របាយការណ៍រដ្ឋាភិបាល បង្ហាញថា ជនបរទេសដល់ទៅជាង ១៨ម៉ឺននាក់ រស់នៅដោយខុសច្បាប់នៅក្នុងប្រទេសកម្ពុជា ប៉ុន្តែ ភាគច្រើនលើសលុប គឺជាជនអន្តោប្រវេសន៍ជនជាតិវៀតណាម។
របាយការណ៍ដកហូតឯកសារមិនប្រក្រតីកាន់កាប់ដោយជនបរទេស កាលពីថ្ងៃម្សិលមិញនេះ បង្ហាញថា សព្វថ្ងៃនេះ ជនអន្តោប្រវេសន៍ ១១សញ្ជាតិ រស់នៅក្នុងប្រទេសកម្ពុជា រួមមាន វៀតណាម ថៃ ឡាវ ចិន ភូមា ឥណ្ឌូនេស៊ី ម៉ាឡេស៊ី នេប៉ាល់ បង់ក្លាដែស តង់ហ្សានី និងអាឡឺម៉ង់។
ផ្អែកតាមរបាយការណ៍នេះ ជនអន្តោប្រវេសន៍វៀតណាមដែលរស់នៅកម្ពុជា មានចំនួនដល់ទៅ ៩៩ភាគរយ ឬស្មើនឹង ១៨ម៉ឺននាក់ (១៨២,២៤២នាក់) ឬក៏ស្មើនឹងជិត ៥ម៉ឺនគ្រួសារ (៤៩,២៦៦គ្រួសារ)។
ទោះជាយ៉ាងនេះក្ដី រដ្ឋមន្ត្រីមហាផ្ទៃ លោក ស ខេង មានប្រសាសន៍ថា ចំនួនជនអន្តោប្រវេសន៍វៀតណាមនៅកម្ពុជា មានចំនួនតែជាង ៩ម៉ឺននាក់ប៉ុណ្ណោះ។
លោក ស ខេង អះអាងបែបនេះ ដោយសំអាងថា នៅពេលធ្វើជំរឿនរាប់រួច គឺមានជនជាតិវៀតណាម ៥ម៉ឺននាក់ត្រឡប់ទៅប្រទេសវៀតណាមវិញដោយមិនដឹងមូលហេតុ ខណៈខ្លះទៀតត្រូវបានស្រង់តួលេខជាន់គ្នា និងសល់មួយចំនួនទៀតជាប់ពន្ធនាគារ និងចំណាកស្រុកទៅប្រទេសទី៣។
លោកអះអាងថា ចំនួនជនជាតិវៀតណាមចូលមករស់នៅកម្ពុជាខុសច្បាប់ មកពីកត្តាជាច្រើន រាប់តាំងពីភូមិសាស្ត្រ រហូតដល់ភាពអសកម្មរបស់អាជ្ញាធរខ្លួនឯងតែម្តង។
លោក ស ខេង ថ្លែងថា៖ «អ្នកឃោសនាដើម្បីនយោបាយរបស់គណបក្សនយោបាយនោះ យើងប្រៀបធៀបទៅវាខុសគ្នាយ៉ាងម៉េច? មួយលានពីរលាននោះ រកវាមិនឃើញ ទៅរកនៅឯណា? នេះយើងរកទៅឃើញតែប៉ុណ្ណឹង នេះមិនដល់ ១០ម៉ឺនផង។ តាមរយៈការចងក្រងទិន្នន័យបានត្រឹមត្រូវច្បាស់លាស់ជាផ្លូវការ ដែលនេះឧបករណ៍សម្រាប់ជំនាញប្រើប្រាស់សម្រាប់គ្រប់គ្រងជនអន្តោប្រវេសន៍ក្នុងដែនសមត្ថកិច្ចរបស់ខ្លួន បើមិនដូច្នេះទេ វាដូចវែកចក»។
កន្លងទៅ តួលេខជនអន្តោប្រវេសន៍នៅកម្ពុជានេះ តែងក្លាយជាប្រធានបទក្ដៅដែលត្រូវបានលើកឡើងដោយអ្នកនយោបាយកម្ពុជា។ លោក សម រង្ស៊ី ធ្លាប់អះអាងថា ជនជាតិវៀតណាមប្រមាណជិត ១លាននាក់ កំពុងរស់នៅកម្ពុជា តែលោកមិនធ្លាប់បង្ហាញពីរបាយការណ៍សិក្សាស្រាវជ្រាវណាមួយជាក់លាក់នោះឡើយ។
អ្នកវិភាគឯករាជ្យ លោកបណ្ឌិត ឡៅ ម៉ុងហៃ មានប្រសាសន៍ថា មហាជនអាចមានមន្ទិលខ្លះៗ លើចំនួនតួលេខ ដែលបង្ហាញស្ថិតិជនអន្តោប្រវេសន៍នៅកម្ពុជា។ លោកថា ដើម្បីឱ្យមហាជនមានជំនឿ លុះត្រាណាតែមានការសិក្សាស្រាវជ្រាវច្បាស់លាស់ ចងក្រងទិន្នន័យផ្អែកលើភាពពិតជាក់ស្តែង ម្យ៉ាងទៀត អ្នកចងក្រងទិន្នន័យទាំងនោះ ក៏ត្រូវជាក្រុមដែលគួរឱ្យទុកចិត្ត។
លោកបណ្ឌិត ឡៅ ម៉ុងហៃ មានប្រសាសន៍ថា៖ «អាចជួលក្រុមណាមួយឯករាជ្យ ហើយយើងមូលមាត់គ្នាលើសំណួរអីអ៊ីចឹងទៅ ហើយឱ្យគេធ្វើទៅ។ គេមានបទពិសោធន៍មានអីអ៊ីចឹងអាចមានបរទេសធ្វើទៅ។ ទិន្នន័យអីៗហ្នឹងណា អាហ្នឹង គឺតំណាងការពិត។ បើមិនឈរលើមូលដ្ឋានការពិតទេ យើងពិបាកធ្វើការសម្រេច។ អ៊ីចឹងបានគេប្រយ័ត្នប្រយែងណាស់ ហើយសីលធម៌មួយនៃសង្គមជឿនលឿន គឺការពិត»។
របាយការណ៍លទ្ធផលការងារដកហូតឯកសារមិនប្រក្រតីដែលជនបរទេសកាន់កាប់នៅក្នុងប្រទេសកម្ពុជា ឱ្យដឹងថា សមត្ថកិច្ចបានដកហូតឯកសាររដ្ឋបាលមិនប្រក្រតីពីជនបរទេសជាង ៣ ម៉ឺន ៧ពាន់ច្បាប់ ដែលរួមមាន សៀវភៅស្នាក់នៅ អត្តសញ្ញាណប័ណ្ណសញ្ជាតិខ្មែរ លិខិតឆ្លងដែន សំបុត្រកំណើត សេចក្ដីចម្លងសំបុត្រកំណើត សំបុត្រអាពាហ៍ពិពាហ៍។ ឯកសារទាំងនោះ កាន់កាប់ដោយជនបរទេសចំនួន ២០,០៩៣គ្រួសារ ឬស្មើនឹងមនុស្ស ៦៩,៨៨៤នាក់។
អគ្គនាយកនៃអគ្គនាយកដ្ឋានអន្តោប្រវេសន៍ លោក គៀត ច័ន្ទថារិទ្ធិ បញ្ជាក់ថា មន្ត្រីដែលឃុបឃិតផ្ដល់ឯកសារឱ្យជនបរទេសទាំងនេះ មិនត្រូវបានផ្តន្ទាទោសព្រហ្មទណ្ឌឡើយ ប៉ុន្តែ ត្រូវបានដាក់ពិន័យរដ្ឋបាលរួចរាល់ហើយ។ លោកបញ្ជាក់ថា កម្ពុជាបានសម្រេចផ្ដល់ប័ណ្ណស្នាក់នៅអចិន្ត្រៃយ៍ឱ្យជនបរទេស ៨ម៉ឺន ៨ពាន់ ១១២នាក់ ដែលភាគច្រើនលើសលប់ផ្ដល់ទៅឲ្យជនជាតិវៀតណាមចំនួន ៨៧,៧៩៧នាក់។
ក្រសួងមហាផ្ទៃ បានបញ្ឈប់ការទទួលពាក្យស្នើសុំជាជនបរទេសអន្តោប្រវេសនន៍ និងផ្ដល់ប័ណ្ណស្នាក់នៅអចិន្ត្រៃយ៍ចាប់ពីថ្ងៃទី០១ ខែកក្កដា ឆ្នាំ២០១៩តទៅ។
មិនតែប៉ុណ្ណោះ ក្រសួងមហាផ្ទៃក៏បានចេញសេចក្ដីណែនាំមួយ ឱ្យអាជ្ញាធរមូលដ្ឋានចេញលិខិតរដ្ឋបាល និងលិខិតអត្រានុកូលដ្ឋានឱ្យជនដែលមានប្ដី ឬប្រពន្ធជាខ្មែរ កូន និងជនបរទេសអន្តោប្រវេសនន៍។ សេចក្ដីណែនាំនោះ ធ្វើឡើងដើម្បីបើកផ្លូវឱ្យជនទាំងនោះ មានឯកសាររដ្ឋបាលនានាដូចប្រជាពលរដ្ឋខ្មែរដែរ គ្រាន់តែខុសគ្នាត្រង់បញ្ជាក់សញ្ជាតិ និងជនជាតិ៕