កម្ពុជា ប្រកាសដាក់ឲ្យប្រើប្រាស់ App «Kingdom of Wonder» ជាលើកដំបូង លើប្រព័ន្ធឌីជីថល ដើម្បីព្វផ្សាយគោលដៅទេសចរណ៍ និងទាក់ទាញភ្ញៀវនានាឲ្យកាន់តែខ្លាំង នៅលើទីផ្សារទេសចរណ៍ពិភពលោក។
លើបណ្តាញសង្គមហ្វេសប៊ុករបស់ក្រសួងទេសចរណ៍ចុះផ្សាយនៅថ្ងៃនេះថា កម្ពុជាបានប្រកាសដាក់ឱ្យប្រើប្រាស់ជាផ្លូវការនូវកម្មវិធីទូរស័ព្ទដៃឆ្លាតវៃ ឬហៅថា Mobile Application (App) ថ្មីលើកដំបូង ដែលមានឈ្មោះថា «Kingdom of Wonder» ដើម្បីផ្សព្វផ្សាយពីគោលដៅទេសចរណ៍របស់ខ្លួនតាមប្រព័ន្ធឌីជីថល ទៅកាន់ទីផ្សារទេសចរណ៍ពិភពលោកឲ្យកាន់តែខ្លាំងក្លា ទាក់ទាញ និងមានប្រសិទ្ធិភាពខ្ពស់ថែមទៀត ស្របតាមនិន្នាការថ្មីនៃសាកលលោក នាយុគសម័យបដិវត្តឧស្សាហកម្ម ៤.០។
កម្មវិធីទូរស័ព្ទដៃឆ្លាតវៃ «Kingdom of Wonder» គឺជាបណ្តុំព័ត៌មានទេសចរណ៍សំខាន់ៗរបស់កម្ពុជា ដែលរួមមាន គោលដៅទេសចរណ៍ ព្រឹត្តិការណ៍ទេសចរណ៍ ផែនទីទេសចរណ៍ ជើងហោះហើរ អាកាសធាតុ ភោជនីយដ្ឋាន កន្លែងស្នាក់នៅ មធ្យោបាយធ្វើដំណើរក្នុងស្រុក និងព័ត៌មានសំខាន់ៗដទៃទៀត ដែលផ្តល់ភាពងាយស្រួលក្នុងការស្វែងរកព័ត៌មាន និងគ្រប់ជ្រុងជ្រោយសម្រាប់ភ្ញៀវទេសចរ ដែលមានបំណងមកទស្សនាកម្ពុជា ទាំងពេលបច្ចុប្បន្ន និងទៅអនាគត។
តាមរយៈកម្មវិធីទូរស័ព្ទឆ្លាតវៃខាងលើ ក្រសួងទេសចរណ៍សង្ឃឹមថា ទេសចរជាតិ-អន្តរជាតិ និងក្រុមហ៊ុនទេសចរណ៍ទាំងអស់មានភាពងាយស្រួល ក្នុងការស្វែងរកពត៌មានទេសចរណ៍ ដើម្បីសម្រេចនូវកំណើនទេសចរអន្តរជាតិ ៦.៦លាននាក់ ក្នុងឆ្នាំ២០១៩ និងជាង៧លាននាក់ នៅឆ្នាំ២០២០។
ក្នុងរយៈពេល៦ខែ ឆ្នាំ២០១៩នេះ កម្ពុជាទទួលបានភ្ញៀវទេសចរចំនួនជាង២លាន៨សែននាក់ បើធៀបនឹងរយៈពេលដូចគ្នាកាលពីឆ្នាំ២០១៨ គឺមានការកើនឡើង១១.៤ភាគរយ។ នេះបើតាមការបញ្ជាក់របស់អ្នកនាំពាក្យក្រសួងទេសចរណ៍ លោក តុប សុភ័ក្រ៕