ប្រជាពលរដ្ឋតំណាងឲ្យប្រជាជន ១៣១៧ គ្រួសារមកពីស្រុកចំនួន ៣នៃខេត្តកោះកុង ប្រមូលផ្តុំគ្នាតវ៉ានៅមុខទីស្ដីការក្រសួងរៀបចំដែនដី នគររូបនីយកម្ម និងសំណង់ នៅព្រឹកថ្ងៃនេះ ដើម្បីទាមទារសុំអន្តរាគមន៍ពីក្រសួងដោះស្រាយបញ្ហាដីធ្លី។
ប្រជាពលរដ្ឋដែលមកពីស្រុកស្រែអំបិល ស្រុកបុទុមសាគរ និងស្រុកថ្មបាំង ខេត្តកោះកុង ប្រាប់ថា ពួកគាត់ បាត់បង់ដីធ្លីធ្លាក់ទៅលើដៃក្រុមហ៊ុនស្ករអំពៅកោះកុងស៊ូហ្គើររបស់លោក លី យ៉ុងផាត់ និងក្រុមហ៊ុន ផ្លែនថេសិន ខមផេនី លីមីតធីត តាំងពីឆ្នាំ២០០៧មក។
ប៉ុន្តែ ពួកគាត់មិនបានចេញមុខតវ៉ាពីដំបូងឡើយ ដោយអះអាងថា កង្វះព័ត៌មាន និងបារម្ភពីសុវត្ថិភាព។ លុះដល់លឺប្រកាសរបស់រដ្ឋមន្ត្រីក្រសួងដែនដី លោក ជា សុផារ៉ា ថានឹងដោះស្រាយបញ្ហាទំនាស់ដីធ្លីជាមួយក្រុមហ៊ុនស្ករអំពៅនេះ ទើបពលរដ្ឋស្រុះស្រួលគ្នាចេញមកត៉វាតែម្តង។
ប្រជាពលរដ្ឋមកពីភូមិព្រែកជីក ឃុំជីខលើ ស្រុកស្រែអំបិល អ្នកស្រី ជឹម ថុន លើកឡើងថា ពលរដ្ឋអ្នកឡើងមកតវ៉ានេះ ស្នើសុំឱ្យអាជ្ញាធរចែកដីឱ្យម្នាក់ ២ហិចតា ដើម្បីយកទៅប្រកបរបរកសិកម្មចិញ្ចឹមជីវិត។ អ្នកស្រីបន្តថា កន្លងទៅ លោករដ្ឋមន្ត្រីក្រសួងរៀបចំដែនដី បានដោះស្រាយជូនប្រជាពលរដ្ឋមួយចំនួនដែលមានទំនាស់ដីធ្លីជាមួយក្រុមហ៊ុនស្ករអំពៅរួចហើយ តែពួកគាត់មិនបានទទួលដំណោះស្រាយទេ។
អ្នកស្រី ជឹម ថុន ប្រាប់ថា៖ «ក្រសួងសុទ្ធតែមានផែនទីម៉េចមិនឆែកមើល តើក្រុមហ៊ុនស្ករអំពៅហ្នឹងប៉ះពាល់ប៉ុន្មានស្រុក ពួកខ្ញុំប្រាប់ហើយតើថា មានបីស្រុក គឺស្រុកថ្មបាំង ស្រុកស្រែអំបិល និងស្រុកបុទុមសាគរ។ ពួកគាត់ដោះស្រាយបានតែស្រុកស្រែអំបិលមួយផ្នែកទេ ចុះស្រុកថ្មបាំង និងបុទុមសាគរដោះស្រាយឱ្យនៅ? ឯកឧត្តមពិនិត្យទៅ កុំឱ្យចេះតែថា ពលរដ្ឋហ្នឹងចេះតែបន្លំ»។
ទាក់ទឹងនឹងការតវ៉ានេះ រដ្ឋមន្ត្រីក្រសួងរៀបចំដែនដី នគររូបនីយកម្ម និងសំណង់ បានចាត់ឱ្យរដ្ឋលេខាធិការ លោក ទេព ធន ជាអ្នកចេញមុខប្រជុំជាមួយពលរដ្ឋដើម្បីរកដំណោះស្រាយ។ រដ្ឋលេខាធិការរូបនេះ បានប្រើពេលអស់ជាង ៤ម៉ោង ដើម្បីប្រជុំដោយបិទទ្វារជាមួយតំណាងអ្នកតវ៉ា ១៨រូប។
កំណត់ហេតុអង្គប្រជុំ បង្ហាញថា លោក ទេព ធន តម្រូវឱ្យប្រជាពលរដ្ឋណាដែលមិនពាក់ព័ន្ធបញ្ហាដីធ្លី ឬបានទទួលសំណងរួចត្រូវថយចេញពីជម្លោះ។ លោកតម្រូវឱ្យប្រជាពលរដ្ឋបំពេញសាលាកប័ត្រព័ត៌មានដោយខ្លួនឯង ដោយបញ្ជាក់ពីអាជ្ញាធរមូលដ្ឋាន ចំពោះចំនួនមនុស្ស និងក្បាលដីរងផលប៉ះពាល់ ព្រមទាំងថតចម្លងទុកឱ្យអាជ្ញាធរចុះពិនិត្យ។
ចំណុចចុងក្រោយ គឺអាជ្ញាធរសន្យាថា នឹងពិនិត្យផ្ទៀងផ្ទាត់ ដើម្បីរកឱ្យឃើញនូវផលប៉ះពាល់ពិតប្រាកដ និងដោះស្រាយតាមជាក់ស្តែង។
តំណាងក្រសួងរៀបចំដែនដី ស្នើឱ្យប្រជាពលរដ្ឋត្រលប់ទៅផ្ទះវិញក្នុងថ្ងៃនេះ ប៉ុន្តែ ក្រុមពលរដ្ឋសុំស្នាក់នៅជាប់របងក្រសួងមួយយប់ ព្រោះតែមិនមានឡានត្រឡប់ទៅវិញ។
អ្នកសម្របសម្រួលបច្ចេកទេសឃ្លាំមើលការរំលោភសិទ្ធិមនុស្សអង្គលីកាដូ លោក អំ សំអាត មានប្រសាសន៍ថា ពលរដ្ឋគួរណាស់តែចងក្រងទិន្នន័យដីធ្លីរបស់ខ្លួនតាមភាពជាក់ស្តែង រាប់តាំងពីព្រំដី ទីតាំងដី គំនូសប្លង់ពិសេសការទទួលស្គាល់ពីអាជ្ញាធរមូលដ្ឋាន។
លោកបញ្ជាក់ថា៖ «ការរៀបចំឯកសារនេះ គ្រាន់តែជាឯកសារបឋមប៉ុណ្ណោះ តែអ្វីដែលសំខាន់នោះ គឺការចុះស្រាវជ្រាវទិន្នន័យជាក់ស្តែងពីសំណាក់អាជ្ញាធរ ក្រសួងរៀបចំដែនដី តែម្តងទើបមិនមានបញ្ហាថ្ងៃក្រោយ»។
វីអូឌី មិនទាន់អាចទាក់ទងលោក លី យ៉ុងផាត់ និងតំណាងក្រុមហ៊ុនរបស់លោកដើម្បីបំភ្លឺបានទេ នៅថ្ងៃទី០៥សីហានេះ។
ប្រជាពលរដ្ឋទាំងអស់នេះ បានតវ៉ាមកកាន់ក្រសួងរៀបចំដែនដីនគររូបនីយកម្មនិងសំណង់ ៣ដងមកហើយ ប៉ុន្តែមិនទាន់មានដំណោះស្រាយ។ ក្រុមអ្នកភូមិទាមទារសំណងមួយគ្រួសារចង់បានដី ២ហិកតា៕
