តុលាការខេត្តមណ្ឌលគិរី បានសម្រេចឃុំខ្លួនជនជាតិចិន ៣នាក់ និងបន្តសាកសួរមន្ត្រីរដ្ឋបាលព្រៃឈើ ៣រូបទៀត បន្ទាប់ពីពួកគេត្រូវបានសមត្ថកិច្ចចាប់ខ្លួនពាក់ព័ន្ធនឹងបទល្មើសព្រៃឈើ។
ការអនុវត្តច្បាប់នេះ ធ្វើឡើងតាមបណ្ដឹងដោយផ្អែកលើភស្តុតាងដែលរកឃើញដោយគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ។
ការចាប់ខ្លួនជនសង្ស័យទាំង៦នាក់នេះ គឺជាផ្នែកមួយនៃយុទ្ធនាការថ្មី សំដៅបង្ក្រាបបទល្មើសព្រៃឈើនៅទូទាំងប្រទេសដែលដាក់ចេញដោយគណៈកម្មាធិការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ នាដើមខែកក្កដាកន្លងទៅនេះ។
ប្រធានរដ្ឋបាលសាលាដំបូងខេត្តមណ្ឌលគិរី លោក ម៉េត ប្រុស បានថ្លែងប្រាប់ វី.អូ.ឌី តាមទូរសព្ទនៅថ្ងៃនេះថា នីតិវិធីទាំងនេះផ្អែកតាមបណ្ដឹងរបស់គណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ។
លោកបន្តថា អយ្យការអមសាលាដំបូងខេត្តបានសម្រេចឃុំខ្លួនជនជាតិចិន ៣នាក់ ជាបុគ្គលិកក្រុមហ៊ុនឯកជន ក្នុងបទចោទផ្សំគំនិត និងកំហែងយកដោយប្រើប្រាស់អាវុធខុសច្បាប់។ លោកបន្តថា តុលាការកំពុងសួរចម្លើយមន្ត្រីរដ្ឋបាលព្រៃឈើ ២រូប និងមន្ត្រីបរិស្ថាន ១រូប។
លោក ម៉េត ប្រុស ប្រាប់ថា៖ «ចិន ៣នាក់នោះ ដាក់ឃុំហើយ ហើយកំពុងសួរមន្ត្រីរដ្ឋបាលព្រៃឈើ២នាក់ និងបរិស្ថានម្នាក់ទៀត។ ករណីនេះ ចាប់ច្រើនហើយ តែថ្មីៗនេះមានតែ ៦នាក់ហ្នឹងទេ»។
មន្ត្រីរាជការនៅខេត្តមណ្ឌលគិរី ដែលត្រូវចាប់ខ្លួន និងកំពុងសួរចម្លើយ ពាក់ព័ន្ធបទល្មើសព្រៃឈើ រួមមាន នាយកដែនជម្រកសត្វព្រៃភ្នំព្រេចលំផាត់ លោក ហាន សុខន។ នាយរងខណ្ឌរដ្ឋបាលព្រៃឈើ លោក សារ៉ូ រតនា និងនាយសង្កាត់រដ្ឋបាលព្រៃឈើរយ៉ ស្រុកលំផាត់ លោក ហុង វណ្ណេ។
ជនជាតិចិនទាំង ៣នាក់នោះរួមមាន ទី១ លោក ចូវ លិហុង, ទី២៖ឈ្មោះ កើ អីកឡុង និងទី៣៖ឈ្មោះ ស៊ូ ជីងហ័រ ដែលជាប់ពាក់ព័ន្ធទៅនឹងការគំរាមកំហែងជនជាតិចិនម្នាក់ផ្សេងទៀតផងដែរ ដើម្បីយកទីតាំងប្រព្រឹត្តបទល្មើសព្រៃឈើនៅចំណុចក្រុមហ៊ុនថាច់វូត។
អ្នកនាំពាក្យគណៈកម្មការជាតិដើម្បីទប់ស្កាត់ និងបង្ក្រាបបទល្មើសធនធានធម្មជាតិ លោក អេង ហ៊ី មានប្រសាសន៍ថា គណៈកម្មការជាតិ នឹងនៅតែបន្តចាត់វិធានការចំពោះបទល្មើសនានា ដែលជាសកម្មភាពបំផ្លាញធនធានធម្មជាតិតាមច្បាប់កំណត់។
លោក អេង ហ៊ី ៖ «យើងនឹងចាត់វិធានការគ្រប់រូបភាព ដើម្បីប្រឆាំងបទល្មើសទាំងអស់»។
កាលពីថ្ងៃទី១៨ ខែកក្កដា ក្រុមបង្ក្រាបព្រៃឈើមួយនេះ បានប្រកាសថា ក្រុមហ៊ុនចំនួន ៥ ដែលសមត្ថកិច្ចកំពុងធ្វើការស៊ើបអង្កេតនោះ មានដូចជា ក្រុមហ៊ុន ម៉ាស់ស្ទ័ខេសាន់ ក្រុមហ៊ុន យ៉ាងចាវ ក្រុមហ៊ុន ថាច់ហ៊្វូត ក្រុមហ៊ុន វ៉ិចធ័ររី និងក្រុមហ៊ុន ណេណាង។
កាលពីថ្ងៃទី៩ ខែកក្កដា ក្រុមបង្ក្រាបបទល្មើសធនធានធម្មជាតិរបស់រដ្ឋាភិបាលដែលដឹកនាំដោយលោក សៅ សុខា រឹបអូសយករថយន្តដឹកឈើជាង ៤០គ្រឿង ចាប់ខ្លួនមនុស្ស ៤នាក់ ក្នុងនោះមានឧកញ៉ា ស៊ឹង សំអុល ផងដែរ។
អ្នកសម្របសម្រួលសមាគមអាដហុកខេត្តមណ្ឌលគិរី លោក អៀង ម៉េងលី មានប្រសាសន៍ថា កាលពេលមុន អាជ្ញាធរតែងព្រងើយកន្តើយចំពោះសេចក្តីរាយការណ៍របស់ប្រជាពលរដ្ឋពីបញ្ហាបទល្មើសបំផ្លាញធនធានធម្មជាតិ តែពេលអនុវត្តច្បាប់ទើបដឹងថា មានមន្ត្រីមួយចំនួនជាអ្នកប្រព្រឹត្តិបទល្មើសទាំងនោះដែរ។
លោកបញ្ជាក់ថា ចាប់តាំងពីមានយុទ្ធនាការបង្រ្កាបទ្រង់ទ្រាយធំនេះ សកម្មភាពជំនួញឈើហាក់មានសញ្ញាថមថយ ប៉ុន្តែ មិនអាចសន្មត់ថា ឈ្មួញឈប់រកស៊ីនោះទេ៕