លោកនាយករដ្ឋមន្ត្រី ហ៊ុន សែន បានផ្ដាំទៅមនុស្សមួយ«ក្ដាប់តូច» ដែលលោកចោទថា បន់ឲ្យលោកឆាប់ស្លាប់ ឬក៏បានបង្កើតព័ត៌មានក្លែងក្លាយអំពីស្ថានភាពសុខភាពរបស់លោក ខណៈលោកកំពុងសម្រាកព្យាបាលសុខភាពនៅឯមន្ទីរពេទ្យមួយស្ថិតក្នុងប្រទេសសិង្ហបុរី។
លោក ហ៊ុន សែន បានចាកចេញពីប្រទេសកម្ពុជាកាលពីរសៀលថ្ងៃម្សិលមិញនេះ ដើម្បីទៅព្យាបាលរាងកាយដែលលោកហៅថា «គ្រេចស្មា» នៅឯប្រទេសសិង្ហបុរី។
នៅលើទំព័រហ្វេសប៊ុកផ្លូវការរបស់លោកនៅរសៀលថ្ងៃនេះ លោកនាយករដ្ឋមន្ត្រី ហ៊ុន សែន រៀបរាប់ថា លោកអរគុណទៅដល់ជនរួមជាតិ ដែលបានជូនពរលោក និងបារម្មណ៍ពីសុខភាពរបស់លោក។
លោក ហ៊ុន សែន បានរៀបរាប់បន្តថា បញ្ហា «គ្រេចស្មា» នៅលើរាងកាយលោក ត្រូវបានដោះស្រាយរួចរាល់ហើយ បន្ទាប់ពីទទួលបានការព្យាបាលពីក្រុមគ្រូពេទ្យសិង្ហបុរីនៅចន្លោះម៉ោង ២ ទៅម៉ោង ៣ (ម៉ោង ១ ទៅ ២ម៉ោងនៅកម្ពុជា)ទៀបភ្លឺថ្ងៃអាទិត្យនេះ។
ក្រៅពីពាក្យអរគុណហើយនោះ លោកនាយករដ្ឋមន្ត្រី ហ៊ុន សែន ក៏បានចោទទៅលើអ្នកប្រើប្រាស់បណ្ដាញសង្គមហ្វេសប៊ុកមួយចំនួនថា បន់ស្រន់ឲ្យលោកឆាប់ស្លាប់ ឬក៏បង្កើតព័ត៌មានក្លែងក្លាយអំពីស្ថានភាពសុខភាពរបស់លោក។ អ្នកប្រើប្រាស់បណ្ដាញសង្គមទាំងនោះ ត្រូវបានលោកនាយករដ្ឋមន្ត្រីចាត់ទុកជា «ជនមួយក្ដាប់តូច»ប៉ុណ្ណោះ។
អមដោយរូបថត២សន្លឹកមានរូបលោកផ្ទាល់ និងភរិយាផងនោះ លោក ហ៊ុន សែន រៀបរាប់ថា៖ «ខ្ញុំសូមជូនយោបល់ទៅអ្នកទាំងនោះវិញថា (ឈប់បានឈប់ទៅ )ព្រោះការធ្វើនយោបាយរង់ចាំឱ្យខ្ញុំស្លាប់ដើម្បីដណ្តើមអំណាច សូមរង់ចាំជាតិក្រោយទៅចុះ ព្រោះយមរាជមិនត្រូវការជីវិតខ្ញុំទេក្នុងរយ:ពេលមិនតិចជាង ៤០ឆ្នាំពេលខាងមុខ ព្រោះយមរាជត្រូវការឱ្យខ្ញុំនៅបន្តបម្រើប្រជាជន និងកម្ចាត់ពួកក្បត់ជាតិដើម្បីរក្សាសន្តិភាព និងការអភិវឌ្ឍបន្តទៅទៀត»។
នៅលើទំព័រហ្វេសប៊ុករបស់លោកនោះ លោក ហ៊ុន សែន មិនសំដៅទៅលើបុគ្គលក ឬអ្នកនយោបាយក្រុមណាមួយនោះឡើយ។
ទោះជាយ៉ាងណា មេដឹកនាំគណបក្សសង្គ្រោះជាតិ លោក កឹម សុខា ត្រូវបានសមត្ថកិច្ចចាប់ខ្លួន ក្រោមការចោទថាបាន «ក្បត់ជាតិ» ហើយគណបក្សប្រឆាំងដ៏ធំតែមួយគត់នៅកម្ពុជា ត្រូវបានតុលាការសម្រេចរំលាយចោលកាលពីចុងឆ្នាំ២០១៧កន្លងមក នៅក្រោមការចោទប្រកាន់នេះ។
គណបក្សប្រឆាំងមួយនេះ និងថ្នាក់ដឹកនាំជាន់ខ្ពស់ជាង ១០០រូប ក៏ត្រូវបានតុលាការហាមឃាត់សិទ្ធិធ្វើនយោបាយរយៈពេល ៥ឆ្នាំផងដែរ ប៉ុន្តែ ក្រោយមកថ្នាក់ដឹកនាំមួយចំនួនបានស្នើសុំសិទ្ធិធ្វើនយោបាយឡើងវិញ៕
