ក្រសួងឧស្សាហកម្ម គ្រោងបញ្ចប់គោលនយោបាយថ្នាក់ជាតិស្ដីពីការអភិវឌ្ឍវិស័យសហគ្រាសធុនតូច និងមធ្យម និងសិប្បកម្ម មុននឹងប្រជុំអន្តរក្រសួងនាពេលខាងមុខ ហើយរំពឹងថា គោលនយោបាយនេះនឹងអាចចេញរូបរាងនៅចុងឆ្នាំ។
អ្នកនាំពាក្យក្រសួងឧស្សាហកម្ម និងសិប្បកម្ម លោក អ៊ុំ សុថា មានប្រសាសន៍ថា សេចក្តីព្រាងគោលនយោបាយនេះបានបញ្ចប់ការពិភាក្សាថ្នាក់ក្រសួងរួចហើយ ដោយថា មានចំណុចមួយចំនួនក្រសួងតម្រូវឲ្យអគ្គនាយកជំនាញកែសម្រួលឡើងវិញ ដើម្បីកំណត់ឲ្យច្បាស់ពីនិយមន័យ ដើម្បីឲ្យរដ្ឋាភិបាលមានភាពងាយស្រួលក្នុងការកំណត់ផ្ដល់ការលើកទឹកចិត្ត និងជួយ ជាដើម។
លោក អ៊ុំ សុថា៖ «យើងកំណត់និយមន័យដើម្បីបែងចែកប្រភេទខុសៗអញ្ចឹង នៅពេលដែលយើងដាក់ចេញគោលនយោបាយលើកទឹកចិត្ត តើប្រភេទ SME ណាដែលគួរជាអទិភាពខ្ពស់? គាត់មានអទិភាពដូចគ្នា តែគ្រាន់តែអ្នកណាមានអទិភាពខ្ពស់ជាង គាំទ្ររបៀបណា ហើយ SME ប្រភេទណាដែលមិនមានហានិភ័យច្រើនជាង ហើយ SME ប្រភេទណាដែលមិនមាន។ អញ្ចឹង នេះចំណុចសំខាន់ដែលអគ្គនាយកដ្ឋានជំនាញគាត់កែលំអឡើងវិញ»។
បើតាមលោក អ៊ុំ សុថា ក្នុងគោលនយោបាយថ្មីនេះ វិស័យសហគ្រាសធុនតូច និងមធ្យម រួមទាំងសិប្បកម្មផងនោះ នឹងទទួលបានការលើកទឹកចិត្តតាមរយៈការសម្រួលឲ្យមានភាពងាយស្រួលក្នុងការចុះបញ្ជី ការការពារដល់ការប្រកួតប្រជែង ការផលិត លើកកម្ពស់ផលិតផល និងរកទីផ្សារជូនផងដែរ។
យោងតាមក្រសួងឧស្សាហកម្ម វិស័យសហគ្រាសធុនតូច និងមធ្យម និងសិប្បកម្ម បច្ចុប្បន្ន បានជួយផ្ដល់ការងារដល់ពលរដ្ឋកម្ពុជាដល់ទៅជាង ៨០ភាគរយ និងធានាដល់សេដ្ឋកិច្ចជាតិក្នុងអត្រាថេរពី ៦ ទៅ៧ភាគរយ ជារៀងរាល់ឆ្នាំផងដែរ។
ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា លោកឧកញ៉ា តែ តាំងប៉ ជំរុញដល់រដ្ឋាភិបាលបង្កើតគោលនយោបាយនេះឲ្យបានឆាប់ ដោយថា បច្ចុប្បន្ន ដោយសារគ្មានគោលនយោបាយសម្រាប់ SME នេះហើយ ទើបធ្វើឲ្យវិស័យនេះនៅជួបបញ្ហាច្រើន ដែលធ្វើឲ្យប៉ះពាល់ដល់វិស័យការងារ និងការធ្វើជំនួញរបស់សហគ្រាសទាំងនោះ។
លោកបន្ថែមថា ប្រសិនជាគោលនយោបាយនេះដាក់ចេញមានប្រសិទ្ធភាពនោះ វាមិនត្រឹមតែជួយដល់សហគ្រាសធុនតូច និងមធ្យមនៅកម្ពុជាប៉ុណ្ណោះទេ វាថែមទាំងជួយទប់ស្កាត់ការធ្វើចំណាកស្រុករបស់ប្រជាជនខ្មែរទៅក្រៅប្រទេសផងដែរ។
លោក មានប្រសាសន៍ថា៖ «អញ្ចឹងបានជាគោលនយោបាយហ្នឹងជួយប្រទេសជាតិបានច្រើនសម្បើមណាស់។ តែយើងធ្វើអាហ្នឹងមិនទាន់បាន ហើយផលិតផលយើងមើលទៅដាក់លក់នៅទីផ្សារគឺជាផលិតផលនាំចូល។ អញ្ចឹងបានរដ្ឋាភិបាលត្រូវជួយ SME តាំងពីពន្ធ តាំងពីការនាំម៉ាស៊ីនចូល ដើម្បីជួយ SME គឺគោលនយោបាយហ្នឹងធ្វើជាទូទៅ។ បើយើងធ្វើរឿងហ្នឹង យើង(កម្ពុជា)ចំណេញក្នុងមួយឆ្នាំៗរាប់ម៉ឺនពាន់លានដុល្លារ»។
ទោះជាយ៉ាងណា លោកស្នើដល់រដ្ឋាភិបាលឲ្យយកគោលនយោបាយនេះមកពិភាក្សាជាមួយ SME ទាំងអស់ផងដែរ ដើម្បីរកឲ្យឃើញពីបញ្ហា និងរកវិធីដោះស្រាយបានទាំងអស់គ្នា។
បើតាមក្រសួងឧស្សាហកម្ម និងសិប្បកម្ម បច្ចុប្បន្ន សហគ្រាសធុនតូច និងមធ្យម មានជាង៥០ម៉ឺនសហគ្រាស និងមានលក្ខណៈចម្រុះ និងសម្បូរបែប ដែលភាគច្រើនក្នុងផ្នែកនេះរួមមាន សហគ្រាសកែច្នៃម្ហូបអាហារ សហគ្រាសគាំទ្របម្រើដល់វិស័យទេសចរណ៍ កសិ-ឧស្សាហកម្ម និងសហគ្រាសកម្មន្តសាលកែច្នៃផលិតផលប្រើប្រាស់ទូទៅក្នុងជីវភាពប្រចាំថ្ងៃរបស់ប្រជាជន ។ ប្រភពដដែលឲ្យដឹងថា បច្ចុប្បន្ន វិស័យសហគ្រាសធុនតូច និងមធ្យមនេះ បានផ្ដល់ការងារដល់ពលរដ្ឋខ្មែរពី៧០ ទៅ៨០ភាគរយ និងនាំមកនូវផលទុនជាតិសរុបចំនួន៥៨% ៕