ក្រសួងការពារជាតិចិនចេញមុខច្រានចោលជាលើកដំបូងចំពោះការចោទប្រកាន់ថា ប្រទេសនេះរៀបចំបង្កើតមូលដ្ឋានទ័ពនៅកម្ពុជា ដោយបញ្ជាក់ថា ទំនាក់ទំនងកងទ័ពប្រទេសទាំងពីរកន្លងមកគ្រាន់តែជាដៃគូរក្សាសន្តិសុខក្នុងតំបន់ និងពិភពលោកតែប៉ុណ្ណោះ មិនមែនជាសម្ព័ន្ធមិត្តទេ។
អ្នកនាំពាក្យក្រសួងការពារជាតិចិន លោក វ៉ូ ឈាន (Wu Qian) ថ្លែងក្នុងសន្និសីទសារព័ត៌មានផ្សព្វផ្សាយគោលនយោបាយការពារជាតិនៅថ្ងៃនេះ ដោយបញ្ជាក់ថា ទំនាក់ទំនងជាមួយកម្ពុជាគឺជាដៃគូការពារសន្តិសុខ ស្ថិរភាពនៅក្នុងតំបន់ និងពិភពលោក មិនមែនជាសម្ព័ន្ធមិត្តឈានដល់ការបង្កើតមូលដ្ឋានទ័ពដូចការលើកឡើងនោះទេ។
លោក Wu Qian៖ «កងទ័ពទាំងពីរយើងនៅតែបន្តទំនាក់ទំនងគ្នា បន្តជួយគាំទ្រគ្នាទៅវិញទៅមក ដើម្បីសន្តិសុខ ស្ថិរភាពប្រទេស តំបន់ និងពិភពលោក។ ចំពោះព័ត៌មានដែលថា ចិនរៀបចំបណ្តុះបណ្តាលរៀបចំមូលដ្ឋានទ័ពនៅកម្ពុជានោះ គឺជាការរាយការណ៍ដោយបំពានខុសការពិត។»
សារព័ត៌មានអាមេរិក The Wall Street Journal បានចុះផ្សាយកាលពីថ្ងៃទី២១ ខែកក្កដា ថា កម្ពុជា-ចិន បានចុះហត្ថលេខាជាសម្ងាត់ជាមួយគ្នា អំឡុងត្រីមាសទី២ នៃឆ្នាំ២០១៩នេះ ដើម្បីផ្ដល់សិទ្ធិឱ្យប្រទេសចិនប្រើប្រាស់មូលដ្ឋានជើងទឹកមួយកន្លែងក្នុងឈូងសមុទ្រកម្ពុជា រយៈពេល ៣០ឆ្នាំ។
ទោះយ៉ាងណា ក្រោយការចុះផ្សាយនេះ លោកនាយករដ្ឋមន្ត្រី ហ៊ុន សែន និងមន្ត្រីជាន់ខ្ពស់កម្ពុជាផ្សេងទៀតបានចេញមុខច្រានចោល និងថ្កោលទោសចំពោះការផ្សព្វផ្សាយនេះ។
