អាជ្ញាធរហុងកុង កាលពីម្សិលមិញ បានចាប់ខ្លួនបាតុករ៦នាក់ដែលធ្វើបាតុកម្មប្រឆាំងនឹងច្បាប់ធ្វើបត្យាប័នអ្នកទោស។
យោងតាមសេចក្តីប្រកាសព័ត៌មានរបស់រដ្ឋាភិបាលហុងកុងដែលចេញផ្សាយនៅថ្ងៃនេះ មនុស្ស៥នាក់ត្រូវបានឃាត់ខ្លួននៅក្នុងពេលធ្វើបាតុកម្ម ដោយសារតែពួកគេបានវាយប្រហារ និងរារាំងមន្រ្តីនគរបាលក្នុងការបំពេញភារកិច្ច។ ប្រភពដដែលឲ្យដឹងថា បាតុករម្នាក់ទៀតត្រូវបានចាប់ខ្លួនដែរ ដោយសារតែរូបគេមិនបានបង្ហាញអត្តសញ្ញាណបណ្ណនៅពេលដែលសមត្ថកិច្ចសួររក។
រដ្ឋាភិបាលហុងកុង អះអាងថា នគរបាលបង្ខំចិត្តបំបែកដោយសារតែក្រុមបាតុករទាំងនោះរឹងទទឹងមិនព្រមស្តាប់តាមការណែនាំរបស់សមត្ថកិច្ច។ រដ្ឋាភិបាលស្វយ័តមួយនេះ លើកឡើងថា តាមគោលការណ៍នគរបាលជាអ្នកជួយសម្រួលដល់ការជួបជុំដោយសន្តិវិធី ប៉ុន្តែ ក្នុងពេលជាមួយគ្នានេះ ពួកគេក៏ជាអ្នកដែលធានាសន្តិសុខ និងសណ្ដាប់ធ្នាប់សាធារណៈ។ សេចក្តីប្រកាសព័ត៌មានដដែល ក៏បានបញ្ជាក់ផងដែរថា ការបិទផ្លូវរបស់ក្រុមបាតុករហុងកុងជាសកម្មភាពខុសច្បាប់។
ទោះយ៉ាងណាដ៏ដោយ នគរបាលហុងហុងថា ពួកគេនៅតែគោរពបញ្ចេញមតិ និងការប្រមូលផ្តុំ។
តាមការចុះផ្សាយរបស់សារព័ត៌មាន Hong Kong Free Press ក្រុមអ្នករៀបចំបាតុកម្មថា កាលពីម្សិលមិញ មានបាតុករចូលរួមជាង ២៣ម៉ឺននាក់ តែសមត្ថកិច្ចអះអាងថា មានបាតុករតែជាង៥ម៉ឺននាក់ប៉ុណ្ណោះ។
ក្នុងបាតុកម្មកាលពីថ្ងៃអាទិត្យម្សិលមិញ ក្រុមបាតុករក៏បានទាមទារមិនខុសពីលើកមុនប៉ុន្មានទេ។ ពួកគេបានទាមទារឲ្យរដ្ឋាភិបាលហុងកុងទម្លាក់ចោលទាំងស្រុងនូវច្បាប់ធ្វើបត្យាប័នអ្នកទោស ស្នើឲ្យប្រមុខក្រុងហុងកុង លោកស្រី Carrie Lam ត្រូវចុះចេញពីតំណែង ស៊ើបអង្កេតការប្រើប្រាស់អំពើហិង្សារបស់ប៉ូលីសទៅលើក្រុមបាតុករ និងទម្លាក់ចោលការចោទប្រកាន់ទៅលើក្រុមបាតុករ។
កាលពីថ្ងៃទី១ ខែកក្កដា ក្នុងពេលដែលរដ្ឋាភិបាលប្រារព្ធខួប២២ឆ្នាំដែលអង់គ្លេសប្រគល់ទឹកដីហុងកុងឲ្យចិន ក្រុមបាតុករបានប៉ះទង្គិចគ្នាម្តងរួចទៅហើយជាមួយសមត្ថកិច្ច ដោយសារតែពួកគេបានសម្រុកចូលទៅក្នុងអគាររដ្ឋសភា។ ក្រោយហេតុការណ៍នោះ អាជ្ញាធរហុងកុង បានចាប់ខ្លួនបាតុករ១២នាក់។
ការតវ៉ារបស់ពលរដ្ឋហុងកុងក្នុងរយៈពេលប៉ុន្មានសប្តាហ៍មកនេះ បានជំរុញឲ្យមានមានល្អក់កករផ្នែកការទូតរវាងរដ្ឋាភិបាលក្រុងឡុង និងរដ្ឋាភិបាលក្រុងប៉េកាំង។ ប្រមុខការទូតអង់គ្លេស លោក លោក Jeremy Hunt ថា ខ្លួនគាំទ្រការប្រើប្រាស់សិទ្ធិសេរីភាព និងការតវ៉ាដោយអហិង្សារបស់ពលរដ្ឋហុងកុង ហើយព្រមានទណ្ឌកម្មប្រឆាំងនឹងរដ្ឋាភិបាលក្រុងប៉េកាំងផងដែរ។ ប៉ុន្តែ រដ្ឋាភិបាលក្រុងប៉េកាំង ហៅការលើកឡើងនេះថា ជាការជ្រៀតជ្រែកកិច្ចការផ្ទៃក្នុងរបស់ចិន ហើយថា អង់គ្លេសគ្មានសិទ្ធិណាមួយលើដែនកោះនេះទៀតទេ ចាប់តាំងពីថ្ងៃទី១ ខែកក្កដា ឆ្នាំ១៩៩៧ មកម្ល៉េះ៕