លោកនាយករដ្ឋមន្រ្តី ហ៊ុន សែន សម្រេចដកហូតដីតំបន់បឹងជើងឯកពីក្រុមហ៊ុន ING Holding របស់ឧកញ៉ា អ៊ឹង ប៊ុនហ៊ូវ ដោយអះអាងថា ក្រុមហ៊ុនមួយនេះ មិនបានអភិវឌ្ឍហេដ្ឋារចនាសម្ព័ន្ធអ្វីនៅលើដីនោះឡើយ។
ក្នុងសេចក្ដីសម្រេចកាលពីថ្ងៃទី២១ ខែឧសភា ដែលវីអូឌីទទួលបាននៅថ្ងៃនេះ រដ្ឋលេខាធិការទីស្ដីការគណៈរដ្ឋមន្ត្រី លោក ឈិត សុខុន បានប្រាប់ទៅរដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ អភិបាលរាជធានីភ្នំពេញ និងខេត្តកណ្ដាល អំពីការសម្រេចដកហូតដីនៅតំបន់បឹងជើងឯកពីក្រុមហ៊ុន ING Holding។
រដ្ឋាភិបាលបានសម្រេចដកហូតសិទ្ធិអភិវឌ្ឍពីក្រុមហ៊ុនរបស់ឧកញ៉ា អ៊ឹង ប៊ុនហ៊ូវ បន្ទាប់ពីរកឃើញថា ក្រុមហ៊ុននេះ មិនបានកសាងហេដ្ឋារចនាសម្ព័ន្ធនៅជុំវិញបឹងជើងឯកនោះឡើយ។
សេចក្ដីសម្រេចនេះ ត្រូវបានធ្វើឡើងទៅតាមចំណាររបស់លោកនាយករដ្ឋមន្ត្រី ហ៊ុន សែន កាលពីពាក់កណ្ដាលខែឧសភាកន្លងមក។
ក្រុមហ៊ុន ING Holding របស់ឧកញ៉ា អ៊ឹង ប៊ុនហ៊ូវ ទទួលបានដីបឹងទំហំជាង ២៥០០ហិកតា នៅភាគខាងត្បូងរាជធានីភ្នំពេញ ដើម្បីអភិវឌ្ឍជាទីក្រុងរណបប្រមូលផ្ដុំទៅដោយលំនៅឋាន និងអគារពាណិជ្ជកម្មចម្រុះបែប៕
