ស្ថានទូតសហរដ្ឋអាមេរិកប្រចាំនៅកម្ពុជា បានសម្ដែងក្ដីបារម្ភចំពោះការរឹតត្បិតកាន់តែខ្លាំងទៅលើសេរីភាពនៃការជួបជុំដោយសន្តិវិធីពីសំណាក់រដ្ឋាភិបាលកម្ពុជា បន្ទាប់ពីយុវជន ២នាក់ ត្រូវបានសមត្ថកិច្ចចាប់ខ្លួនអំឡុងពេលពួកគេចូលរួមរំឭកខួបការបាញ់សម្លាប់អ្នកវិភាគដ៏ល្បីឈ្មោះមួយរូប។
យុវជន គង់ រ៉ៃយ៉ា និង សួង នាគព័ន្ធ ត្រូវបានសមត្ថកិច្ចចាប់ខ្លួនកាលពីថ្ងៃទី១០ ខែកក្កដា ចំថ្ងៃដែលពួកគេរំឭកខួបមរណភាពលោកបណ្ឌិត កែម ឡី ដែលត្រូវបានខ្មាន់កាំភ្លើងបាញ់សម្លាប់នៅថ្ងៃនោះកាលពី ៣ឆ្នាំមុន។ យុវជនទាំង ២រូបនេះ ត្រូវបានតុលាការរាជធានីភ្នំពេញចោទពីបទ «ញុះញង់ឲ្យប្រព្រឹត្តបទល្មើសជាអាទិ៍»។
ប៉ុន្តែ ក្នុងសេចក្ដីថ្លែងការណ៍របស់ខ្លួននៅថ្ងៃនេះ ស្ថានទូតអាមេរិក បានចាត់ទុកការចាប់ខ្លួន និងចោទប្រកាន់ទៅលើមនុស្សទាំង ២រូបនេះ មានចេតនានយោបាយ និងជាការរឹតត្បិតសេរីភាពនៃការបញ្ចេញមតិ និងការជួបជុំ។
ស្ថានទូតអាមេរិក បានរៀបរាប់លើសេចក្ដីថ្លែងការណ៍នោះថា៖ «យើងស្នើឱ្យរដ្ឋាភិបាលកម្ពុជាដកចេញនូវការរឹតត្បិតហួសហេតុលើសេរីភាពនយោបាយ លើពលរដ្ឋគ្រប់រូបនៅកម្ពុជា និងស្នើឱ្យមានការដោះលែងអ្នកទាំងឡាយ ដែលត្រូវបានឃុំឃាំងតាមអំពើចិត្ត និងខុសច្បាប់ ព្រមទាំងលើកកំពស់សិទិ្ធមនុស្ស និងសេរីភាពជាមូលដ្ឋាន»។
អ្នកនាំពាក្យក្រសួងយុត្តិធម៌ លោក ជិន ម៉ាលីន បានចាត់ទុកសេចក្ដីថ្លែងការណ៍ស្ថានទូតអាមេរិកនោះថា គ្មានឥទ្ធិពលអ្វីទៅលើសេចក្ដីសម្រេចចិត្តរបស់តុលាការកម្ពុជាឡើយ។ លោកបន្តថា ការចាប់ខ្លួននេះ ជាវិធានការច្បាប់របស់កម្ពុជា ដើម្បីរក្សាស្ថិរភាពសង្គមនៅកម្ពុជា។
លោក ជិន ម៉ាលីន ប្រាប់ថា៖ «បើសហរដ្ឋអាមេរិកចង់ជួយពួកនេះ គឺអាមេរិកអាចសហការផ្ដល់ជំនួយផ្នែកច្បាប់ដល់ពួកគេ ការពារក្ដីក្នុងដំណើរការនីតិវិតុលាការ ដើម្បីបង្ហាញថា ពួកគេមិនមានពិរុទ្ធដូចការចោទ ឬមួយសហរដ្ឋអាមេរិកប្រាប់អង្គការចាត់តាំងដែលនៅពីក្រោយក្រុមទាំងអស់នេះ ដែលធ្វើការញុះញង់ឱ្យក្រុមទាំងអស់នេះបង្កចលាចលប្រសើរជាង ជាជាងចេញសេចក្ដីថ្លែងការណ៍ដែលមិនមានមូលដ្ឋានទាំងអស់នេះ»។
ការចាប់ខ្លួនយុវជនទាំងពីររូបនេះ បង្កឱ្យមានប្រតិកម្មជាបន្តបន្ទាប់ពីសំណាក់អង្គការមិនមែនរដ្ឋាភិបាលជាតិ និងអន្តរជាតិ។ នៅចុងសប្ដាហ៍កន្លងទៅ អង្គការសមាគមក្នុងស្រុកជាង ១០០ស្ថាប័ន បានហៅការចាប់ខ្លួននេះជាការរឹតត្បិតសេរីភាពបញ្ចេញមតិ និងសេរីភាពជួបជុំនៅកម្ពុជា ដែលធានាដោយរដ្ឋធម្មនុញ្ញជាច្បាប់កំពូលរបស់ជាតិ។
ចំណែកឯ អង្គការឃ្លាំមើលសិទ្ធិមនុស្ស Human Rights Watch បានជំរុញទៅអាជ្ញាធរកម្ពុជា ឲ្យទម្លាក់ចោលការចោទប្រកាន់ទាំងអស់ និងដោះលែងមនុស្សដែលត្រូវបានចាប់ខ្លួន ដោយសារតែការចូលរួមរំឭកខួប ៣ឆ្នាំនៃអំពើឃាតកម្មលើលោក កែម ឡី។
យុវជន គង់ រ៉ៃយ៉ា ត្រូវបានចាប់ខ្លួនដោយសារផ្សព្វផ្សាយលក់អាវយឺតដែលមានសរសេរសាររំលឹកពីប្រសាសន៍របស់លោកកែមឡី “បើអ្នកមិនធ្វើអ្វីសោះ ក៏គង់នឹងរងគ្រោះដែរ គ្រាន់តែមិនទាន់ដល់វេនអ្នកប៉ុណ្ណោះ”។
ចំណែកឯយុវជន សួង នាគព័ន្ធ ត្រូវចាប់ខ្លួន បន្ទាប់ពីរូបគាត់ចែកខិតប័ណ្ណដែលសរសេរថា «បញ្ឈប់ការសម្លាប់មនុស្សក្រៅប្រព័ន្ធច្បាប់»។
ក្រមស៊ើបសួរនៃសាលាដំបូងរាជធានីភ្នំពេញ បានបង្គាប់ឱ្យឃុំខ្លួនយុវជនទាំងពីរពន្ធនាគារព្រៃសកាលពីសប្ដាហ៍មុន៕
