អាជីវករលក់សាច់ជ្រូកនៅក្នុងរាជធានីភ្នំពេញមួយចំនួន ត្អូញត្អែរថា លក់មិនសូវដាច់នោះទេ ក្រោយពីមានការផ្ទុះជំងឺប៉េស្តជ្រូកអាហ្វ្រិកដែលឆ្លងពីប្រទេសវៀតណាមចូលដល់ទឹកដីកម្ពុជា។
អាជីវករនៅផ្សារទួលគោក អ្នកស្រី ភឿន ស្រអែម បានរៀបរាប់ប្រាប់អ្នកសារព័ត៌មានថា គាត់លក់សាច់ជ្រូកមិនសូវដាច់នោះទេ ដោយសារតែប្រជាពលរដ្ឋមួយចំនួនឃើញព័ត៌មានផ្សព្វផ្សាយតាមទូរទស្សន៍ វិទ្យុ និងបណ្តាញសង្គម មានរូបភាពជ្រូកកើតជំងឺប៉េស្តជ្រូក បណ្តាលឲ្យងាប់។
អ្នកស្រី រៀបរាប់ថា៖ «(ទិញ)តែមួយដុំមក ទិញអស់តែប្រាំមួយម៉ឺន សាច់ជ្រូកលក់មិនអស់ផង […} កាលមុនលក់បានក្រែល លក់បានប្រហែល១០គីឡូដែរ ឆ្អឹងជំនី ឆ្អឹងកាប់»។
អាជីករមួយចំនួនទៀត បានរៀបរាប់ប្រហាក់ប្រហែលគ្នាថា ក្រោយពីកើតជំងឺប៉េស្តជ្រូកអាហ្វ្រិកនេះ ធ្វើឲ្យសេដ្ឋកិច្ចគ្រួសារធ្លាក់ចុះមួយកម្រិត ដោយសារលក់មិនសូវដាច់។
អាជីវករម្នាក់ទៀត នៅម្តុំផ្សារដើមគរ អ្នកស្រី ឈិត គន្ធា បានរៀបរាប់ថា ចាប់ពីកម្ពុជាមានជំងឺប៉េស្តជ្រូកនេះ ធ្វើឲ្យគាត់ពិបាកលក់ដូរ ហើយនាំឲ្យអតិថិជនងាកទៅទិញត្រី និងសាច់គោទៅវិញ ខណៈសាច់ជ្រូកដែលពួកគេធ្លាប់ទិញ ត្រូវបានមើលរំលង។
អាជីវកររូបនោះត្អូញត្អែរថា ក្រោយពីមានជំងឺប៉េស្តជ្រូកអាហ្វ្រិកចូលមកដល់កម្ពុជាបែបនេះ ធ្វើឲ្យសេដ្ឋកិច្ចគ្រួសារពួកគេធ្លាក់ចុះមួយកម្រិត។
អ្នកស្រី ត្អូញត្អែរដូចនេះថា៖ «ប៉ះពាល់ច្រើន អត់មានលុយកន្លែងបង់ឲ្យគេ អត់មានទាំងលុយឲ្យកូនញាំបាយ អត់ទាំងដើមឲ្យគេទៀត បើសិនជាយើងយកមកលក់អត់ដាច់ យើងត្រូវទុកចោល ក្លាស្សេទុក»។
ប្រជាពលរដ្ឋរស់នៅម្តុំផ្សារទូលគោក អ្នកនាង សេង ភក្ត្រា បានដើរចេញពីកន្លែងទិញផ្លែត្រឡាចនិងប្រហិតត្រីឆ្លាត យកទៅស្ល បានរៀបរាប់ថា ក្រោយពីឃើញព័ត៌មានផ្សព្វផ្សាយថា ជំងឺប៉េស្តជ្រូកអាហ្វ្រិកឆ្លងចូលដល់ទឹកដីកម្ពុជាកាលពីពេលថ្មីៗនេះ គាត់សម្រេចចិត្តឈប់ញាំសាច់ជ្រូកមួយរយៈ ដោយសារខ្លាចប៉ះពាល់ដល់សុខភាព។
អ្នកនាងនិយាយដូចនេះថា៖ «ខ្ញុំទិញបន្លែ ប៉ុន្តែ ខ្ញុំស្លជាមួយប្រហិត ស្ងោរជាមួយប្រហិតត្រី សាច់ផ្សេងៗខុសពីសាច់ជ្រូក។ យើងអត់អាចត្រួតពិនិត្យដោយភ្នែកយើងថា ជ្រូកហ្នឹងអត់ភ្នែក យើងថា ជ្រូកហ្នឹងអត់មានជំងឺ ឬអត់ យើងអត់ទុកចិត្ត»។
អ្វីដែលគួរឲ្យកត់សំគាល់ អ្នកនាង សេង ភក្ត្រា បានបញ្ជាក់ថា ក្រោយពីមានជំងឺប៉េស្តជ្រូកនេះ ធ្វើឲ្យត្រីឡើងថ្លៃចន្លោះពី៣០០០រៀល ទៅ៥០០០រៀលថែមទៀតក្នុងមួយគីឡូក្រាម ខណៈសាច់គោនៅរក្សាបាននៅតម្លៃដដែល។
បច្ចុប្បន្ននេះ ក្រសួងកសិកម្មបានប្រកាសថា ខេត្តចំនួន ៥ហើយ បានឆ្លងជំងឺប៉េស្តជ្រូកអាហ្វ្រិកនេះ រួមមាន ខេត្តរតនគិរី ត្បូងឃ្មុំ ស្វាយរៀង តាកែវ និងខេត្តកណ្តាល។
វី.អូ.ឌី មិនអាចសុំការអត្ថាធិប្បាយពីអ្នកនាំពាក្យក្រសួងកសិកម្ម លោក ស្រី វុទ្ធី បានទេ។
ប្រធានសមាគមចិញ្ចឹមសត្វកម្ពុជា លោក ស្រ៊ុន ពៅ មានប្រសាសន៍ថា ដើម្បីទប់ស្កាត់កុំឲ្យមានការចរាចរសាច់ជ្រូកដែលមានជំងឺប៉េស្តជ្រូកលើទីផ្សារ អាជ្ញាធរពាក់ព័ន្ធ ជាពិសេសប្រជាពលរដ្ឋត្រូវពិនិត្យឲ្យបានហ្មត់ចត់មុននឹងទិញយកទៅបរិភោគ។
លោកមានប្រសាសន៍ថា៖ «ទាំងសមាគម ទាំងស្ថាប័នពេទ្យសត្វ ត្រូវអនុវត្តដូចគ្នា។ ទីមួយ អ្នកទិញហូប ចូលទៅផ្សារ គួរតែយើងជ្រើសរើសជ្រូកដែលមានក្រុមហ៊ុនត្រឹមត្រូវ គេធ្វើជីវប្រវតិ្តសុវត្ថិភាពត្រឹមត្រូវ ទីពីរ យើងពិនិត្យត្រា ទីបី យើងគួរតែពិនិត្យមើលស្បែកវាដែរ ប្រសិនបើស្បែកវារលោង ល្អទេ វាមានអូសត្រាទេ មិនបាច់បារម្ភទេ យើងទិញហូបចុះ»។
ក្រសួងកសិកម្ម តែងណែនាំទៅអាជ្ញាធរខេត្តទាំងនោះ ឲ្យចាត់វិធានការទប់ស្កាត់ជាបន្ទាន់ និងហាមមិនឱ្យចរាចរជ្រូក និងផលិតផលមានដើមកំណើតពីសត្វជ្រូកពីកន្លែងផ្ទុះជំងឺទៅកាន់តំបន់ផ្សេងទៀត ជាដើម។
កាលពីថ្ងៃទី១១ ខែកក្កដា ក្រសួងអះអាងថា មានជ្រូកដែលឆ្លងជំងឺប៉េស្តនេះងាប់ និងត្រូវបានសម្លាប់មានជាង ២ពាន់ក្បាលហើយ ដែលក្នុងនោះជិត ៨រយក្បាល ត្រូវបានរដ្ឋាភិបាលយកទៅបំផ្លាញចោល ដែលតម្លៃខាតបង់ខ្ទង់ ៥០ម៉ឺនដុល្លារអាមេរិក៕