អតីតមេដឹកជាន់ខ្ពស់នៃរបបខ្មែរក្រហម លោក នួន ជា ដែលចូលសម្រាកនៅមន្ទីរពេទ្យកាលពីដើមខែនេះ នៅមិនទាន់អាចត្រលប់ទៅមន្ទីរឃុំឃាំងនៃសាលាក្ដីខ្មែរក្រហមវិញនៅឡើយទេ។ នេះបើតាមអ្នកនាំពាក្យសាលាក្ដីខ្មែរក្រហម លោក នេត្រ ភក្ត្រា។
លោក នេត្រ ភក្ត្រា បានឱ្យ VOD ដឹងនៅថ្ងៃនេះថា អតីតប្រធានរដ្ឋសភារបបខ្មែរក្រហម លោក នួន ជា ដែលបានចូលសម្រាកនៅមន្ទីរពេទ្យមិត្តភាពខ្មែរ-សូវៀត កាលពីថ្ងៃទី២ ខែកក្កដា រហូតមកដល់ពេលនេះនៅមិនទាន់អាចចេញពីមន្ទីរពេទ្យវិញនៅឡើយទេ ខណៈលោកមិនអាចបញ្ជាក់ពីស្ថានភាពរបស់លោក នួន ជា នោះទេ ដោយសារជារឿងឯកជនរបស់ជនជាប់ចោទ ។
លោក នេត្រ ភក្ត្រា៖ «ខ្ញុំអត់អាចអត្ថាធិប្បាយអីលើបញ្ហាហ្នឹងទេ ព្រោះបញ្ហាសុខភាពជាបញ្ហាឯកជនរបស់ជនជាប់ចោទ » ។
គិតរហូតមកដល់ថ្ងៃនេះ មានរយៈពេលជាង២០ថ្ងៃហើយដែលលោក នួន ជា ត្រូវបានក្រុមគ្រូពេទ្យនៃសាលាក្តីខ្មែរក្រហម (អ.វ.ត.ក) បញ្ជូនមកព្យាបាល។
យោងតាមការចុះផ្សាយរបស់សារព័ត៌មានក្នុងស្រុក លោក នួន ជា មានដំបៅជាំខ្មៅលើម្រាមជើងទាំងសងខាងដែលបណ្ដាលមកពីវ័យចាស់ជរារបស់គាត់ ធ្វើឲ្យត្បៀតសរសៃមិនអាចឲ្យឈាមរត់មកចិញ្ចឹមដល់ចុងជើងបាន ដែលត្រូវធ្វើការវះកាត់ម្រាមជើងដែលមានដំបៅនោះចោល។
លោក នួន ជា បច្ចុប្បន្នអាយុ៩៣ឆ្នាំ កាលពីចុងឆ្នាំមុន ត្រូវបានសាលាក្ដីខ្មែរក្រហមផ្ដន្ទាទោសជាមួយលោក ខៀវ សំផន ដាក់ពន្ធនាគារអស់មួយជីវិត ក្នុងសំណុំរឿង០០២ វគ្គ០២ ពីការទទួលខុសត្រូវរបស់អ្នកទាំងពីរទៅលើអំពើប្រល័យពូជសាសន៍ និងការរំលោភបំពានសិទ្ធិមនុស្សផ្សេងៗក្នុងពេលដែលខ្មែរក្រហមនៅកាន់អំណាច៕