អាជ្ញាធរខេត្តរតនគិរី បានតម្រូវឲ្យអ្នកការសែតទាំងអស់ដែលចុះទៅយកព័ត៌មានក្នុងភូមិសាស្រ្តខេត្តនេះ ត្រូវជូនដំណឹងទៅមន្ទីរសារព័ត៌មានខេត្តជាមុនសិន ដោយថា ដើម្បីចូលរួមអនុវត្តច្បាប់ស្តីពីរបបសារព័ត៌មាន និងរក្សាសន្តិសុខសណ្តាប់ធ្នាប់សង្គម។
ក្នុងសេចក្តីជូនដំណឹងចុះថ្ងៃទី៥ ខែកក្កដា ឆ្នាំ២០១៩ ដែល វី.អូ.ឌី ទើបទទួលបានថ្ងៃនេះ រដ្ឋបាលខេត្តរតនគិរីឲ្យដឹងថា កន្លងមក មានជនខិលខូចមួយចំនួនបានប្រើប្រាស់កាតអ្នកសារព័ត៌មាន និងលិខិតបញ្ជាបេសកកម្មរបស់ចាងហ្វាងកាសែតហួសសុពលភាព រួមទាំងឯកសារផ្សេងៗមិនត្រឹមត្រូវ ដោយយកទៅប្រើប្រាស់ខុសច្បាប់ ប្រាសចាកក្រមសីលធម៌ និងវិជ្ជាជីវៈ ដើម្បីទាញយកផលប្រយោជន៍ផ្ទាល់ខ្លួន។
សេចក្តីជូនដំណឹងដដែលនេះ រដ្ឋបាលខេត្តរតនគិរី បានស្នើទៅភ្នាក់ងារសារព័ត៌មានគ្រប់អង្គភាពទាំងអស់ត្រូវបង្ហាញអត្តសញ្ញាណ និងគោលបំណងឲ្យបានច្បាស់លាស់ទៅមន្ទីរព័ត៌មានខេត្តរតនគិរី ដោយថា ដើម្បីពង្រឹងការអនុវត្តតួនាទីប្រកបដោយក្រមសីលធម៌វិជ្ជាជីវៈ គោរពសិទ្ធិមនុស្ស និងប្រកាន់ខ្ជាប់នូវលិទ្ធិប្រជាធិបតេយ្យ។
អភិបាលខេត្តរតនគិរី លោក ថង សាវុន សុំមិនឆ្លើយប្រាប់តាមទូរសព្ទទេ ដោយលោកសុំឲ្យទៅជួបលោកផ្ទាល់ដល់ខេត្តភាគឦសានមួយនេះ។
លោកបន្ថែមថា៖ «ខ្ញុំម៉េចដឹងថា បងជាអ្នកសារព័ត៌មាននៅ វី.អូ.ឌី? អឺអាម៉េច? ឥលូវខ្ញុំសុំអត់បញ្ជាក់ទេ ព្រោះខ្ញុំអត់បានមើលឃើញមុខបងផង។ បើបងអត់បានបង្ហាញអីបញ្ជាក់ឲ្យខ្ញុំឃើញផង គ្រាន់តែតេទូរសព្ទសួរខ្ញុំ ហើយលេខ០២៣ទៀត។ អីចឹង មានការអីឡើងមកសួរខ្ញុំដល់ខេត្តផ្ទាល់»។
អ្នកនាំពាក្យក្រសួងព័ត៌មាន លោក ផុស សុវណ្ណ បានគាំទ្រនឹងវិធានការរបស់អាជ្ញាធរខេត្តរតនគិរីដែលតម្រូវឲ្យជូនដំណឹង មុនចុះយកព័ត៌មានតំបន់ណាមួយក្នុងដែនសមត្ថកិច្ចរបស់ខ្លួន ដោយថា កន្លងមក ក្រសួងធ្លាប់ណែនាំទៅអាជ្ញាធរខេត្តនានាឲ្យធ្វើបែបនេះ ដើម្បីទប់ស្កាត់ជនខិលខូចមួយចំនួនដែលបន្លំខ្លួនធ្វើជាអ្នកសារព័ត៌មានទៅធ្វើរឿងមិនល្អ និងអ្នកព័ត៌មានមួយចំនួនដែលអនុវត្តការងារមិនគោរពវិជ្ជាជីវៈ។
អ្នកនាំពាក្យរូបនេះទទួលស្គាល់ថា ក្នុងច្បាប់ស្តីពីរបបសារព័ត៌មានពុំបានកំណត់ឲ្យធ្វើបែបនេះទេ ប៉ុន្តែ ការធ្វើបែបនេះក៏ប៉ះពាល់ដល់សិទ្ធិទទួលបានព័ត៌មានរបស់អ្នកការសែតដែរ ផ្ទុយទៅវិញលោកថា ការតម្រូវឲ្យអ្នកការសែតជូនដំណឹងទៅអាជ្ញាធរមុននឹងចុះយកព័ត៌មានក្នុងភូមិសាស្ត្ររបស់ខ្លួននោះ គឺជួយសម្រួល និងបានធានាសុវត្ថិភាពសម្រាប់អ្នកសែតទៅវិញទេ។
លោក បន្ថែមថា៖ «ក្រសួងធ្លាប់ជម្រាបជូនទៅខេត្តធ្វើអីចឹងដែរ ព្រោះវាមានបញ្ហាប្រឈមមួយចំនួនដែរ ដោយសារអ្នកព័ត៌មានចូលទៅ អត់គោរពវិជ្ជាជីវៈ គាត់មិនមែនជាអ្នកព័ត៌មានទេ។ អីចឹង ដើម្បីឲ្យអ្នកសារព័ត៌មានគ្រប់គ្រងបាន គួរតែចូលជម្រាបជូនដំណឹងមន្ទីរព័ត៌មានខេត្តបន្តិចទៅថា ខ្ញុំចុះទៅធ្វើសកម្មភាពក្នុងខេត្តនេះ ព្រោះអ្នកសារព័ត៌មានបរទេសមួយចំនួនដែលចូលមកយកព័ត៌មានក្នុងប្រទេសយើង ក៏គេធ្វើអីចឹងដែរ គាត់ត្រូវមកសុំលិខិត ឬបង្កាន់ដៃដែរ»។
និពន្ធនាយកកាសែតខ្មែរថាមស៍ លោក ម៉ៃ ទិត្យថារ៉ា មានប្រសាសន៍ថា ការចេញសេចក្តីណែនាំរបស់អាជ្ញាធរខេត្តរតនគិរីដែលតម្រូវឲ្យអ្នកកាសែតជូនដំណឹងមុន និងប្រាប់ពីគោលបំណងមុនទៅយកក្នុងខេត្តនេះ គឺធ្វើឲ្យប៉ះពាល់ដល់សិទ្ធិសេរីភាព និងការធ្វើការងាររបស់អ្នកសារព័ត៌មានវិជ្ជាជីវៈ។
លោក បន្ថែមថា៖ «ការធ្វើបំរាមនេះ គឺវាធ្វើឲ្យប៉ះពាល់ដល់សិទ្ធិសេរីភាពអ្នកសារព័ត៌មានដោយសារអ្នកសារព័ត៌មានគាត់មានសិទ្ធិធ្វើរឿងរបស់គាត់។ ឧទាហរណ៍ គាត់ធ្វើស៊ើបអង្កេតណាមួយ អីចឹងគាត់ត្រូវធ្វើរឿងរបស់គាត់។ ហើយយើងអ្នកសារព័ត៌មាន មិនកំណាញ់ទេនៅពេលដែលគាត់ចុះជួបជាមួយអភិបាលខេត្ត ឬមន្ត្រីណាមួយ គាត់តែងតែបង្ហាញហើយថាគាត់មកពីស្ថាប័ណា មានគោលបំណងធ្វើអី ប៉ុន្តែ ការចេញលិខិតឲ្យអ្នកការសែតជូនដំណឹងជាមុននេះ វាជាការរឹតត្បិតចំពោះអ្នកសារព័ត៌មាន»។
យោងតាមរបាយការណ៍ស្តីពី «សន្ទស្សន៍សេរីភាពសារព័ត៌មានពិភពលោក ឆ្នាំ២០១៩» ដែលចេញផ្សាយ កាលពីខែមេសាកន្លងទៅ អង្គការអ្នករាយការណ៍គ្មានព្រំដែន Reporters without Border ដែលជាអង្គការមានមូលដ្ឋាននៅប្រទេសបារាំង បានទម្លាក់ចំណាត់ថ្នាក់កម្ពុជានៅលេខរៀង ១៤៣ ក្នុងចំណោមប្រទេស១៨០ លើពិភពលោក។
ពិន្ទុនេះបង្ហាញថា កម្ពុជាធ្លាក់ចុះមួយលេខទៀត បើធៀបនឹងឆ្នាំ២០១៨ ដែលកម្ពុជាទទួលបានចំណាត់ថ្នាក់១៤២ និងធ្លាក់ចុះដល់ទៅ ១១លេខ បើធៀបនឹងឆ្នាំ២០១៧ ដែលកម្ពុជាមានចំណាត់ថ្នាក់ ១៣២ ក្នុងចំណោមប្រទេស ១៨០។
ក្នុងរបាយការណ៍ដដែលនេះ អង្គការអ្នករាយការណ៍គ្មានព្រំដែន បានកត់សំគាល់អំពីភាពស្ងៀមស្ងាត់នៅក្នុងការបោះឆ្នោតឆ្នាំ២០១៨ ក្រោយរដ្ឋាភិបាលបិទស្ថានីយ៍វិទ្យុប្រមាណ ៣០ កាលពីអំឡុងបោះឆ្នោតឃុំ-សង្កាត់ ឆ្នាំ២០១៧៕