មនុស្សជាង ១០០នាក់ហើយ ត្រូវបានសមត្ថកិច្ចទីក្រុងហុងកុងចាប់ខ្លួនពាក់ព័ន្ធនឹងបាតុកម្មប្រឆាំងនឹងការប៉ុនប៉ងបង្កើតច្បាប់បត្យាប័ន ដែលបានអូសបន្លាយកាន់តែយូរនៅក្នុងទីក្រុងមជ្ឈមណ្ឌលហិរញ្ញវត្ថុអន្តរជាតិមួយនេះ។
សារព័ត៌មានសិង្ហបុរី Channel News Asia បានចុះផ្សាយថា មនុស្សដល់ទៅ ១៤៨នាក់ ត្រូវបានសមត្ថកិច្ចទីក្រុងហុងកុងចាប់ខ្លួនជាបន្តបន្ទាប់ ហើយឧស្ម័នបង្ហូរទឹកភ្នែកដល់ទៅ ៨០០បំពង ត្រូវបានសមត្ថកិច្ចបាញ់ទៅលើក្រុមបាតុករ។
ទីក្រុងហុងកុង បានធ្លាក់ចូលទៅក្នុងស្ថានភាពវឹកវរអស់រយៈពេល ២ខែមកហើយ បន្ទាប់ពីរដ្ឋាភិបាលទីក្រុងមួយនេះ បានស្នើបង្កើតច្បាប់បត្យាប័នជាមួយក្រុងប៉េកាំង ដែលសំណើច្បាប់នោះ ត្រូវបានគេចាត់ទុកថា នឹងគំរាមកំហែងដល់សេរីភាពបញ្ចេញមតិរបស់ក្រុមអ្នករិះគន់មានមូលដ្ឋាននៅទីក្រុងហុងកុង។
សារព័ត៌មានសិង្ហបុរីដដែល បានចុះផ្សាយបន្តថា សមត្ថកិច្ចទីក្រុងហុងកុង បានប៉ះទង្គិចជាមួយក្រុមបាតុករនៅទីតាំងតវ៉ា ២៣កន្លែងផ្សេងៗគ្នា រួមមាននៅព្រលានយន្តហោះអន្តរជាតិទីក្រុងហុងកុង និងសង្កាត់ពាណិជ្ជកម្មកូវឡុន ជាដើម។
ប៉ូលិសទីក្រុងហុងកុង បានថ្លែងប្រាប់អ្នកសារព័ត៌មានកាលពីថ្ងៃម្សិលមិញថា ត្រឹមតែ១ថ្ងៃច័ន្ទកន្លងមកនេះប៉ុណ្ណោះ សមត្ថកិច្ចបាញ់ឧស្ម័នបង្ហូរទឹកភ្នែកអស់ ៨០០បំពង់ ពោលជាចំនួនដ៏ច្រើនស្ទើតែស្មើនឹងចំនួន ១០០០បំពង់ ដែលត្រូវបានសមត្ថកិច្ចប្រើប្រាស់ក្នុងរយៈពេល ២ខែមកនេះ ដើម្បីបង្ក្រាបលើចលនាបាតុកម្ម។
ចំណែកក្រុមអ្នកតវ៉ាវិញ បានហៅសកម្មភាពរបស់ប៉ូលិសថា ជាការរារាំងពួកគេ និងរារាំងអ្នកសារព័ត៌មាន មិនឲ្យរាយការណ៍អំពីបាតុកម្ម តាមរយៈការដេញវាយលើអ្នកសារព័ត៌មានមានម៉ាស៊ីនថតវីដេអូនៅលើដងខ្លួន។
ក្រុងប៉េកាំងបានព្រមានទៅដល់ក្រុមបាតុករទីក្រុងហុងកុងថា កុំឲ្យប្រឡែងលេងនឹងភ្លើង ហើយថា អ្នកទាំងឡាយណាដែលប្រឡែងលេងភ្លើង នឹងរងគ្រោះដោយសារភ្លើង។ នេះគឺជាសារព្រមានធ្ងន់ៗធ្វើឡើងដោយប្រទេសចិន ដែលប្រាប់ក្រុមបាតុករកុំឲ្យមើលស្រាលទៅលើកម្លាំងរបស់រដ្ឋាភិបាលកណ្ដាល។
នៅឯសន្និសីទសារព័ត៌មានមួយនៅទីក្រុងប៉េកាំង លោក យ៉ាង ហ្គួង អ្នកនាំពាក្យនៃការិយាល័យកិច្ចការបរទេសទទួលបន្ទុកដែនដីហុងកុង និងម៉ាកាវ ហៅបាតុកម្មនោះថា ធ្វើឡើងដោយក្រុមជ្រុលនិយម ដែលជះឥទ្ធិពលធ្ងន់ធ្ងរទៅលើវិបុលភាព ស្ថិរភាពរបស់ទីក្រុងមួយនេះ ព្រមទាំងរុញច្រានហុងកុងឲ្យធ្លាក់ក្នុងស្ថានភាពគ្រោះថ្នាក់។
ក្រុងប៉េកាំងបានប្រកាសថា នៅតែបន្តគាំទ្រការដឹកនាំរបស់អ្នកស្រី Carries Lam ដែលក្រុមបាតុករទាមទារឲ្យចុះចេញពីតំណែងជាមេដឹកនាំដែនដីរដ្ឋបាលពិសេសមួយនេះ ដើម្បីធានាថា សំណើច្បាប់បត្យាប័ននឹងមិនត្រូវបាននាំយកមកជជែក និងអនុម័តនោះឡើយ។
មន្ត្រីជាន់ខ្ពស់មួយរូបទៀតរបស់ក្រុងប៉េកាំង បានចាត់ទុកបាតុកម្មនេះថា ជាវិបត្តិដ៏ធ្ងន់ធ្ងរបំផុតចាប់តាំងពីដែនដីមួយនេះបានវិលត្រឡប់ទៅស្ថិតនៅក្រោមចិនវិញនៅឆ្នាំ១៩៩៧៕
