ក្រសួងផែនការប្រកាសថា របាយការណ៍បឋមសម្រាប់ការធ្វើជំរឿននៅឆ្នាំ២០១៩ នេះថា ប្រជាជនដែលកំពុងរស់នៅកម្ពុជាបច្ចុប្បន្នមានជាង១៥លាននាក់។
តាមតួលេខបណ្ដោះអាសន្ននៃជំរឿនឆ្នាំ២០១៩ បង្ហាញថាបើគិត ត្រឹមថ្ងៃទី០៣មីនាឆ្នាំ២០១៩ប្រជាជនដែលរស់នៅកម្ពុជាទាំងអស់ មានជាង១៥(ជាង១៥ ២៨៨ ៤៨៩)។ ក្នុងនោះមនុស្សប្រុសមាន ជាង៧លាន៤សែន(៧ ៤១៨ ៥៧៧)នាក់និងមនុស្សស្រីជាង៧លាន៨សែន( ៧ ៨៦៩ ៩១២)នាក់។ តួលេខនេះ មិនរាប់បញ្ជូលចំនួនពលរដ្ឋខ្មែរមានប្រមាណជាង១លាន២សែន៣ម៉ឺននាក់ដែលចំណាកស្រុកនិង មិនបានរាប់តំណាងអង្គទូតនិងមន្ត្រីការទូតដែលបំពេញការងារក្នុងប្រទេសកម្ពុជានោះទេ។
ជំរឿនក៏រកឃើញដែរថា កំណើនប្រជាជនកម្រិតថ្នាក់ជាតិកើនឡើងយឺតដោយសារអត្រាផ្ដល់កំណើតនិងអត្រាកំណើនប្រជាជនបានថយចុះ បើផ្អែកតាមលទ្ធផលព្យាករណ៍ដែលរំពឹងទុក។ អត្រាកំណើនប្រជាជនប្រចាំឆ្នាំពី១,៥% ពីឆ្នាំ១៩៩៨ដល់២០០៨ ខណៈពីឆ្នាំ២០០៨ដល់២០១៩កើនឡើងត្រឹម១,២% ។
រដ្ឋមន្ត្រីក្រសួងផែនការ លោកឆាយ ថន មានប្រសាសន៍ថា តួលេខនៃជំរឿននេះជាតួលេខបណ្ដោះអាសន្នដែលអាចប្រើប្រាស់បាន ហើយតួលេខពិតប្រាកដនឹងប្រកាសជាផ្លូវការនៅពាក់កណ្ដាលឆ្នាំ២០២០។ លោកបន្តថាលទ្ធផលជំរឿននឹងត្រូវយកទៅផ្សព្វផ្សាយ រាជធានីខេត្តទាំង២៥នៅទូទាំងប្រទេស ហើយតួលេខគួរឱ្យទុកចិតុ្តនេះ ជាទុនសម្រាប់កិច្ចការអភិវឌ្ឍន៍តាមខេត្តនីមួយៗ។
លោកឆាយ ថន ៖ តួលេខបណ្ដោះអាសន្ននៃជំរឿទូទៅប្រជាជនឆ្នាំ២០១៩ដែលត្រូវផ្សព្វផ្សាយថ្ងៃនេះ គឺផ្អែកលើការពិនិត្យពិច័យយ៉ាងហ្មត់ចត់លើតួលេខសង្ខេបដែលរៀបចំឡើងដោយមន្ត្រីសម្ភាសន៍។
បើតាមក្រសួងផែនការ ជំរឿនប្រជាជនឆ្នាំ២០១៩នេះអនុវត្តតាមវិធីសាស្ត្រឃើញរាប់ (De Facto)។ ជំរឿននេះប្រើប្រាស់កម្លាំងមន្ត្រី ៩២០០នាក់ដោយសម្ភាសន៍ប្រជាពលរដ្ឋប្រមាណ៣លាន៧សែនគ្រួសារ ក្នុងរយៈពេល១១ថ្ងៃ។ ក្រៅពីគ្រួសារធម្មតា ពលរដ្ឋនៅតាមសណ្ឋាគារ វត្តអារាម មន្ទីរពេទ្យ ពន្ធនាគារក៏ត្រូវរាប់បញ្ចូលដែរ។ លទ្ធផលជំរឿននេះរកឃើញថា កម្ពុជាមានដង់ស៊ីតេប្រជាជនជាមធ្យម៨៦នាក់ក្នុងមួយគីឡូម៉ែត្រការ៉េ ខណៈដែលពលរដ្ឋនៅអាស៊ានជាមធ្យម១២៦នាក់ក្នុង១គីឡូម៉ែត្រការ៉េ។
រដ្ឋមន្ត្រីក្រសួងមហាផ្ទៃ លោក ស ខេង មានប្រសាសន៍ថា ផ្ទៃដីនៅកម្ពុជាធំនៅឡើយបើធៀបនឹងដង់ស៊ីតេប្រជាជន។ ចំណុចនេះលោកនៅតែលើកទឹកចិត្តឱ្យគ្រួសារនីមួយៗមានកូនច្រើនបើទោះជាគំនិតនេះត្រូវរងការរិះគន់ក៏ដោយ។ លោកមានប្រសាសន៍ថា អ្នកវិភាគដែលរិះគន់លោកជុំវិញការជំរុញឱ្យយកកូនច្រើននេះ មិនបានគិតឱ្យបានទូលាយពីកត្តាផ្សេងៗក្រៅពីជីវភាពគ្រួសារនោះឡើយ។
លោក ស ខេង៖ កម្ពុជាយើងមានដីធំ អាចដាក់ប្រជាជនច្រើនជាងនេះ ។កន្លងមកមានគេវិភាគច្រើនពីរឿងយកកូនច្រើន តែអ្នកវិភាគទាំងនោះមើលឃើញមួយជ្រុងប៉ុណ្ណោះ។ យើងទាំងអស់គ្នាចង់បានមនុស្សច្រើនដើម្បីកំណើនលើ សេដ្ឋកិច្ចជាតិ និងកត្តានយោបាយជាតិជាដើម។ចាស់ៗជំនាន់មុនគាត់មានកូនច្រើនណាស់យ៉ាងតិចក៏៦នាក់ដែរពួកគាត់ចិញ្ចឹមរស់ ។
លទ្ធផលបណ្ដោះអាសន្ននៃជំរឿនប្រជាជននេះ រកឃើញថា រាជធានីភ្នំពេញមានប្រជាជនរស់នៅច្រើនជាងគេក្នុងបណ្ដាលខេត្តទាំងអស់ទូទាំងប្រទេស ប្រមាណជាង២លាន១សែននាក់(២ ១២៩ ៣៧១នាក់) ខណៈខេត្តកែបមានមនុស្សរស់នៅតិចជាងគេ គឺមានប្រមាណ៤ម៉ឺន១ពាន់៧៩៨នាក់។
ទាក់ទងនឹងបញ្ហានេះ ប្រធានអង្គការសម្ព័ន្ធគណនេយ្យភាពសង្គមកម្ពុជាលោក សន ជ័យ មានប្រសាសន៍ថា លោកចង់ឱ្យរាជរដ្ឋាភិបាលតាមរយៈក្រសួងផែនការរៀបចំកម្រងសំណួរជំរឿន ឱ្យបានល្អជាងមុនដើម្បីឱ្យលទ្ធផលជំរឿនអាចប្រើប្រាស់បានលើសពីអ្វីដែលកំពុងតែបង្ហាញនៅពេលនេះ។
លោកសន ជ័យ៖ លទ្ធផលជំរឿននេះគេគ្រាន់តែសួរយើងតាមអ្វីដែលគេឃើញជាក់ស្តែង ដូចជាមានឡានប៉ុន្មានមានទូរទស្សន៍ប៉ុន្មាន ផ្ទះប៉ុន្មានប៉ុន្តែមិនបានសួរពីរឿងជំពាក់បំណុលប៉ុន្មានទេ?យើងចង់សួរឱ្យគាត់បំណងប្រាថ្នាអនាគតរបស់ពលរដ្ឋថាចង់បានអី ចង់ធ្វើអីនៅ១០ឆ្នាំខាងមុខនេះ។យើងចង់ឆ្លើយតែគេមិនបានសួរយើង។
តាមរយៈវេទិកាផ្សព្វផ្សាយនៅព្រឹកនេះ មានការលើកឡើងមួយពីចំណុចអសកម្មមួយចំនួនរបស់មន្ត្រីដែលចុះសម្ភាសន៍ប្រជាពលរដ្ឋ រួមមានរបៀបចុះស្រង់ទិន្នន័យ កម្រងសំណួរដែលបានរៀបចំ និង ករណីមួយចំនួនទៀតគឺ មន្ត្រីមិនបានចុះទៅ សម្ភាសន៍ដល់ផ្ទះតែម្តង។
ទាក់ទងនឹងចំណុចអសកម្មនេះ អគ្គនាយកវិទ្យាស្ថានជាតិស្ថិតិ អ្នកស្រី ហង់ លីណា មានប្រសាសន៍ថា ចំណុចល្អៀងនិងអសកម្មមួយចំនួនកើតឡើង ជៀសមិនផុតឡើយប៉ុន្តែចំណុចទាំងនោះ ស្ថិតក្នុងស្ថានភាពដែលអាចទទួលយកបាន។ អ្នកស្រីបញ្ជាក់ថាពេលជំរឿនលើក្រោយវិទ្យាស្ថានជាតិស្ថិតិនឹងបន្ថែមកម្រងសំណួរផ្សេងៗទៀតដើម្បីឱ្យដឹងកាន់តែច្រើនពីតម្រូវការនិងការលំបាករបស់ប្រជាពលរដ្ឋ។
អ្នកស្រី ហង់ លីណា៖ ជំរឿននៅប្រទេសណាក៏មានចំណុចលំអៀងខ្លះដែរប៉ុន្តែយើងអាចយកជាការបានឱ្យតែចំណុចលម្អៀងតិចតួច។ ចំពោះសំណួរសម្រាប់សម្ភាសន៍វិញ ពេលនេះយើងចង់ដឹងថា ពលរដ្ឋមានអីសិន បើដឹងហើយនឹងរៀបចំគោលនយោបាយឱ្យត្រូវស្របតាមតម្រូវការពលរដ្ឋ។ លើកក្រោយនឹងគ្រោងកែលំអរសំណួរទាំងនេះ។
ជំរឿនទូទៅនៃប្រជាជនកម្ពុជាធ្វើឡើងជាច្រើនដងមកហើយ។នៅឆ្នាំ១៩៦២ កម្ពុជាប្រមូលស្ថិតិប្រជាជនដោយរកឃើញថា មានមនុស្ស៥លាន៧សែននាក់ ខណៈឆ្នាំ១៩៧៩ ការអង្កេតប្រជាសាស្ត្ររកឃើញថាកម្ពុជាមានមនុស្ស៦លាន៦សែននាក់។ ការធ្វើជំរឿនឆ្នាំ១៩៩៨ រកឃើញថាប្រជាជននៅកម្ពុជាមានចំនួន១១លាន៤សែននាក់។ជំរឿនឆ្នាំ២០០៨ រកឃើញថា ប្រជាជននៅកម្ពុជាមានប្រមាណជាង១២លាន៨សែននាក់៕