសចំនួន ១០០ នៅលើពិភពលោក ជាមួយនឹងប្រទេសអាហ្កានីស្ថាន Djibouti និងប្រទេស Gabon ៕
