រដ្ឋាភិបាលក្រុងប៉េកាំង អំពាវនាវឲ្យរដ្ឋាភិបាលក្រុងវ៉ាស៊ីនតោនលុបចោលជាបន្ទាន់នូវការលក់គ្រឿងសព្វាវុធទៅឲ្យកោះតៃវ៉ាន់។
ការអំពាវនាវរបស់ចិន ធ្វើឡើងក្រោយក្រសួងការបរទេសអាមេរិកបានអនុម័តយល់ព្រមលក់សព្វាវុធដល់កោះតៃវ៉ាន់។
អ្នកនាំពាក្យក្រសួងការបរទេសចិន លោក Geng Shuang បានថ្លែងក្នុងសន្និសីទសារព័ត៌មានកាលពីម្សិលមិញថា ការដែលសហរដ្ឋអាមេរិកលក់សព្វាវុធទៅឲ្យតៃវ៉ាន់ជាការរំលោភច្បាប់អន្តរជាតិ និងបទដ្ឋានជាមូលដ្ឋាននៃទំនាក់ទនងអន្តរជាតិយ៉ាងធ្ងន់ធ្ងរ។ លោក បន្ថែមថា វាក៏បំផ្លាញគោលនយោបាយចិនតែមួយ ជាការជ្រៀតជ្រែកកិច្ចផ្ទៃក្នុង និងប៉ះពាល់ដល់អធិបតេយ្យភាព និងសន្តិសុខរបស់ចិន។
លោក Geng Shuang ថាចិនប្រឆាំងយ៉ាងខ្លាំងចំពោះទង្វើរបស់អាមេរិកបែបនេះ ព្រោះថា តៃវ៉ាន់ជាផ្នែកមួយរបស់ចិន ហើយអាមេរិកត្រូវតែគោរពឲ្យបាននូវគោលនយោបាយចិនតែមួយ។ លោក បន្ថែមថា ចិនស្នើឲ្យអាមេរិកបញ្ឈប់ជាបន្ទាន់នូវការលក់អាវុធទៅឲ្យតៃវ៉ាន់ និងបញ្ចប់ទំនាក់ទំនងយោធាជាមួយដែនកោះមួយនេះ បើមិនចង់បំផ្លាញទំនាក់ទំនងរវាងប្រទេសទាំងពីរក៏ដូចជា ដើម្បីរក្សានូវសន្តិភាព និងស្ថិរភាពនៅច្រកសមុទ្រតៃវ៉ាន់។
អ្នកនាំពាក្យក្រសួងការបរទេសអាមេរិក លោកស្រី Morgan Ortagus បានឆ្លើយតបទៅនឹងការព្រួយបារម្ភរបស់ភាគីចិន ក្នុងសន្និសារព័ត៌មានកាលពីម្សិលមិញ ថា ការលក់អាវុធទៅឲ្យតៃវ៉ាន់ គឺដើម្បីរក្សាសន្តិភាព និងស្ថិរភាពនៅច្រកសមុទ្រតៃវ៉ាន់ និងនៅក្នុងតំបន់។ លោកស្រី បញ្ជាក់ថា អាមេរិកមិនមានការផ្លាស់ប្តូរណាមួយលើគោលនយោបាយចិនតែមួយនោះទេ។
លោកស្រី Morgan Ortagus ថា ការលក់សព្វាវុធឲ្យតៃវ៉ាន់នេះគឺធ្វើឡើងស្របតាមច្បាប់ស្តីពីទំនាក់ទំនងជាមួយតៃវ៉ាន់។ អ្នកនាំពាក្យក្រសួងការបរទេសអាមេរិករូបនេះ អះអាងថា តាមច្បាប់នេះ តម្រូវឲ្យសហរដ្ឋអាមេរិកជួយតៃវ៉ាន់ក្នុងការការពារខ្លួន។
ក្រសួងការបរទេសអាមេរិក កាលពីថ្ងៃចន្ទ បានសម្រេចលក់គ្រឿងសព្វាវុធទំនើបៗមួយចំនួនដែលមានតម្លៃប្រមាណជាជាង២ពាន់លានដុល្លារទៅឲ្យកោះតៃវ៉ាន់។ តាមការចុះផ្សាយរបស់វិទ្យុសម្លេងសហរដ្ឋអាមេរិក គ្រឿងសព្វាវុធទាំងនោះរួមមាន រថពាសដែកប្រភេទ 108 M1A2T Abrams កាំភ្លើងស្ពាយសម្រាប់បាញ់ សព្វាវុធធំៗចំនួន២៥០គ្រឿង និងកាំភ្លើងធំសម្រាប់បាញ់រថពាសដែក ប្រមាណ១៥០០គ្រឿង៕
