រដ្ឋមន្ត្រីក្រសួងមហាផ្ទៃ បានសម្រេចប្រគល់សិទ្ធិដល់នគរបាលគ្រប់លំដាប់ថ្នាក់ ឲ្យត្រួតពិនិត្យលើប្រព័ន្ធបង្ការ និងពន្លត់អគ្គិភ័យនៅតាមការដ្ឋានសំណង់ និងតាមអគារគោលដៅដទៃទៀត។
ក្នុងប្រកាសម្សិលមិញនេះ រដ្ឋមន្ត្រីមហាផ្ទៃ លោក ស ខេង បានផ្ដល់សិទ្ធិឲ្យអគ្គស្នងការនគរបាលជាតិ និងស្នងការដ្ឋាននគរបាលរាជធានី-ខេត្ត នូវសិទ្ធិចុះហត្ថលេខាបញ្ជាក់ទទួលស្គាល់ប្លង់បង្ការអគ្គិភ័យ ចេញលិខិតអនុញ្ញាតឲ្យម្ចាស់សំណង់រុះរើ ជួសជុលកែតម្រូវប្រព័ន្ធអគ្គិភ័យ ចេញលិខិតព្រមាន ចេញបង្កាន់ដៃពិន័យ និងចេញលិខិតផ្អាកបណ្ដោះអាសន្នដល់ផ្នែកណាមួយនៃសំណង់ និងគោលដៅដែលមិនបានបំពេញលក្ខខណ្ឌ និងវិធានការបង្ការ និងពន្លត់អគ្គិភ័យ ឬមិនបានបំពាក់ប្រព័ន្ធបង្ការ និងពន្លត់អគ្គិភ័យ និងមិនមានការបញ្ជាក់ទទួលស្គាល់ ដោយស្ថាប័នជំនាញបច្ចេកទេសដែលក្រសួងមហាផ្ទៃបានទទួលស្គាល់។
អនុក្រឹត្យស្ដីពីចំណាត់ថ្នាក់ សំណង់ និងគោលដៅដែលតម្រូវឲ្យមានប្លង់ប្រព័ន្ធបង្ការ និងពន្លត់អគ្គិភ័យឆ្នាំ២០១៨ បានតម្រូវឲ្យក្រសួងមហាផ្ទៃធ្វើប្រតិភូកម្មអំណាចទៅឲ្យអគ្គស្នងការនគរបាលជាតិ និងស្នងការដ្ឋាននគរបាលរាជធានីតាំងពីពេលនោះផងដែរ តែទើបនឹងឃើញប្រកាសនេះនៅពេលនេះ។
ចំណាត់ថ្នាក់សំណង់តម្រូវឲ្យមានប្រព័ន្ធបង្ការ និងអគ្គិភ័យ ក្នុងអនុក្រឹតចំណាត់ថ្នាក់ សំណង់ឆ្នាំ២០១៨ បានកំណត់សំណង់៥ចំណាត់ថ្នាក់ ដែលមានសំណង់គោលដៅណាដែលងាយឆាបឆេះ សំណង់ក្រសួង ស្ថាប័ន មន្ទីរ អង្គភាពរដ្ឋ គ្រឹះស្ថានសាធារណៈ និងឯកជន សំណង់នៅទីប្រជុំជនដែលមានមនុស្សរស់នៅច្រើន រហូតដល់កំពង់ផែ សំណង់នៅតំបន់ព្រៃភ្នំ ឧស្សាហកម្ម និងការដ្ឋាន និងអាគារពាណិជ្ជកម្មខ្នាតតូច រួមទាំងផ្សារ ជាដើម៕
