លោកស ខេង បញ្ជាឱ្យឃាត់ខ្លួនអ្នកជិះម៉ូតូមិនពាក់មួក

រដ្ឋមន្ត្រីក្រសួងមហាផ្ទៃបញ្ជាទៅមន្ត្រីថ្នាក់ក្រោមឱ្យឃាត់ខ្លួនទុកអ្នកជិះម៉ូតូមិនមានមួកសុវត្ថិភាព ដើម្បីធានាមិនឱ្យមានគ្រោះថ្នាក់ដល់អ្នកដំណើរ។​

ក្នុងពិធីមួយនៅខេត្តព្រៃវែងនៅថ្ងៃនេះ លោក ស ខេង បញ្ជាដល់នគរបាលចាត់វិធានការឃាត់ខ្លួនអ្នកមិនពាក់មួកសុវត្ថិភាពរហូត អ្នកដំណើរនោះទាក់ទងឱ្យអ្នកផ្សេងយកមួកឱ្យទើប អនុញ្ញាតឱ្យធ្វើដំណើរបន្ត។​

លោក ស ខេង៖«បើអ្នកជិះម៉ូតូហើយអ្នកមិនពាក់មួកប៉ូលីសមានភារកិច្ចឃាត់អ្នកមិនឱ្យធ្វើដំណើរទៅមុខទៀត។សូមឱ្យអ្នកទាក់ទងរបៀបណា វិធីណាក៏ដោយយកមួកមកពាក់សិន បានឱ្យទៅទៀត។​»

លោក ស ខេងលើកឡើងថា ៨០ភាគរយនៃអ្នកស្លាប់ដោយសារគ្រោះថ្នាក់ចរាចរណ៍គឺអ្នកជិះម៉ូតូ ហើយ៨០ភាគរយនៃចំនួននេះទៀតគឺអ្នកមិនពាក់មួកសុវត្ថិភាព។​

លោក ស ខេង លើកឡើងទៀតថា រយៈពេល៦ខែនៃឆ្នាំ២០១៩នេះ អ្នកស្លាប់ដោយសារគ្រោះថ្នាក់ចរាចរណ៍កើនឡើងជាង១០០នាក់ បើប្រៀបធៀបឆ្នាំមុន។​

របាយការណ៍ក្រសួងមហាផ្ទៃបង្ហាញថា រយៈពេល៦ខែឆ្នាំ២០១៨ គ្រោះថ្នាក់ចរាចរណ៍បានសម្លាប់មនុស្សអស់៩៣០នាក់។​