វៀតណាមបានបង្ហាញការព្រួយបារម្ភបន្ទាប់ពីទទួលព័ត៌មានថា រដ្ឋអំណាចចិនសាកល្បងអាវុធមីស៊ីលនៅព្រំដែនទឹកកន្លែងកំពុងមានជម្លោះ ហើយអំពាវនាវឱ្យចិនគោរពអធិបតេយ្យប្រទេស និងច្បាប់អន្តរជាតិ។
អ្នកនាំពាក្យក្រសួងការបរទេសវៀតណាមលោកស្រី ឡេ ធីធុហាង(Le Thi Thu Hang) ថ្លែងក្នុងសន្និសីទសារព័ត៌មាននៅថ្ងៃនេះនៅទីក្រុងហាណូយថា វៀតណាមពិតជាមានការព្រួយបារម្ភខ្លាំងណាស់ ករណីចិនសាកល្បងអាវុធមីស៊ីលនៅព្រំដែនទឹកសមុទ្រដែលកំពុងមានជម្លោះ។ នេះបើតាមការចុះផ្សាយរបស់daily express ។
លោកស្រី អំពាវនាវឱ្យរដ្ឋអំណាចចិនគោរពដែនអធិបតេយ្យភាពរបស់វៀតណាម និងគោរពច្បាប់សមុទ្ររបស់អង្គការសហប្រជាជាតិកាលពីឆ្នាំ១៩៨២ ដើម្បីថែរក្សា សន្តិសុខ សណ្តាប់ធ្នាប់ ស្ថិរភាព និងកិច្ចសហប្រតិបត្តិការនៅក្នុងតំបន់។
មន្ទីរប៉ង់តាហ្គោនជាទីបញ្ជាការកងទ័ពរបស់អាមេរិកបានប្រកាសថា កាលពីថ្ងៃអង្គារដើមសប្តាហ៍នេះ ចិនបាញ់សាកល្បងអាវុធមីស៊ីលប្រឆាំងនាវាចម្បាំងចេញពីកោះតូចមួយនៅប្រជុំកោះស្ព្រាតលី ជាទីកន្លែងដណ្តើមគ្នាកាន់កាប់រវាងចិន វៀតណាម និងហ្វីលីពីន។
ទោះយ៉ាងណាក្រោយការប្រកាសរបស់សហរដ្ឋអាមេរិក រដ្ឋអំណាចទីក្រុងប៉េកាំងអះអាងថា នោះមិនមែនជាការបាញ់សាកល្បងអាវុធមីស៊ីលទេគឺវា គ្រាន់តែជាការបាញ់គ្រាប់ពិតនៅក្នុងសមយុទ្ធយោធាដែលធ្វើឡើងជារាល់ឆ្នាំតែប៉ុណ្ណោះ។