ក្រុមយុវជន តំណាងបក្សនយោបាយ រួមទាំងសង្គមស៊ីវិល មួយចំនួន អះអាងថា ពួកគេនឹងនាំគ្នាទៅដាក់កម្រងផ្កាជូនវិញ្ញាណក្ខន្ធលោក កែម ឡី ដើម្បីរំលឹកពីវីរភាពរបស់លោក នៅស្ថានីយ៍ប្រេងឥន្ធនៈកាល់តិច ជាប់ស្តុបបូកគោ នៅថ្ងៃស្អែកនេះ។
ប្រធានសមាគមសម្ព័ន្ធនិស្សិតបញ្ញវន្តខ្មែរ និងជាសមាជិកក្រុម ១០០រាត្រី លោក មួង សូនី លើកឡើងថា ពួកគាត់នៅតែនាំគ្នាទៅដាក់កម្រងផ្កា ដើម្បីគោរពវិញ្ញាណក្ខន្ធលោក កែម ឡី នៅស្ថានីយ៍ប្រេងឥន្ធនៈកាល់តិចជាប់ស្តុបបូកគោដដែល ទោះបីជាអាជ្ញាធរមិនអនុញ្ញាតក៏ដោយ។
លោក មានប្រសាសន៍ថា៖ «យើងទៅផឹកកាហ្វេ ទៅផ្សាយមេត្តាឱ្យគាត់ត្រឹម១០ នាក់អីហ្នឹង។ ហើយគេមកចាប់អីហ្នឹងឱ្យគេមក ខ្ញុំអត់ខ្លាចអត់ព្រួយបារម្ភ ព្រោះខ្ញុំធ្វើត្រូវច្បាប់។ យើងគោរពច្បាប់។ […] យើងដាក់ពាក្យជូនដំណឹងដល់សាលាក្រុងផង អាហ្នឹងយើងគោរពសិទ្ធិពួកគាត់ និងមន្ត្រីអាជ្ញាធរដែលមានសមត្ថកិច្ចផ្សេងៗទៀត ហើយគាត់ទៅចាប់ អាហ្នឹងវាឆ្លុះបញ្ចាំអត្តចរិតរបស់គាត់ ហើយកុំនាំពាក្យទៅប្រាប់អន្តរជាតិថា កម្ពុជាជាប្រទេសគោរពច្បាប់ គោរពសិទ្ធិមនុស្ស នយោបាយពេញលេញអី»។
បើតាមលោក សូនី ថាបន្ទាប់ដាក់កម្រងផ្ការួច ពួកគាត់នឹងនាំគ្នាទៅចូលរួមពិធីបុណ្យគម្រប់ខួប ៣ ឆ្នាំលោកបណ្ឌិត កែម ឡី នៅស្រុកកំណើតក្នុងខេត្តតាកែវទៀត។
អ្នកនាំពាក្យគណបក្សប្រជាធិបតេយ្យមូលដ្ឋាន លោក ឡឹក សុធារ ថាសមាជិក និងថ្នាក់ដឹកនាំបក្សរបស់លោក នៅថ្ងៃស្អែកក៏នឹងទៅដាក់កម្រងផ្កានៅកន្លែងដែលលោក កែម ឡី ត្រូវឃាតករបាញ់សម្លាប់កាលពីបីឆ្នាំមុនដែរ។
លោក អះអាងថា៖ «យើងក៏មើលឃើញដែរថា ជាក់ស្ដែងទីតាំងនោះ គឺជាទីតាំងឯកជន អ៊ីចឹង បើសិនជាមានការរារាំង មិនថ្វីដែរ។ ប៉ុន្តែ គ្រាន់តែថា យើងទៅដាក់កម្រងផ្កា យើងមិនធ្វើអីទេ យ៉ាងច្រើនស្មឹងស្មាត ដើម្បីគោរពវិញ្ញាណក្ខន្ធលោកតែប៉ុណ្ណឹងឯង។ សង្ឃឹមថា ម្ចាស់ទីកន្លែង ក៏ដូចជា អាជ្ញាធរបន្ធូរបន្ថយ ឬក៏អនុញ្ញាតធ្វើការគោរពវិញ្ញាណក្ខន្ធលោក»។
ដោយឡែក ប្រធានសហភាពសហជីពកម្ពុជា លោក រ៉ុង ឈុន មានប្រសាសន៍ថា នៅស្អែកនេះ លោកនឹងទៅដាក់កម្រងផ្កាគោរពវិញ្ញាណក្ខន្ធលោក កែម ឡី នៅស្តុបបូកគោ ដើម្បីរំលឹកពីវីរភាពលោកដូចគ្នា។
លោក ថា៖ «ដើម្បីរំលឹកគុណវីរភាព ទី២ យើងជំរុញឱ្យអាជ្ញាធរត្រូវតែវែកមុខរកឃាតករពិត និងអ្នកនៅពីក្រោយខ្នងយកមកផ្ដន្ទាទោសទៅតាមផ្លូវច្បាប់ ដើម្បីផ្ដល់យុត្តិធម៌ដល់សពលោក កែម ឡី ក៏ដូចជា ក្រុមគ្រួសារ កូនចៅ និងមិត្តភក្ដិរួមការងារជាមួយគ្នាផងដែរ»។
អ្នកនាំពាក្យសាលារាជធានីភ្នំពេញ លោក ម៉េត មាសភក្ដី មានប្រសាសន៍ ប្រសិនបើក្រុមយុវជនចង់រៀបចំពិធីរំលឹកគម្រប់៣ ឆ្នាំនេះ ពួកគេអាចធ្វើនៅវត្តអារាម និងនៅទីស្នាក់ការរបស់ខ្លួន ប៉ុន្តែសម្រាប់ទីសាធារណៈវិញ សាលារាជធានីមិនអនុញ្ញាតឡើយ។
លោកមានប្រសាសន៍ថា៖ «ភោជនីយដ្ឋានជាកន្លែងញុាំអាហារ សណ្ឋាគារ កន្លែងស្នាក់នៅ ទីវត្តអារាមសម្រាប់យើងធ្វើពិធីសាសនាអីផ្សេងៗហ្នឹង ជាដើម ស្របតាមគោលការណ៍បំណងធ្វើហ្នឹង ទើបយើងអនុញ្ញាតឱ្យធ្វើនៅទីស្នាក់ការ ឬទីវត្តអារាមផ្សេងៗ មិនមែនយើងមិនឱ្យរៀបចំទេ តែរៀបចំឱ្យត្រូវកន្លែង។ សង្ឃឹមថា ប្អូនៗសមាគមសុទ្ធតែជាអ្នកចេះដឹង អាចយល់ពីផ្លូវច្បាប់ អ៊ីចឹង អ្វីដែលគិថាបំពានច្បាប់ បំពានបម្រាម បំពានការអនុញ្ញាតហ្នឹង គួរកុំធ្វើអីល្អជាង ព្រោះអ្វីដែលយើងធ្វើវាប្រឈមផ្លូវច្បាប់»។
កាលពីថ្ងៃទី១ ខែកក្កដា សមាគមសម្ព័ន្ធនិស្សិតបញ្ញវន្តខ្មែរ បានដាក់លិខិតទៅសាលារាជធានីភ្នំពេញ ដោយស្នើសុំជួបជុំគ្នាចំនួន១០នាក់ ដាក់កម្រងផ្កាជូនវិញ្ញាណក្ខន្ធលោក កែម ឡី នៅស្ថានីយ៍ប្រេងឥន្ធនៈកាល់តិច ជាប់ស្តុបបូកគោនៅថ្ងៃស្អែក ប៉ុន្តែ ការស្នើសុំនេះ ត្រូវសាលារាជធានីភ្នំពេញបដិសេធ ដោយថា ទីតាំងនោះស្ថិតក្រោមការគ្រប់គ្រងរបស់ឯកជន។
លោក កែម ឡី ត្រូវខ្មាន់កាំភ្លើងបាញ់សម្លាប់នៅក្នុងស្តាម៉ាត ស្ថិតក្នុងស្ថានីយ៍ប្រេងឥន្ធនៈកាល់តិច ជាប់នឹងស្តុបបូកគោ កាលថ្ងៃទី១០ ខែកក្កដា ឆ្នាំ២០១៦ ក្រោយពីលោកវិភាគបន្ថែមលើរបាយការណ៍ស៊ើបអង្កេតរបស់អង្គការអន្តរជាតិ GlobalWitness ដែលលាតត្រដាងពីការក្តោបក្តាប់មុខជំនួញរបស់គ្រួសារ«ត្រកូលហ៊ុន»។
បច្ចុប្បន្ន អាជ្ញាធរចាប់ខ្លួនបុរសម្នាក់ប៉ុណ្ណោះ ឈ្មោះ អឿត អាង ហៅ «ជួបសម្លាប់» ដោយកាត់ទោសឱ្យជាប់ពន្ធនាគារមួយជីវិត។
ការបាញ់សម្លាប់លោក កែម ឡី ស្ថិតក្នុងភាពចម្រូងចម្រាស ដែលអតីតមេដឹកនាំបក្សប្រឆាំង លោក សម រង្ស៊ី ចោទរដ្ឋាភិបាលថា ជាអ្នកនៅពីក្រោយឃាតកម្មនេះ។ ប៉ុន្តែ នាយករដ្ឋមន្ត្រីតាមរយៈមេធាវី បានដាក់ពាក្យប្តឹងលោក សម រង្ស៊ី ចំពោះការចោទនេះ ហើយទីបំផុតតុលាការបានកាត់ក្ដីឱ្យលោកនាយករដ្ឋមន្ត្រីជាអ្នកឈ្នះក្ដី៕
