ព្រះរាជអាជ្ញារងសាលាដំបូងរាជធានីភ្នំពេញ លោក រៀល សុភិន បានចោទប្រកាន់លោក គង់ រ៉ៃយ៉ា ពីបទញុះញង់ឱ្យប្រព្រឹត្តបទឧក្រិដ្ឋជាអាទិ៍ ក្រោយលោកបោះពុម្ពអាវលក់ភ្ជាប់រូបលោក កែម ឡី និងសារមួយចំនួន។
នេះបើតាមការបញ្ជាក់ពីលោក សំ សុគង់ មេធាវីការពារក្តីឲ្យលោក គង់ រ៉ៃយ៉ា។
លោក សំ សុគង់ មានប្រសាសន៍ថា ព្រះរាជអាជ្ញាបានចោទប្រកាន់ពីបទញុះញង់ ដោយសារ លោកបានបោះពុម្ពអាវមានដាក់ឈ្មោះលោក កែម ឡី និងពាក្យស្លោកនៅជាប់លើអាវនោះ។
លោកថា៖ «គេផ្ដោតទៅលើការបោះពុម្ពអាវ ហើយទី២ គេផ្ដោតទៅលើការដាក់រូបលោក កែម ឡី ហើយនិងខ្លឹមសារខាងក្រោយអាវណាស់ ប៉ុន្តែ ខ្លឹមសារខាងក្រោយអាវរបស់គាត់ហ្នឹង មិនមែនជាគំនិតរបស់គាត់ទេ គឺជាគំនិតរបស់លោកទេ មានន័យថា គាត់សម្លងចេញពីពាក្យរបស់លោក កែម ឡី នៅពេលគាត់នៅរស់»។
លោកបន្តថា បន្ទាប់ពីចោទប្រកាន់ នៅរសៀលនេះ ចៅក្រមស៊ើបសួរនឹងបន្តនីតិវិធីសាកសួរបន្ថែមទៀត។
ប្រាប់អ្នកសារព័ត៌មាន បន្ទាប់ចេញពីតុលាការ នៅថ្ងៃនេះ លោក គង់ រ៉ៃយ៉ា ចាត់ទុកការចោទប្រកាន់នេះថា ជារឿងអយុត្តិធម៌ ប៉ុន្តែ លោកមិនកត់ស្លុតឡើយ ដោយថា អ្នកដែលចាប់ខ្លួនលោកទេកំពុងភ័យ។
លោកថា៖ «វាជារឿងអយុត្តិធម៌ និងជារឿងហួសហេតុបំផុត ហើយខ្ញុំចង់បញ្ជាក់ថា អ្នកដែលធ្វើបាបខ្ញុំគឺជាមនុស្សដែលកំពុងតែដេកភ័យ។ ចំណែកខ្ញុំគឺសប្បាយចិត្ត។ អ្នកធ្វើបាបខ្ញុំកំពុងដេកភ័យ ចំណែកខ្ញុំគ្មានការព្រួយបារម្ភសោះឡើយ»។
ប្រធានផ្នែកស៊ើបអង្កេតនៃអង្គការលីកាដូ លោក អំ សំអាត ចាត់ទុកការចោទនោះថា មិនសមហេតុផលឡើយ ដោយថា ខ្លឹមសារដែលលោក គង់ រ៉ៃយ៉ា សរសេរលើអាវគឺដកស្រង់សម្ដីរបស់លោក កែម ឡី តែប៉ុណ្ណោះ។
លោកមានប្រសាសន៍ថា៖ «ហាក់ដូចជាមានការភ័យខ្លាចស្រមោលនៃលោកបណ្ឌិត កែម ឡី ពីព្រោះគ្រាន់តែអាវដែលមានរូបគាត់ ឬក៏អ្វីដែលបានសរសេរទៅតាមពាក្យរបស់គាត់ ហាក់ដូចជាអាជ្ញាធរគាត់មានការភ័យខ្លាចខ្លាំង។ អាហ្នឹងជាការមួយដែលមានការភ័យខ្លាច ទៅលើស្រមោលទេ ហើយអ្វីដែលសំខាន់ យើងឃើញថា នៅពេលដែលមានឃាតកម្មលើលោកបណ្ឌិត កែម ឡី ឃើញមានអ្នកគាំទ្រ និងអ្នកដែលទាមទាររកយុត្តិធម៌ ដែលស្រឡាញ់លោកបណ្ឌិត កែម ឡី រាប់លាននាក់ដែលនាំឱ្យមានការភ័យ»។
លោកបន្តថា ការចោទប្រកាន់បែបនេះ នឹងធ្វើឱ្យតុលាការទទួលរងការរិះគន់ពីប្រជាពលរដ្ឋកាន់តែច្រើន។
កាលពីថ្ងៃទី៩ ខែកក្កដា សមត្ថកិច្ចបានចាប់ខ្លួនយុវជន៤នាក់ ក្នុងមានលោក គង់ រ៉ៃយ៉ា និងភរិយារបស់លោក ប្អូនបង្កើតឈ្មោះ គង់ លក្ខិណា និងប្អូនថ្លៃឈ្មោះ សុខ ឌីណា។ ប៉ុន្តែ សមត្ថកិច្ចបានដោះលែង៣នាក់វិញ ដោយទុកតែលោក គង់ រ៉ៃយ៉ា ម្នាក់។
ការចាប់ខ្លួនលោក គង់ រ៉ៃយ៉ា ធ្វើឡើងបន្ទាប់ពីលោកបានបង្ហោះលក់អាវដែលមានរូបលោកបណ្ឌិត កែម ឡី នៅលើទំព័រហ្វេសប៊ុក កាលពីថ្ងៃទី៨ ខែកក្កដា ដោយអាវមួយលក់ក្នុងតម្លៃជាង៥ដុល្លារ។
បើតាមខ្លឹមសារអាវសរសេរថា «បើអ្នកមិនធ្វើអ្វីសោះ គង់តែនឹងរងគ្រោះដែរ គ្រាន់តែមិនទាន់ដល់វេនអ្នកប៉ុណ្ណោះ»។
កាលពីម្សិលមិញ សមត្ថកិច្ច ក៏បានចាប់ខ្លួនយុវជនម្នាក់ឈ្មោះ សួង នាគព័ន្ធ ក្រោយពីយុវជនរូបនោះ បានព្យាយាមយកកម្រងផ្កាក្នុងទៅដាក់នៅក្នុងស្តាម៉ាត ស្ថិតក្នុងស្ថានីយ៍ប្រេងឥន្ធនៈកាល់តិច ជាប់នឹងស្តុបបូកគោ ដើម្បីគោរពវិញ្ញាណក្ខន្ធលោក កែម ឡី ។
ទាក់ទិននឹងរឿងនេះ អតីតគណបក្សសង្គ្រោះជាតិ បានថ្កោលទោសចំពោះការចាប់ខ្លួនលោក គង់ រ៉ៃយ៉ា និងលោក សួង នាគព័ន្ធ និងការរារាំងសង្គមស៊ីវិលមិនឱ្យដាក់កម្រងផ្កានៅក្នុងស្តាម៉ាត ស្ថិតក្នុងស្ថានីយ៍ប្រេងឥន្ធនៈកាល់តិច ជាប់នឹងស្តុបបូកគោ កាលពីម្សិលមិញ។
អតីតគណបក្សសង្គ្រោះជាតិ ទាមទារឱ្យអាជ្ញាធរដោះលែងអ្នកទាំងពីរឱ្យមានសេរីភាពវិញ ដោយឥតលក្ខខណ្ឌ ដោយថា យុវជនទាំងពីរនាក់នេះ មិនបានប្រព្រឹត្តបទល្មើសអ្វីដូចការចោទប្រកាន់ឡើយ។
លោក គង់ រ៉ៃយ៉ា ធ្លាប់ជាប់ពន្ធនាគារម្ដងរួចមកហើយកាលពីថ្ងៃទី១៥ ខែមីនា ឆ្នាំ២០១៦ ដោយតុលាការចោទពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» បន្ទាប់ពីលោកបានប្រកាសឱ្យមហាជនចូលរួមធ្វើបដិវត្តន៍ពណ៌តាមបណ្ដាញសង្គមជាមួយនឹងរូបលោក៕