មន្ត្រីតុលាការ បានចោទសួរអតីតបុគ្គលិកវិទ្យុអាស៊ីសេរី ទាក់ទងនឹងការយកឯកសារប្រគល់ឲ្យមន្ត្រីស្ថានទូតអាមេរិកប្រចាំកម្ពុជា អំឡុងពេលអ្នកគ្រប់គ្រងស្ថានីយ៍ គ្រោងបិទការផ្សាយវិទ្យុនោះនៅក្នុងទឹកដីកម្ពុជា។
ក្នុងសវនាការពេញមួយព្រឹក នាថ្ងៃនេះ ប្រធានក្រុមប្រឹក្សាជំនុំជម្រះ លោក អ៊ឹម វណ្ណៈ និងតំណាងអយ្យការសាលាដំបូងរាជធានីភ្នំពេញ សេង ហ៊ាង បានចោទសួរទៅអតីតបុគ្គលិកអាស៊ីសេរីទាំងពីររូប គឺលោក អ៊ួន ឈិន និងលោក យាង សុធារិន្ទ ពាក់ព័ន្ធនឹងការផ្តល់ព័ត៌មានទៅឲ្យរដ្ឋបរទេស និងប្រគល់ Hard Disk មួយឲ្យមន្ត្រីស្ថានទូតអាមេរិកប្រចាំកម្ពុជា។
អតីតបុគ្គលិកវិទ្យុអាស៊ីសេរី លោក អ៊ួន ឈិន បានលើកឡើងក្នុងអង្គសវនាការថា លោកពិតជាបានយក Hard Disk មួយប្រគល់ឲ្យមន្ត្រីស្ថានទូតអាមេរិកប្រចាំកម្ពុជាអំឡុងពេលអ្នកគ្រប់គ្រងវិទ្យុអាស៊ីសេរីគ្រោងបិទការផ្សាយផ្ទាល់ក្នុងប្រទេសកម្ពុជាប្រាដកមែន។ ប៉ុន្តែ លោកថា អះអាងថា លោកមិនដឹងថា ក្នុងនោះមានឯកសារសំខាន់ៗអ្វីនៅក្នុងនោះទេ។ លោកថា លោក បានយកពីក្នុងការិយាល័យវិទ្យុអាស៊ីសេរីក្នុងប្រទេសកម្ពុជា តាមការស្នើសុំរបស់សហការីធ្វើការងារជាមួយគ្នា។
មន្រ្តីស្ថានទូតអាមេរិកប្រចាំកម្ពុជា បានបដិសេធធ្វើការអត្ថាធិប្បាយជុំវិញបញ្ហានេះ។
ចំណែក លោក គង់ ពិសី និងលោក សំ ចំរើន មេធាវីការពារក្តីឲ្យអតីតបុគ្គលិកវិទ្យុអាស៊ីសេរីទាំងពីររូបនោះ មានប្រសាសន៍ថា ការសួរដេញដោលកូនក្តីរបស់លោកពេញមួយព្រឹកនេះ សបញ្ជាក់ថា មិនមានភស្តុតាងដាក់បន្ទុកលើកូនក្តីរបស់លោកនោះទេ។
នៅក្នុងសវនាការនោះដែរ ចៅក្រមជុំនុំជំរះ បានឲ្យមន្ត្រីក្រឡាបញ្ជីអានរបាយការណ៍របស់មន្ត្រីនគរបាលយុត្តិធម៌ កំណត់សំគាល់សាក្សី និងបង្ហាញវត្ថុតាងចាប់យកជាង៣០មុខ រួមមាន កុំព្យូទ័រ ទូរសព្ទ រូបភាព វីដេអូ Hard Disk និងសម្ភារបច្ចេកទេសមួយចំនួនទៀត។
ក្រោយពីអាន និងបង្ហាញវត្ថុតាងចប់ ចៅក្រមជំរះប្រកាសសុំផ្អាកសវនាការសិន ដោយទុកឲ្យព្រះរាជអាជ្ញា និងមេធាវី ធ្វើសេចក្តីសន្និដ្ឋានបញ្ចប់រឿងនេះ នៅថ្ងៃទី០៩ ខែសីហា ឆ្នាំ២០១៩ វេលាម៉ោង៨ព្រឹកវិញ។ ចំណែក សំណុំរឿងទីពីរគឺបទ «ផលិតវីដេអូអាសអាភាស» ចៅក្រមជំរះបញ្ជាក់ថា នឹងជំរះបន្តនៅថ្ងៃដដែល ក្រោយពីព្រះរាជអាជ្ញា និងមេធាវីធ្វើសេចក្តីសន្និដ្ឋានចប់។
ក្រោយពីបិទបញ្ចប់ការសួរដេញដោល អតីតបុគ្គលិកវិទ្យុអាស៊ីសេរីទាំងពីរនាក់បានថ្លែងប្រាប់អ្នកសារព័ត៌មាននៅក្រៅរបងសាលាដំបូងរាជធានីភ្នំពេញថា លោក យាង សុធារិន្ទ បង្ហាញក្តីសង្ឃឹមថា នៅថ្ងៃទី០៩ ខែសីហា តុលាការនឹងសម្រេចឈរលើគោលការណ៍ឯករាជ្យ ដើម្បីផ្តល់យុត្តិធម៌ដល់ពួកគេ។
លោក សង្ឃឹមថា៖ «ខ្ញុំនៅតែមានសង្ឃឹមថា ចៅក្រមនឹងសម្រេចឲ្យពួកខ្ញុំទាំងពីររួចផុតពីការចោទប្រកាន់ហ្នឹងទៅ»។
លោក អ៊ួន ឈិន ឯណោះវិញ ស្នើទៅតុលាការទម្លាក់បទចោទលើពួកគាត់ឲ្យមានសេរីភាពវិញ ដើម្បីរកប្រាក់ព្យាបាលសុខភាព និងទ្រទ្រង់ជីវភាពគ្រួសារ។
លោក ស្នើថា៖ «ខ្ញុំសង្ឃឹមថា តុលាការនឹងបញ្ចប់ការចោទប្រកាន់ ហើយឲ្យយើងមានសេរីភាពវិញ ដើម្បីឲ្យយើងបានប្រកបរបររកស៊ីចិញ្ចឹមជីវិត ហើយធ្វើដំណើរ ដើរទៅណាមកណា។ ដូចយើងរាល់ថ្ងៃ យើងទៅណាក៏មិនបាន យើងសុខភាពទ្រុឌទ្រោម ខ្ញុំចង់ទៅមើលជំងឺនៅប្រទេសជិតខាងដែរ។ តុលាការបញ្ចប់បទចោទ ងាយស្រួលយើងរកការងារធ្វើវិញផង»។
ក្រោយពីស្តាប់ការសួរដេញដោលក្នុងអង្គសវនាការពេញមួយព្រឹកនេះ ប្រធានគ្រប់គ្រងផ្នែកអង្កេតនៃអង្គការការពារសិទ្ធិមនុស្សលីកាដូ លោក អំ សំអាត កត់សំគាល់ថា ភស្តុតាងដែលមន្ត្រីនគរបាលយុត្តិធម៌ និងមន្ត្រីតុលាការយកមកបង្ហាញ មិនមានទំងន់ដាក់បន្ទុកដល់អតីតអ្នកសារព័ត៌មានទាំងនោះទេ។
លោក មានប្រសាសន៍ថា៖ «ការដេញដោល ភស្តុតាងដែលលើកយកមកចោទ គឺចោទពីរឿងផ្តល់ព័ត៌មានជាអាទិ៍ទៅរដ្ឋបរទេសដែលធ្វើឲ្យប៉ះពាល់ដល់សន្តិសុខជាតិ? ក្នុងការលើកឡើងក្នុងអង្គសវនាការ យើងអត់ឃើញមានព័ត៌មានណាដែលបញ្ជាក់ថា ប៉ះពាល់ដល់សន្តិសុខជាតិនោះទេ »។
អតីតបុគ្គលិកអាស៊ីសេរី លោក អ៊ួន ឈិន និងលោក យាង សុធារិន្ទ ត្រូវបានតុលាការសម្រេចដោះលែងឲ្យនៅក្រៅឃុំកាលពីថ្ងៃទី២១ ខែសីហា ឆ្នាំ២០១៨ បន្ទាប់ពីត្រូវបានសមត្ថកិច្ចចាប់ខ្លួនកាលពីពាក់កណ្ដាលខែវិច្ឆិកា ឆ្នាំ២០១៧។ បន្ទាប់ពីការចាប់ខ្លួន ពួកគេត្រូវបានតុលាការចោទប្រកាន់ចំនួនពីរបទល្មើស ដោយទីមួយបទ«ផ្តល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ» និងទីពីរបទ«ផលិតវីដេអូអាសអាភាស» ៕