បុរស៣នាក់ត្រូវសមត្ថកិច្ចឃាត់ខ្លួនភ្លាមៗនៅកន្លែងបាញ់សម្លាប់លោក កែម ឡី ខណៈពួកគេព្យាយាមដាក់កម្រងផ្កា រំឭកវិញ្ញាណក្ខន្ធ គម្រប់ខួប៣ឆ្នាំតាមបែបជំនឿសាសនា ។
បុរសដែលសមត្ថកិច្ចឃាត់ខ្លួននេះមាន លោក សួង នាគព័ន្ធ សកម្មជនបរិស្ថាន លោក ជុំ ហួត និងលោក ជុំ ហួ។ ពួកគេត្រូវបានចាប់ខ្លួន ក្រោយព្យាយាមចូលទៅស្ថានីយ៍ប្រេងឥន្ធនៈដើម្បីដាក់កម្រងផ្កាមិនទទួលបានជោគជ័យ ហើយផ្តល់បទសម្ភាសន៍ជាមួយអ្នកសារព័ត៌មាន ទាមទារទៅរដ្ឋាភិបាលឱ្យវែកមុខអ្នកនៅពីក្រោយឃាតកម្មមកផ្តន្ទាទោស។
សមត្ថកិច្ចមួយរូបដែលដឹកនាំកម្លាំងចម្រុះចុះរារាំង លោក ឡេង គឹមហ៊ាន ឱ្យ VOD ដឹងថា វិធានការនេះ ដើម្បីរក្សាសណ្តាប់ធ្លាប់ និងរក្សាសុវត្ថិភាពជូនក្រុមហ៊ុន។
លោក មានប្រសាសន៍ថា៖ «ម្ចាស់ទីតាំងគេមិនឱ្យធ្វើ។ ឥឡូវគេសុំឱ្យដេញចេញទៀតផង ប៉ុន្តែ សមត្ថកិច្ចចេះតែសម្រួលទៅ ព្រោះវារំខានកន្លែងគេរកស៊ីលក់ដូរ។ គេមិនឱ្យធ្វើយើងចេញ អារបៀបណាមក ក៏គេ[សមត្ថកិច្ច] រារាំងដែរ អាហ្នឹង វាចៀសមិនផុតទេ»។
ប្រធានគ្រប់គ្រងផ្នែកអង្កេតនៅអង្គការលីកាដូ លោក អំ សំអាត ដែលឃ្លាំមើលសកម្មភាពនេះ ហៅចំណាត់ការចាប់ឃាត់ខ្លួននេះថា រំលោភសិទ្ធិមនុស្សផ្នែកជំនឿសាសនា ដែលថាមានចែងក្នុងរដ្ឋធម្មនុញ្ញ។
អ្នកឃ្លាំមើលសិទ្ធិមនុស្សរូបនេះហៅចំណាត់ការនេះថា បានប៉ះពាល់កាន់តែខ្លាំងដល់រដ្ឋាភិបាលក្នុងការប្រឹងប្រែងស្តារសិទ្ធិមនុស្សឡើងវិញ តបតាមលក្ខខណ្ឌនៃប្រព័ន្ធអនុគ្រោះពន្ធ EBA របស់សហភាពអឺរ៉ុប ព្រមទាំងធ្វើឱ្យមតិជាតិ និងអន្តរជាតិយល់ថារដ្ឋាភិបាលកំពុងខ្លាចស្រមោលខ្លួនឯង ទាក់ទិនឃាតកម្មលើលោក កែម ឡី នេះ ។
លោកថា៖ «យើងឃើញហើយ កាលពីលោកបណ្ឌិត កែម ឡី ស្លាប់ យើងឃើញប្រជាពលរដ្ឋរាប់លាននាក់ចូលរួមគាំទ្រលោក និងហែហម។ អ៊ីចឹង គាត់ [អាជ្ញាធរ] ខ្លាចអាទិដ្ឋភាពហ្នឹងនៃការគាំទ្រការចូលចិត្តហ្នឹងក្រោកឡើងវិញរាប់លាននាក់ទៅ វាធ្វើឱ្យធ្វើឱ្យមានបញ្ហា។ អាហ្នឹងជាការខ្លាចស្រមោល»។
ព្រះសង្ឃមួយអង្គព្រះនាម យិន រតនសុធាវី បានបង្ហាញការខកព្រះទ័យ ករណីសមត្ថកិច្ចរារាំងការប្រារព្វពិធីបែបសាសនានៅកន្លែងបាញ់សម្លាប់លោក កែម ឡី នេះ។
ឆ្លៀតពេលសមត្ថកិច្ចកំពុងដេញព្រះអង្គមិនឱ្យនិមន្តចូលបរិវេណស្ថានីយ៍ប្រេងឥន្ទនៈនេះ ព្រអង្គអំពាវនាវតាមរយៈអ្នកសារព័ត៌មានទៅរដ្ឋាភិបាលឱ្យបញ្ឈប់សម្លាប់មនុស្សក្រៅប្រព័ន្ធច្បាប់។
លោក កែម ឡី ត្រូវខ្មាន់កាំភ្លើងបាញ់សម្លាប់នៅក្នុងស្តាម៉ាត ក្នុងស្ថានីយ៍ប្រេងឥន្ធនៈកាល់តិចស្តុបបូកគោ រាជធានីភ្នំពេញ កាលថ្ងៃទី១០ ខែកក្កដា ឆ្នាំ២០១៦ ។
ឃាតកម្មនេះ កើតឡើងក្រោយពីលោក កែម ឡី វិភាគបន្ថែមទៅលើរបាយការណ៍ស៊ើបអង្កេតរបស់អង្គការអន្តរជាតិ Global Witness ដែលរបាយការណ៍នោះលាតត្រដាងពីការក្តោបក្តាប់មុខជំនួញរបស់គ្រួសារ«ត្រកូលហ៊ុន»។
៣ឆ្នាំមកនេះ សមត្ថកិច្ចពាក់ព័ន្ធរបស់រដ្ឋាភិបាល រួមទាំងតុលាការផង បានចាប់ខ្លួនបុរសម្នាក់ប៉ុណ្ណោះមកផ្តន្ទាទោស គឺឈ្មោះ អឿតអាង ហៅ «ជួបសម្លាប់» ដោយកាត់ទោសឱ្យជាប់ពន្ធនាគារមួយជីវិត។
យ៉ាងនេះក្ដី កាលពីថ្ងៃអង្គារម្សិលមិញ យុវជនបួននាក់ ក្នុងនោះរួមទាំងយុវជន គង់ រ៉ាយ៉ា ផងដែរ ត្រូវចាប់ខ្លួនក្រោយបង្ហោះសារលើបណ្តាញសង្គម អំពាវនាវលក់អាវយឺតមានរូបលោក កែម ឡី ដែលធ្វើឱ្យពិធីរំឭកខួប៣ឆ្នាំនៃការបាញ់សម្លាប់លោក កែម ឡី ឆ្នាំនេះ យុវជន៧នាក់ ត្រូវចាប់ខ្លួន៕
