តុលាការសម្រេចឃុំខ្លួនយុវជនម្នាក់ទៀតពាក់ព័ន្ធចូលរួមប្រារព្វខួបឃាតកម្មលោក កែម ឡី

សាលាដំបូងរាជធានីភ្នំពេញ សម្រេចឲ្យឃុំខ្លួនយុវជនម្នាក់ទៀត គឺលោក សួង នាគព័ន្ធ នៅពន្ធនាគារព្រៃស បណ្តោះអាសន្នរង់ចាំសវនាការ ។

លោក សំ សុគង់ ជាមេធាវីការពារក្តី ឲ្យ VOD នៅថ្ងៃសុក្រនេះ ថា កូនក្តីលោក គឺ សួង​ នាគព័ន្ធ ត្រូវតុលាការសម្រចឲ្យឃុំខ្លួន ចោទថា ញុះញង់ឱ្យប្រព្រឹត្តបទល្មើសជាអាទិ៍ តាមបញ្ញត្តិមាត្រា៤៩៥នៃក្រមព្រហ្មទណ្ឌ។

លោកថា៖ «ចំពោះខ្ញុំជាមេធាវី ចំពោះការចោទប្រកាន់នេះ បើពាក់ព័ន្ធនឹងអង្គហេតុមិនចូលទៅក្នុងបទល្មើសញុះញង់ទេ ព្រោះកូនក្តីខ្ញុំចូលការ៉ាសាំងហ្នឹង ក្នុងគោលបំណងដើម្បីចូលរួមប្រារព្វខួបនៃឃាតកម្មលោក កែម ឡី ហើយគាត់ថា គាត់ជាក្មួយធម៌លោក កែម ឡី»។

យុវជន សួង នាគព័ន្ធ ត្រូវសមត្ថកិច្ចចាប់ខ្លួន ជិតស្ថានីយ៍ប្រេងឥន្ធនៈកាល់តិច ជាប់ស្តុបបូកគោ រាជធានីភ្នំពេញ នាថ្ងៃទី១០ ខែកក្កដា ខណៈលោកព្យាយាមចូលរួមប្រារព្វខួម៣ឆ្នាំនៃការបាញ់សម្លាប់លោក កែម ឡី និងបានចែកខិតប័ណ្ណសរសេរថា «បញ្ឈប់សម្លាប់មនុស្សក្រៅប្រព័ន្ធច្បាប់»។

ខួបគម្រប់៣ឆ្នាំនៃឃាតកម្មលោក កែម ឡី នៅឆ្នាំនេះ​ យុវជន គង់ រ៉ៃយ៉ា ក៏ត្រូវតុលាការបង្គាប់ឲ្យឃុំខ្លួននៅពន្ធនាគារព្រៃស ចោទពីបទញុះញង់ដូចគ្នា ក្រោយពីយុវជនរូបនេះ អំពាវនាវលើបណ្តាញសង្គម លក់អាវយឺតមានរូបលោក កែម ឡី។