គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ បានដាក់ចេញនូវវិធានការចំនួនពីរ ដើម្បីការពារព្រៃឈើឲ្យបានគង់វង្ស ដែលក្នុងនោះវិធានការមួយគឺបំផ្លាញចោល មធ្យោបាយដែលប្រើក្នុងការប្រព្រឹត្តិបទល្មើសព្រៃឈើនៅនឹងកន្លែងតែម្តង។
នេះបើយោងតាមសេចក្តីប្រកាសព័ត៌មានរបស់គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ ដែលចេញផ្សាយនៅថ្ងៃនេះ។ តាមប្រភពដដែល មធ្យោបាយទាំងនោះ រួមមាន រថយន្ត គោយន្ត និងម៉ូតូ ជាដើម។
ស្ថាប័ននេះក៏អះអាងថា នឹងអនុវត្តវិធានការច្បាប់តឹងរ៉ឹងលើបុគ្គល ឬក្រុមហ៊ុនដែលពាក់ព័ន្ធនឹងបទល្មើសព្រៃឈើផងដែរ។
អ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ លោក អេង ហ៊ី មានប្រសាសន៍ប្រាប់ វី.អូ.ឌី បន្ថែមថា វិធានការថ្មីនេះដាក់ចេញសំដៅសំអាតបទល្មើសព្រៃឈើតាំងពីបទល្មើសតូចៗ រហូតដល់បទល្មើសទ្រង់ទ្រាយធំៗនៅទូទាំងប្រទេស។ លោកបន្តថា គណៈកម្មការជាតិនឹងសុំគោលការណ៍ពីព្រះរាជអាជ្ញា បំផ្លាញចោលនូវរាល់មធ្យោបាយទាំងអស់ នៅនឹងកន្លែងតែម្តង ចៀសវាងជនខិលខូចយកមធ្យោបាយទាំងនេះ ប្រព្រឹត្តិបទល្មើសព្រៃឈើជាថ្មីទៀត។
លោក អេង ហ៊ី មានប្រសាសន៍៖ «កន្លងទៅ យើងចាប់ឈើអ្នកដឹកតូចតាច រួចធ្វើកិច្ចសន្យាឱ្យធម្យោបាយត្រលប់ទៅវិញ។ ឥលូវអត់ទេ ទោះបីតូចតាចបែបណាក៏ដោយ ត្រូវចាត់វិធានការតឹងរ៉ឹង តូចតាចដូចស្រមោចអ៊ីចឹង។ គណៈកម្មការជាតិរកឃើញថា បើមិនទប់ស្កាត់ធ្វើឱ្យយើងកាន់តែលំបាក។ យើងត្រូវបំផ្លាញចោលនូវនឹងកន្លែងតែម្តង ព្រោះបើទុកក៏ប្រើអីមិនកើតដែរ។»
លោក អេង ហ៊ី បន្ថែមថា ប្រជាពលរដ្ឋតូចតាចដែលប្រកបរបរដឹកឈើលក់ ឬស៊ីឈ្នួលដឹកឈើឱ្យគេ គួរណាស់តែដូរមុខរបរជាបន្ទាន់ ព្រោះគណៈកម្មការជាតិនឹងមិនមានការយោគយល់ទៀតទេ។
ទាក់ទងនឹងបញ្ហានេះ សកម្មជនការពារបរិស្ថាន លោក ហេង ស្រស់ លើកឡើងថា ការចេញសេចក្ដីប្រកាសរបស់គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិនេះ ទំនងជាមានប្រសិទ្ធភាពតិចតួចប៉ុណ្ណោះ ខណៈដែលឈ្មួញរកស៊ីឈើធំៗនៅតែមមាញឹកក្នុងជំនួញនេះនៅឡើយ។ លោកបញ្ជាក់ថា ក្រុមគណៈកម្មការជំនាញនេះ គួរណាស់បើកការស៊ើបអង្កេតលំអិតជាងមុន ជាជាងរឹតបន្តឹងតែលើប្រជាពលរដ្ឋតូចតាច។
លោក លើកឡើងថា៖ «ចាប់បាននៅនឹងដៃ មើលទៅឃើញ យើងសាទរចំពោះការអនុវត្តច្បាប់ ប៉ុន្តែ អនុវត្តច្បាប់ទៅតាមរូបភាពជាក់ស្តែង កុំចាប់បានឧកញ៉ាហើយលែង អាហ្នឹងវាជាការអនុវត្តច្បាប់លំអៀង។ សព្វថ្ងៃ គេកាប់ឈើប្រមូលឈើយកទៅលក់នៅវៀតណាម ជាពិសេសដឹកតាមច្រកខេត្តមណ្ឌលគិរី និងខេត្តក្រចេះ»។
ទន្ទឹមនឹងនេះ តំណាងសហគមន៍ព្រៃឡង់ លោក ហឿន សុភាព មានប្រសាសន៍ថា លោកគាំទ្រចំពោះការសម្រេចរបស់គណៈកម្មការជាតិ ពិសេសត្រង់ចំណុចការណ៍ដែលសម្រេចដុតកម្ទេចចោលនូវមធ្យោបាយដឹកជញ្ជូនឈើខុសច្បាប់។ លោករំលឹកថា ចំណាត់ការមុនៗមានប្រសិទ្ធភាពតែពេលដំបូង លុះយូរបន្តិចបទល្មើសកើតឡើងដដែលជាដដែល។
លោក ហឿន សុភាព មានប្រសាសន៍ថា៖ «បើសិនយើងដាក់សេចក្តីប្រកាសតែម្តង យើង! យើងធ្វើដូចភ្លៀងរលឹម ទាំងអ្នកមានទាំងអ្នកក្រ ប្រជាពលរដ្ឋធម្មតារហូតដល់ឧកញ៉ាអី។បើសិនគាត់ធ្វើមានប្រសិទ្ធភាព យើងសប្បាយចិត្តមែនទែន។»
របាយការណ៍របស់គណៈកម្មាធិការជាតិទប់ស្កាត់ និងបង្ក្រាបបទល្មើសធនធានធម្មជាតិបានវាយតម្លៃជារួមថា បទល្មើសព្រៃឈើក្នុងឆ្នាំ២០១៨កន្លងទៅគឺ ថយចុះ។ ថយចុះតាមរយៈការរឹបអូសទំហំឈើពីជាង ៧ម៉ឺនម៉ែត្រគូប(គីប) ក្នុងឆ្នាំ២០១៦ មកនៅសល់ប្រមាណជាង ៤ពាន់ម៉ែត្រគូប(គីប) ក្នុងឆ្នាំ២០១៨។
ករណីបង្ក្រាបចំពោះបទល្មើសព្រៃឈើនៅ៦ខែដើមឆ្នាំ២០១៩វិញ គណៈកម្មការជាតិទប់ស្កាត់ និងបង្ក្រាបបទល្មើសធនធានធម្មជាតិរកឃើញថា ការបង្ក្រាបបទល្មើសមានការថយចុះ ប៉ុន្តែ មិនទាន់សរុបតួលេខច្បាស់លាស់នៅឡើយទេ។
ទោះជាយ៉ាងណាក្ដី សេចក្ដីថ្លែងការណ៍របស់បណ្ដាញសហគមន៍ព្រៃឡង់មកពីខេត្តក្រចេះ ស្ទឹងត្រែង ព្រះវិហារ និងខេត្តកំពង់ធំ ចុះថ្ងៃទី១៧ ខែមិថុនា ឆ្នាំ២០១៩ ឱ្យដឹងថា ការកាប់បំផ្លាញព្រៃឈើនៅក្នុងតំបន់ព្រៃឡង់កំពុងកើតឡើង។ សហគមន៍មូលដ្ឋាននេះបញ្ជាក់ថា កំណើននៃបទល្មើសនេះបណ្ដាលមកពីភាពអសកម្មរបស់មន្ត្រីជំនាញ និងថា ករណីផ្សេងទៀតបណ្ដាលមកពីបញ្ហាពុករលួយ៕