ក្រុមហ៊ុនស្មាត (Smart) នៅថ្ងៃនេះ បានដាក់បង្ហាញជាលក្ខណៈសាកល្បងដោយផ្ទាល់ពីការនាំចូលបច្ចេកវិទ្យា 5G ជាលើកដំបូងនៅកម្ពុជា ដោយមានកិច្ចសហការជាមួយក្រុមហ៊ុន Hauwie ផងដែរ។ ការសាកល្បងដោយផ្ទាល់ពេលនេះ ក្រោយពេលកម្ពុជាបានចុះហត្ថលេខាសហការជាមួយប្រព័ន្ធបច្ចេកវិទ្យា 5G កាលពីខែមេសាកន្លងទៅ។
សេចក្តីប្រកាសព័ត៌មានរបស់ក្រុមហ៊ុន Smart នៅថ្ងៃនេះ បានឱ្យដឹងថា ការដាក់បង្ហាញជាលក្ខណៈសាកល្បងនូវប្រព័ន្ធបច្ចេកវិទ្យា 5G នេះ ដែលមានឈ្មោះថា «ជំរុញការអភិវឌ្ឍកម្ពុជាសម្រាប់អនាគតនៃការតភ្ជាប់ និងការរស់នៅបែបឌីជីថល»។
ក្នុងសេចក្តីប្រកាសព័ត៌មាននេះ បានដកស្រង់សម្តីរបស់នាយកប្រតិបត្តិក្រុមហ៊ុន Smart លោក Thomas Hundt ដោយបានលើកឡើងពីអត្ថប្រយោជន៍នៃការតភ្ជាប់បច្ចេកវិទ្យាចុងក្រោយ 5G នេះ ថាមានទិសដៅសំខាន់គឺធ្វើឱ្យកាន់តែប្រសើរឡើងសម្រាប់ការរស់នៅរបស់ពលរដ្ឋកម្ពុជារាប់លាននាក់។
លោកថា ភាពប្រសើរទាំងនោះ តាមរយៈការតភ្ជាប់បណ្តាញបច្ចេកវិទ្យាលំដាប់ពិភពលោក និងបច្ចេកវិទ្យាបែបឌីជីថលចុងក្រោយ គឺសម្រាប់ការអភិវឌ្ឍហេដ្ឋារចនាសម្ព័ន្ធបណ្តាញ ដើម្បីនាំមកនូវសេវាអ៊ីនធឺណិតកាន់តែមានល្បឿនលឿន និងជាទីទុកចិត្តនៅកម្ពុជា។
លោកបន្តក្នុងសេចក្តីប្រកាសព័ត៌មានថា៖ «នេះជាមូលហេតុដែលយើងខ្ញុំបាននឹងកំពុងបន្តវិនិយោគជាមធ្យមទំហំទឹកប្រាក់ចំនួន៧០ ទៅ៨០លានដុល្លារសហរដ្ឋអាមេរិកជារៀងរាល់ឆ្នាំ សម្រាប់ការអភិវឌ្ឍហេដ្ឋារចនាសម្ព័ន្ធបណ្តាញ ដើម្បីនាំមកនូវសេវាអ៊ីនធឺណិតចល័តកាន់តែមានល្បឿនលឿននៅទូទាំងព្រះរាជាណាចក្រកម្ពុជា»។
ក្នុងដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅប្រទេសចិន កាលពីចុងខែមេសា កម្ពុជាបានចុះហត្ថលេខាលើអនុស្សរណៈមួយចំនួន នៅក្នុងនោះក៏មានការអភិវឌ្ឍរួមគ្នារវាងកម្ពុជា និង Huawei ទៅលើប្រព័ន្ធអ៊ីនធឺណិតជំនាន់ទី៥នេះ ដោយកម្ពុជាជាប្រទេសទី១ នៅតំបន់អាស៊ានដែលបានចុះហត្ថលេខា។
កិច្ចសហការរវាងក្រុមហ៊ុន Smart និង ក្រុមហ៊ុនទូរសព្ទរបស់ចិន Huawei លើការសាកល្បងប្រព័ន្ធបច្ចេកវិទ្យាអ៊ីនធឺណិតជំនាន់ទី៥ ឬ 5G នៅកម្ពុជានេះ ខណៈបណ្តាក្រុមហ៊ុនធំៗ ចំនួន៤ របស់អង់គ្លេស និងជប៉ុន កាលពីខែឧសភា បានសម្រេចពន្យារពេលដាក់ឱ្យប្រើប្រាស់កម្មវិធីអ៊ីនធឺណិតជំនាន់ទី៥ ឬ 5G របស់ក្រុមហ៊ុន Huawei។
ការពន្យារពេលនេះ ក្រោយពីសហរដ្ឋអាមេរិក បានប្រកាសថា Huawei បានយកការសម្ងាត់របស់អាមេរិក ដែលបានធ្វើឱ្យប៉ះពាល់ដល់សន្តិសុខជាតិខ្លួន និងបានដាក់ក្រុមហ៊ុននេះចូលក្នុងបញ្ជីខ្មៅនៃការធ្វើពាណិជ្ជកម្មរបស់អាមេរិកទៀតផង។
ដោយឡែក ក្រុមហ៊ុនអ៊ីនធឺណិតលំដាប់ពិភពលោករបស់អាមេរិក Google និងក្រុមហ៊ុនបច្ចេកវិទ្យារបស់ជប៉ុន Panasonic បានផ្អាកការធ្វើពាណិជ្ជកម្មជាមួយ Huawei បន្តបន្ទាប់ផងដែរ។
យ៉ាងណា កាលពីថ្ងៃទី២៤ ខែឧសភា មន្ត្រីជាន់ខ្ពស់រដ្ឋាភិបាល អះអាងថា កម្ពុជានៅតែបន្តការអភិវឌ្ឍរួមគ្នាជាមួយក្រុមហ៊ុនទូរសព្ទរបស់ចិន Huawei ទៅលើអ៊ីនធឺណិតជំនាន់ទី៥ ឬ 5G ដោយមិនបារម្ភពីការលួចព័ត៌មានសម្ងាត់របស់ជាតិនោះទេ ព្រោះថា កម្ពុជាមានប្រព័ន្ធត្រួតពិនិត្យសុវត្ថិភាពដែលអាចទុកចិត្តបាន៕
