អន្តរជាតិ

សាកលវិទ្យាល័យមួយនៅហុងកុងចេញមុខការពារនិស្សិតរបស់ខ្លួនដែលពាក់ព័ន្ធបាតុកម្ម

លោក ស៊ុន សុខេន
| ០៨ សីហា ២០១៩
ម៉ោង ២៣:០៧

តំណាងសាស្រ្តចារ្យសាកលវិទ្យាល័យHong Kong Baptist កំពុងអានសេចក្តីថ្លែងការណ៍ទាមទារដោះលែងតំណាងនិស្សិតរបស់ខ្លួនកាលពីថ្ងៃទី៧ខែសីហា ឆ្នាំ២០១៩។ (រូបភាព៖rthk)

សាកលវិទ្យាធិការ និង ក្រុមសាស្ត្រាចារ្យ នៃសាកលវិទ្យាល័យ Hong Kong Baptist បានចេញមុខការពារ និងទាមទារឲ្យសមត្ថកិច្ចហុងកុង ដោះលែងតំណាងនិស្សិតរបស់ខ្លួនដោយគ្មានលក្ខខណ្ឌ ក្រោយពីនិស្សិតរូបនោះត្រូវបានចាប់ខ្លួនពាក់ព័ន្ធនឹងការទិញសម្ភារៈដែលសង្ស័យថាយកទៅប្រើប្រាស់ក្នុងបាតុកម្ម។

កាលពីថ្ងៃពុធម្សិលមិញ ក្រុមសាស្ត្រាចារ្យ និង ថ្នាក់ដឹកនាំ នៅសាកលវិទ្យល័យ Hong Kong Baptist ជាង៤០នាក់ បានចេញសេចក្តីថ្លែងការណ៍មួយដោយហៅការចាប់ខ្លួនប្រធានសហភាពនិស្សិតឈ្មោះ Keith Fong ជារឿងមិនសមហេតុផលទាល់តែសោះ។ ក្រុមសាស្ត្រាចារ្យទាំងនោះ បានរិះគន់ធ្ងន់ៗថាប៉ូលីសហុងកុងបានរំលោភអំណាច និងធ្វើការចាប់ខ្លួនពលរដ្ឋតាមតែអំពើចិត្ត។

តាមការចុះផ្សាយរបស់សារព័ត៌មានRadio Television Hong Kong (rthk) សាកលវិទ្យាធិការនៃសាកលវិទ្យាល័យHong Kong Baptistលោក Roland Chin ក៏បានចេញមុខទៅនិយាយដោយផ្ទាល់ជាមួយសមត្ថកិច្ចឲ្យដោះស្រាយបញ្ហានិស្សិតរបស់ខ្លួនដោយយុត្តិធម៌។ សាកលវិទ្យាល័យ ថែមទាំាងបានអះអាងរកមេធាវីជួយដល់និស្សិតរបស់ខ្លួនផងដែរ។

ជាលទ្ធផល សមត្ថកិច្ចហុងកុងនៅល្ងាចថ្ងៃព្រហស្បតិ៍ បានដោះលែងប្រធានសហភាពនិស្សិតប្រចាំសាកលវិទ្យាល័យHong Kong Baptist ដោយគ្មានលក្ខខណ្ឌ។ នេះបើតាមការចុះផ្សាយរបស់សារព័ត៌មានHong Kong Free Press។

សមត្ថកិច្ចហុងកុង បានចាប់ខ្លួនប្រធានសហភាពនិស្សិតប្រចាំសាកលវិទ្យាល័យHong Baptist លោក Keith Fong នៅពេលដែលរូបគេទិញប៊ិចឡាស៊ែ១០ដើមកាលពីយប់ថ្ងៃអង្គារ។ ប៉ូលីសហុងកុង បានលើកឡើងថាប៊ិចឡាស៊ែទាំងនោះអាចប្រើប្រាស់ជាអាវុធវាយប្រហារសមត្ថកិច្ចនៅពេលបាតុកម្ម៕

រក្សាសិទ្វិគ្រប់យ៉ាងដោយ ស៊ីស៊ីអាយអឹម

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។
ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។