សហរដ្ឋអាមេរិក បានបញ្ជាក់ជំហរថា នឹងនូវតែបន្តគាំទ្រដល់រដ្ឋាភិបាលថៃក្នុងការដើរតួនាទីជាអ្នកដឹកនាំក្នុងតំបន់។
ការប្រកាសគាំទ្ររបស់សហរដ្ឋអាមេរិក ធ្វើឡើងស្របពេលដែលសមាជិកគណៈរដ្ឋមន្រ្តីថ្មីរបស់ថៃចំនួន៣៦នាក់ បានស្បថចូលកាន់តំណែងកាលពីថ្ងៃអង្គារម្សិលមិញ។ រដ្ឋាភិបាលថ្មីនេះ ជារដ្ឋាភិបាលស៊ីវិលដែលកើតឡើងពីការបោះឆ្នោតជាលើកដំបូង ក្រោយក្រុមយោធាធ្វើរដ្ឋប្រហារទម្លាក់លោកស្រី យីងឡាក់ កាលពី៥ឆ្នាំមុន។ ទោះយ៉ាងណាក៏ដោយ ក្រុមអ្នកវិភាគនយោបាយថៃ យល់ថា វប្បធម៌នៃការដឹកនាំរបស់រដ្ឋាភិបាលថ្មីនឹងមិនខុសពីមុននោះទេ ព្រោះថា ថ្នាក់ដឹកនាំភាគច្រើនមិនមែនជាមនុស្សថ្មីនោះឡើយ។
ក្នុងសេចក្តីប្រកាសព័ត៌មានរបស់ក្រសួងការបរទេសអាមេរិកដែលចេញនៅថ្ងៃទី១៦ ខែកក្កដា ប្រទេសមហាអំណាចមួយនេះ បានបញ្ជាក់ថា រដ្ឋាភិបាលក្រុងវ៉ាស៊ីនតោនរង់ចាំធ្វើការជាមួយរដ្ឋាភិបាលក្រុងបាងកកថ្មី ដើម្បីពង្រឹងឲ្យកាន់តែស៊ីជម្រៅថែមទៀតនូវសម្ព័ន្ធភាព និងភាពជាដៃគូរវាងប្រទេសទាំងពីរដែលបានកសាងជាមួយគ្នាជាងពីរសតវត្សមកហើយ។
ក្រសួងការបរទេសអាមេរិក ថាសម្ព័ន្ធភាពប្រទេសទាំងពីរនៅតែរឹងមាំ ហើយសន្យាថា នឹងនៅតែជួយថៃក្នុងការដើរតួនាទីជាអ្នកដឹកនាំក្នុងតំបន់ ក៏ដូចជាជួយគាំទ្រថៃដែលធ្វើជាប្រធានកិច្ចប្រជុំអាស៊ាននៅឆ្នាំនេះផងដែរ។ អាមេរិក ជឿជាក់ថា ចំណងមិត្តភាពរវាងប្រទេសទាំងពីរនឹងកាន់តែរឹងមាំថែមទៀត ដោយសារតែទាំងអាមេរិក និងថៃ គឺមានគោលបំណងរួមក្នុងការរក្សាសន្តិសុខ សន្តិភាព និងការរីកចម្រើនក្នុងតំបន់ឥណ្ឌូ-ប៉ាស៊ីហ្វិក ក៏ដូចជាពិភពលោកទាំងមូលផងដែរ។
សាស្ត្រាចារ្យផ្នែកសិក្សាពីសហគមន៍អាស៊ាននៅសាកលវិទ្យាល័យនរេសួន ប្រទេសថៃ លោក ផូល ឆាំប៊ឺ (Paul Chambers) មានប្រសាសន៍ប្រាប់ VOD តាមសារអេឡិចត្រូនិចថា បើទោះបីក្រោយពេលបោះឆ្នោតនៅថៃ សហរដ្ឋអាមេរិក បានរិះគន់ពីដំណើរ និងស្នើឲ្យស៊ើបអង្កេតពីភាពមិនប្រក្រតីយ៉ាងណាក្តី តែការរិះគន់នេះមានភាពទន់ភ្លន់ជាងករណីនៅកម្ពុជា។
លោក ផូល ឆាំប៊ឺ បន្ថែមថា ការប្រកាសគាំទ្រយ៉ាងពេញទំហឹងលើរដ្ឋាភិបាលថ្មីរបស់ថៃដែលដឹកនាំដោយលោក ប្រាយុទ្ធ នាពេលនេះ វាក៏ពាក់ព័ន្ធនឹងបញ្ហាភូមិសាស្រ្តនយោបាយ និងកំណើនឥទ្ធិពលចិននៅក្នុងតំបន់ផងដែរ។ លោក ថាអាមេរិករិះគន់ធ្ងន់លើកម្ពុជា ដោយសារតែរដ្ឋាភិបាលក្រុងវ៉ាស៊ីនតោនមើលឃើញថា កម្ពុជាបានពឹងផ្អែក និងចូលទាំងស្រុងលើគន្លងរបស់ចិន។
សាស្ត្រាចារ្យផ្នែកសិក្សាពីសហគមន៍អាស៊ាននៅសាកលវិទ្យាល័យនរេសួនរូបនេះ លើកឡើងបន្តថា អាមេរិកយល់ថា នៅតែអាចទាញថៃចូលក្នុងគន្លងរបស់ខ្លួន ហើយចៀសឲ្យឆ្ងាយពីឥទ្ធិពលរបស់ចិន។ លោក បន្តថា សហរដ្ឋអាមេរិកនៅតែចាត់ទុកថៃប្រៀបដូចជាគ្រឿងការពារដ៏សំខាន់មួយដើម្បីទប់ទល់នឹងកំណើនឥទ្ធិពលរបស់ចិននៅក្នុងតំបន់អាស៊ីអាគ្នេយ៍។
ថៃ ជាប្រទេសមួយក្នុងតំបន់អាស៊ានដែលមានទំនាក់ទំនងយ៉ាងស្អិតរមួតជាមួយសហរដ្ឋអាមេរិកអស់រយៈពេលជាច្រើនឆ្នាំមកហើយ។ ប្រទេសទាំងពីរបានភ្ជាប់ទំនាក់ទំនងជាមួយគ្នានៅឆ្នាំ១៨១៨ ហើយបង្កើតទំនាក់ការទូតជាផ្លូវការវាងគ្នានឹងគ្នានៅឆ្នាំ១៨៣៣៕
