រដ្ឋាភិបាលកាណាដាថា ស្ថានទូតខ្លួននៅភ្នំពេញជួយដល់អាជ្ញាធរកម្ពុជាក្នុងការស្រាវជ្រាវរកព័ត៌មានលម្អិតជុំវិញករណីសំរាមប្លាស្ទីកយកពីបរទេសមកចោលនៅខេត្តព្រះសីហនុ។
ឆ្លើយតបតាមអ៊ីម៉ែលប្រាប់វីអូឌីនៅថ្ងៃនេះអ្នកនាំពាក្យក្រសួងបរិស្ថាននិងប្រែប្រួលអាកាសធាតុកាណាដា លោកស្រី Jenn Gearey បញ្ជាក់ថា រដ្ឋាភិបាលកាណាដា បានដឹងពីក្តីកង្វល់ដែលលើកឡើងដោយរដ្ឋាភិបាលកម្ពុជា ហើយក៏បានជួយតាមរយៈស្ថានទូតកាណាដានៅភ្នំពេញដើម្បីស្រាវជ្រាវរកព័ត៌មានលម្អិតជុំវិញបញ្ហានេះ។
ទោះយ៉ាងណាក្នុងសារឆ្លើយតបជាមួយវីអូឌី កាណាដាមិនបញ្ជាក់ថា សំរាមទាំងនេះជារបស់កាណាដា ឬ មិនមែនទេ។
កាលពីថ្ងៃទី១៧ខែកក្កដា ក្រសួងបរិស្ថានកម្ពុជាអះអាងថា សំរាមចំនួន៨៣កុងទឺន័រស្មើនឹង១៦០០តោននេះយកមកពីអាមេរិក និងកាណាដា។កាលពីថ្ងៃទី១៧នោះ ស្ថានទូតសហរដ្ឋអាមេរិកប្រចាំកម្ពុជាបញ្ជាក់ថា ពួកគេក៏បានចាត់ក្រុមការងារស្រាវជ្រាវជុំវិញរឿងនេះដែរ។
លោកស្រី Jenn Gearey បញ្ជាក់ឱ្យដឹងដែរថា រដ្ឋាភិបាលកាណាដាយកចិត្តទុកដាក់ក្នុងការកាត់បន្ថយសំរាមប្លាស្ទីក និងគាំទ្រដល់ការបង្កើតបច្ចេកទេសថ្មីដើម្បីដោះស្រាយបញ្ហាទាំងនេះ។ លោកស្រីបន្តថា រដ្ឋាភិបាលកាណាដា ក៏បានចំណាយលុយ១០០លានដុល្លារសម្រាប់ជួយដល់ប្រទេសផ្សេងៗក្នុងការកែច្នៃសំរាមសម្រាប់ប្រើប្រាស់ឡើងវិញចៀសវាងការកប់ក្នុងដី ចោលក្នុងសមុទ្រ ទន្លេ ឬ បឹងដែលនាំឱ្យប៉ះពាល់ដល់បរិស្ថាន។
លទ្ធផលនៃការស្រាវជ្រាវចុងក្រោយអាជ្ញាធរកម្ពុជារកឃើញហើយផ្សព្វផ្សាយកាលពីថ្ងៃសុក្រម្សិលមិញគឺថា សំរាមទាំងនេះនាំចូលកម្ពុជាតាមរយៈក្រុមហ៊ុនមួយឈ្មោះ ជុងយៀង ប្លាស្ទីក ពាក់ព័ន្ធជាមួយជនជាតិចិន។