អគ្គនាយកនៃអគ្គនាយកដ្ឋានអន្តោប្រវេសន៍ លោក គាត ច័ន្ទថារិទ្ធិ នៅព្រឹកថ្ងៃទី១៧ ខែកក្កដា ថ្លែងប្រាប់អ្នកសារព័ត៌មានថា ជនបរទេសដែលត្រូវបានចាប់ខ្លួនក្នុងសំណុំរឿងយកលុយខុសច្បាប់ចូលកម្ពុជា បានឆ្លើយប្រាប់សមត្ថកិច្ច ពួកគេឈ្នះល្បែងពីដែនដីម៉ាកាវប្រទេសចិន ហើយយកមកស្រុកខ្មែរដើម្បីទិញដី។
ការថ្លែងបែបនេះធ្វើឡើងបន្ទាប់ពីសមត្ថកិច្ចអន្តោប្រវេសន៍នៅកម្ពុជាចាប់បានលុយខុសច្បាប់ចំនួន៧លានដុល្លារ នៅឆ្នាំ២០១៩នេះ ដែលត្រូវនាំចូលដោយជនសង្ស័យ៩នាក់ផ្សេងៗគ្នា។ ជនសង្ស័យទាំងនោះរួមមាន ជនជាតិចិន៧នាក់ និងកូរ៉េខាងត្បូង២នាក់។
លោក គៀត ចាន់ថារិទ្ធិ មានប្រសាសន៍ថា បច្ចុប្បន្ននេះ សមត្ថកិច្ចកម្ពុជាកំពុងសហការជាមួយសមត្ថកិច្ចចិន ដើម្បីស្រាវជ្រាវរកអ្នកដែលពាក់ព័ន្ធក្នុងសំណុំរឿងនាំប្រាក់ខុសច្បាប់ចូលក្នុងទឹកដីកម្ពុជា។ លោកបន្តថា ការដឹកជញ្ជូនប្រាក់ចូលនេះ មានការរៀបចំច្បាស់លាស់ និងមានបំណងពិតប្រាកដណាមួយ តែហេតុផលសំខាន់ដែលជនសង្ស័យឆ្លើយ គឺការយកលុយមករកស៊ីទិញដីធ្លីនៅកម្ពុជា។
លោក គៀត ច័ន្ទថារិទ្ធិ៖ «ការស៊ើបអង្កេតគឺស្វែងរកការពិត បើសិនជាលុយមានប្រភពច្បាស់មិនអីទេ តែបើមិនមានប្រភព វាចូលបទល្មើសលាងសំអាតប្រាក់។ កន្លងទៅ យើងឃើញសង្ស័យ ហើយយើងឆែកឆេរ យើងឃើញ។ គាត់ឆ្លើយដូចគ្នាទាំងអស់ គឺថាមកវិនិយោគមកទិញដីទិញអចលនទ្រព្យដើម្បីវិនិយោគនៅស្រុកយើងណា តែមានករណីចាប់បាននៅសៀមរាប គាត់ថាគាត់ស៊ីឈ្នួលយកលុយឱ្យគេ។»
អនុប្រធានសមាគមអ្នកវាយតម្លៃ និងភ្នាក់ងារអចលនទ្រព្យកម្ពុជា លោក វ៉ន ចាន់ថន មានប្រសាសន៍ថា នៅដើមឆ្នាំ២០១៩នេះ កំណើនជនជាតិចិនជាច្រើនបានមករកស៊ីវិស័យដីធ្លីផ្ទះសំបែងនៅកម្ពុជា ជាមូលហេតុបណ្ដាលឱ្យទីផ្សារដីធ្លីនៅកម្ពុជាកើនតម្លៃ ពិសេសនៅក្រុងព្រះសីហនុ។ ប៉ុន្តែ អ្នកវាយតម្លៃអចលនទ្រព្យរូបនេះបញ្ជាក់ថា ក្រុមហ៊ុនខ្លួនមិនបានសិក្សាស៊ីជម្រៅពីប្រភពថវិការបស់អ្នកវិនិយោគចិន ឬវិនិយោគបរទេសណា ដែលមករកស៊ីនៅកម្ពុជានោះទេ។
ទិន្នន័យវាយតម្លៃ សន្ទស្សន៍ប្រឆាំងនឹងការលាងលុយអន្តរជាតិ នៅទីក្រុង Basel ប្រទេសប៊ែលហ្ស៊ិក ឆ្នាំ២០១៨ ដែលវាយតម្លៃពីកម្រិតហានិភ័យនៃការលាងលុយ និងហិរញ្ញប្បទានភេរវកម្មនៅក្នុងពិភពលោក បានចាត់ចំណាត់ថ្នាក់ប្រទេសកម្ពុជាថា ជាប្រទេសមានហានិភ័យខ្ពស់។ តាមសន្ទស្សន៍ Basel នេះ បានឲ្យដឹងថា ក្នុងចំណោម ១៤៦ប្រទេស កម្ពុជាស្ថិតនៅក្នុងលំដាប់ថ្នាក់ទី៩ សម្រាប់ការលាងលុយកខ្វក់ ដែលឈរទន្ទឹមគ្នាជាមួយប្រទេសអ៊ូហ្គង់ដា និងតង់ហ្សានី។
កាលពីខែមីនាកន្លងទៅ រដ្ឋមន្ត្រីក្រសួងមហាផ្ទៃ លោក ស ខេង បានបង្ហាញក្ដីបារម្ភជាសាធារណៈ ពីសញ្ញានៃកំណើនបទល្មើសលាងលុយនៅកម្ពុជាដែរ។ នៅថ្ងៃទី១១ ខែកក្កដា ឆ្នាំ២០១៩នេះវិញ លោក ស ខេង ក៏បានបញ្ជាក់ថា សមត្ថកិច្ចកំពុងសហការជាមួយខាងសមត្ថកិច្ចហុងកុង ដើម្បីស្រាវជ្រាវចំពោះករណីនាំចូលលុយចូលកម្ពុជា ដើម្បីរកឱ្យឃើញមូលហេតុពិតប្រាកដ ឈានដល់ចាត់វិធានការផ្លូវច្បាប់បង្ក្រាបប្រព័ន្ធបទឧក្រិដ្ឋនេះតែម្ដង៕
