សហមេធាវីការពារក្តីឲ្យអតីតីតបុគ្គលិកវិទ្យុអាស៊ីសេរីទាក់ទងនឹងសំណុំរឿង «ផ្តល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ» បានធ្វើសេចក្តីសន្និដ្ឋានក្នុងអង្គសវនាការនាព្រឹកនេះ ថា តំណាងអយ្យការ មិនមានភស្តុតាងគ្រប់គ្រាន់ ដាក់បន្ទុកលើកូនក្តីរបស់លោកស្របតាមច្បាប់នោះទេ។
ក្នុងសវនាការនៅព្រឹកថ្ងៃនេះ ប្រធានក្រុមប្រឹក្សាជំនុំជម្រះ លោក អ៊ឹម វណ្ណៈ បានឲ្យតំណាងអយ្យការសាលាដំបូងរាជធានីភ្នំពេញ សេង ហ៊ាង និងសហមេធាវី ធ្វើសេចក្តីសន្និដ្ឋាន ម្តងម្នាក់ លើសំណុំរឿងអតីតបុគ្គលិកវិទ្យុអាស៊ីសេរីពីររូបផងដែរ។
ក្នុងសេចក្តីសន្និដ្ឋានថ្ងៃនេះ សហមេធាវីការពារក្តីឲ្យអតីតបុគ្គលិកវិទ្យុអាស៊ីសេរី បានលើកឡើងថា តាមការអានរបាយការណ៍របស់មន្ត្រីនគរបាលយុត្តិធម៌ របាយការណ៍ធ្វើកោសល្យវិច្ច័យ ការជួលបន្ទប់នៅជាន់ខ្ពស់ រួមទាំង សម្ភារប្រើប្រាស់របស់កូនក្តីលោក មិនមានចំណុចណា បង្ហាញថា កូនក្តីលោក បានផ្តល់ការសម្ងាត់ទៅឲ្យរដ្ឋបរទេសធ្វើឲ្យប្រទេសជាតិមានចលាចល និងទទួលបានប្រយោជន៍ពីបរទេសនោះទេ។
ករណីនេះ សហមេធាវីសន្និដ្ឋានទៀតថា នៅក្នុងអង្គច្បាប់មិនមានភស្តុតាងណាដាក់បន្ទុកកូនក្តី ដោយគ្រាន់តែយកព័ត៌មានសាធារណៈផ្សព្វផ្សាយនោះឡើយ មេធាវីទាំងនោះស្នើទៅតុលាការទំលាក់បទចោទលើកូនក្តីរបស់លោកផងដែរ។
ប្រសាសន៍មេធាវីអំឡុងពេលធ្វើសេចក្តីសន្និដ្ឋាន៖ «បើគ្រាន់តែយកព័ត៌មានសាធារណៈផ្សព្វផ្សាយឲ្យសាធារណៈជនបានដឹង បានឮ ហើយមានទោស មិនដឹងថា កម្ពុជា មានគុកដាក់មនុស្សដែរច្រើនដែរឬទេ»។
ទោះជាបែបនេះក្តីតំណាងអយ្យការ លោក សេង ហ៊ាង នៅតែស្នើទៅតុលាការ រក្សាបទចោទដដែល ពីព្រោះអ្នកទាំងពីរនាក់នោះ ពិតជាមានចេតនាទុច្ចរិត យកសម្ភារទៅទុកនៅបន្ទប់ជួលជាន់ខ្ពស់ គ្មានអង់ តែនប្រើ និងងាយស្រួលបញ្ជូនព័ត៌មានទៅឲ្យបរទេស បើកស្ទូតយោកាត់តប្រហែលជា ៣ខែ មិនមានច្បាប់ត្រឹមត្រូវ រួមទាំងរបាយការណ៍របស់មន្ត្រីនគរបាលយុត្តិធម៌ ភស្តុងតាង និងឯកសារបញ្ឈប់ពីបុគ្គលិកវិទ្យុអាស៊ីសេរីជាដើម។
ចំណែកអតីតបុគ្គលិកវិទ្យុអាស៊ីសេរី លោក អ៊ួន ឈិន និងលោក យាង សុធារិន្ទ សំណូមពរទៅចៅក្រមជំនុំ ជំរះ ទម្លាក់បទចោទលើពួកគេទាំងពីរនាក់ ដើម្បីឲ្យពួកគាត់មានសេរីភាពឡើងវិញ។
លោក អ៊ួន ឈិន បានលើកឡើងនៅក្រៅបន្ទប់សវនាការថា គាត់ហាក់មានសង្ឃឹមតិចតួចថា តុលាការនឹងសម្រេចទម្លាក់បទចោទលើពួកគាត់។
លោកមានប្រសាសន៍ថា៖ «បងគ្រាន់តែលួចមានការសង្ឃឹមខ្លះៗ សំខាន់ជាការសម្រេចរបស់តុលាការ ប៉ុន្តែខ្ញុំរំពឹងថា គាត់នឹងផ្តល់យុត្តិធម៌ ហើយទំលាក់ការចោទប្រកាន់ឲ្យយើងមានសេរីភាពពេញលេញនៅថ្ងៃហ្នឹង [ថ្ងៃ៣០ ខែសីហា]»។
រីឯ លោក យាង សុធារិន្ទ ឯណោះវិញ ថ្លែងប្រាប់អ្នកសារព័ត៌មានថា បើតុលាការសម្រេចសេចក្តីឈលើគោលការឯករាជ្យ ពួកគេនឹងរួចផុតពីការចោទប្រកាន់ទាំងនោះ។
លោកមានជំនឿដូចនេះថា៖ «ផ្អែកលើគោលការណ៍យុត្តិធម៌ប្រាកដណាស់ ពួកខ្ញុំនឹងរួចផុតពីការចោទប្រកាន់ទាំងអស់ ពីព្រោះខ្ញុំមើលពីព្រឹកមិញ ទាំងអ៉នះអំណាងទាំងសងខាង គឺការដេញដោលរយៈពេលកន្លងទៅ វាអត់មានចំណុចណា ដែលខ្ញុំយល់ថាបានប្រព្រឹតបទល្មើសដូចការចោទប្រកាន់ទេ ខ្ញុំនៅតែមានសេចក្តីសង្ឃឹមថា តុលាការនឹងផ្តល់យុត្តិធម៌ដល់ពួកខ្ញុំ»។
សរុបមកវិញ នៅព្រឹកថ្ងៃនេះ តុលាការបានលើកយកសំណុំរឿង ចំនួនពីរពាក់ព័ន្ធនឹងបទល្មើស«ផ្តល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ» និងទីពីរបទ«ផលិតវីដេអូអាសអាភាស» ។ ប៉ុន្តែសំណុំរឿងអាសអាភាសនោះ ត្រូវបានតុលាការជំនុំជំរះជាអសាធារណៈ ដោយពុំអនុញាតឲ្យអ្នកតាមដានសង្គម និងអ្នកសារព័ត៌មានចូលស្តាប់នោះទេ។
ទាក់ទងនឹងសំណុំរឿងទាំងនោះខាងលើនេះ អតីតបុគ្គលិកវិទ្យុអាស៊ីសេរី នៅតែអះអាងថា ពួកគេមិនបានធ្វើខុសដូចការចោទប្រកាន់នោះទេ។
ក្រោយពីធ្វើសេចក្តីសន្និដ្ឋាន និងជំនុំជំរះសំណុំរឿងអាសអាភាស ជាអសាធារណៈ គឺប្រធានក្រុមប្រឹក្សាជំនុំជម្រះ លោក អ៊ឹម វណ្ណៈ សម្រេចប្រកាសសាលក្រមលើសំណុំរឿងទាំងពីរខាងលើនេះ នៅថ្ងៃទី៣០ ខែសីហា វេលាម៉ោង៨ : ៣០នាទីព្រឹក។
ក្រោយពីស្តាប់ការសួរដេញដោលក្នុងអង្គសវនាការពេញមួយព្រឹកនេះ មន្ត្រីស៊ើបអង្កេតជាន់ខ្ពស់នៅសមាគមអាដហុក លោក សឹង សែនករុណា កត់សំគាល់ថា សេចក្តីសន្និដ្ឋានរបស់សហមេធាវីការពារក្តីឲ្យអតីតបុគ្គលិកវិទ្យុអាស៊ីសេរី មានប្រៀបច្រើនជាងសេចក្តីសន្និដ្ឋានរបស់តំណាងអយ្យការ។
ប៉ុន្តែលោក ករុណា អះអាងថា បើនៅចុងខែខាងមុខ តុលាការមិនសម្រេចសេចក្តីឈរលើគោលការណ៍ឯករាជ្យរបស់ខ្លួនទេ និងធ្វើឲ្យពលរដ្ឋអស់ជំនឿលើប្រព័ន្ធយុត្តិធម៌នៅកម្ពុជា។
លោក មានប្រសាសន៍ថា«យើងកំពុងតែបាត់បង់ពីជំនឿចិត្តពីប្រជាពលរដ្ឋ និងសាធារណៈជន ឬក៏មតិរបស់អន្តរជាតិស្រាប់ផង ហើយបើយើងនៅតែបន្តសំរេចសេចក្តីមួយទាំងមិនមានភាពត្រឹមត្រូវបែបនេះ យើងដឹងហើយវាកាន់តែមានសភាពធ្ងន់ធ្ងរទៅទៀត ជំនឿចិត្តប្រជាពលរដ្ឋស្ទើរតែលែងមានតែម្តង ហើយគេនឹងមានការខ្លាចរអាខ្លាំងអំពីប្រព័៏ន្ធយុត្តិធម៌ក្នុងប្រទេសកម្ពុជាយើង»។
អតីតបុគ្គលិកអាស៊ីសេរី លោក អ៊ួន ឈិន និងលោក យាង សុធារិន្ទ ត្រូវបានតុលាការសម្រេចដោះលែងឲ្យនៅក្រៅឃុំកាលពីថ្ងៃទី២១ ខែសីហា ឆ្នាំ២០១៨ បន្ទាប់ពីត្រូវបានសមត្ថកិច្ចចាប់ខ្លួនកាលពីពាក់កណ្ដាលខែវិច្ឆិកា ឆ្នាំ២០១៧។ បន្ទាប់ពីការចាប់ខ្លួន ពួកគេត្រូវបានតុលាការចោទប្រកាន់ចំនួនពីរបទល្មើស ដោយទីមួយបទ«ផ្តល់ឱ្យរដ្ឋបរទេសនូវព័ត៌មានជាអាទិ៍ដែលនាំឱ្យអន្តរាយដល់ការការពារជាតិ» និងទីពីរបទ«ផលិតវីដេអូអាសអាភាស» ៕