មន្ត្រីរាជការធ្វើយុទ្ធនាការហូបសាច់ជ្រូកក្រោយពីនាយករដ្ឋមន្ត្រីហ៊ុន សែន ប្រកាសជំរុញឱ្យពលរដ្ឋងាកមកទទួលទានសាច់ជ្រូកឡើងវិញ បំបាត់ការភ័យខ្លាចដើម្បីជួយដល់សេដ្ឋកិច្ចអ្នកចិញ្ចឹម។
កាលពីចុងខែកក្កដា កន្លងទៅក្នុងពេលចុះពិនិត្យការដ្ឋានសាងសង់ពហុកីឡដ្ឋានជាតិមរតកតេជោ ក្នុងខណ្ឌជ្រោយចង្វារ រាជធានីភ្នំពេញ លោក ហ៊ុន សែន បានថ្លែងថាដោយ អំពាវនាវទៅប្រជាពលរដ្ឋឲ្យបន្តទទួលទានសាច់ជ្រូកឡើងវិញ ដោយប្រាប់កុំឲ្យបារម្ភពីផលប៉ះពាល់សុខភាព ពីព្រោះសាច់ជ្រូកដែលលក់នៅលើទីផ្សារសុទ្ធតែឆ្លងការការត្រួតពិនិត្យត្រឹមត្រូវ។
ក្រោយពីមានការប្រកាសអំពាវនាវដោយលោកនាយករដ្ឋមន្ត្រី ក្នុងបណ្ដាញទំនាក់ទំនងសង្គមគេឃើញមានមន្ត្រីរាជការជាច្រើន ចាប់ផ្ដើមធ្វើកម្មវិធីហូបសាច់ជ្រូកនៅតាមមន្ទីរស្ថាប័នខ្លួន ហើយថតរូបផ្សព្វផ្សាយភ្ជាប់ជាមួយសារជំរុញលើកទឹកចិត្តឱ្យពលរដ្ឋទទួលទានសាច់ជ្រូក។
VOD មិនអាចទាក់ទងអ្នកនាំពាក្យក្រសួងកសិកម្មលោក ស្រី វុឌ្ឍីបាននៅឡើយទេ ខណៈអគ្គនាយកនៃអគ្គនាយកដ្ឋានសុខភាពសត្វលោក តាន់ ផាន់ណារ៉ា បិទទូរស័ព្ទក្រោយពេលអ្នកសារព័ត៌មានណែនាំខ្លួនរួច។
យោងតាមអង្គការស្បៀងអាហារ និងកសិកម្មរបស់អង្គការសហប្រជាជាតិហៅកាត់ថាFAO ទោះបីជាជំងឺនេះមិនឆ្លងមកមនុស្សទេ តែវាធ្វើឱ្យប៉ះពាល់ដល់សេដ្ឋកិច្ចអ្នកចិញ្ចឹមជ្រូកធ្ងន់ធ្ងរ។
ប្រធានសមាគមអ្នកចិញ្ចឹមសត្វលោក ស្រ៊ុន ពៅ មានប្រសាសន៍ថាក្រោយមានយុទ្ធនាការនេះធ្វើឡើងកន្លងមក បានធ្វើឱ្យកំណើននៃការទិញលក់សាច់ជ្រូកមានភាពល្អប្រសើរច្រើន បើធៀបទៅនឹងរយៈពេលដែលកម្ពុជាផ្ទុះជំងឺនេះខ្លាំង ទោះជាយ៉ាងណាចំពោះតម្លៃសាច់ជ្រូកវិញនៅមិនទាន់មានភាពល្អប្រសើរដូចនៅពេលដែលជំងឺនេះមិនទាន់ផ្ទុះនៅឡើយ។
លោកថា៖ « លើកមុនយើងលក់បានតែ២០ភាគរយវាឡើងដល់ទៅ៥០ភាគរយឯណោះ។ ដូចថាលើកមុនលក់បាន១០គីឡូ ឥឡូវលក់ឡើងបាន៥គីឡូទៀតហើយ(១៥គីឡូ)។ […] ឥឡូវ(ជ្រូករស់)អាចលក់បានពី៩ពាន់ទៅ១ម៉ឺនរៀល ខណៈដែលមុនផ្ទុះអាចលក់បានពី១ម៉ឺន ទៅ១ម៉ឺន១ពាន់រៀល » ។
ប្រធានសម្ព័ន្ធសហគមន៍កសិករកម្ពុជា លោក ថេង សាវឿន មានប្រសាសន៍ថាការបង្កើតកម្មវិធីហូបសាច់ជ្រូកសុវត្ថិភាពនេះគឺគ្រាន់តែជាការឆ្លើយតបមួយតូចប៉ុណ្ណោះទៅលើបញ្ហាដែលកំពុងកើតមាន។ លោកបន្ថែមថា បញ្ហាដែលធ្វើឱ្យពលរដ្ឋមិនទុកចិត្តលើសាច់ជ្រូកដែលលក់នៅលើទីផ្សារនោះគឺបណ្ដាលមកពីការមិនទុកចិត្តរបស់ពលរដ្ឋទៅលើការងាររបស់មន្ត្រីត្រួតពិនិត្យតែម្ដង។
លោកថា៖ « កន្លងមកអាជ្ញាធរអះអាងច្រើនជាការពារនូវទង្វើ និងអ្វីដែលជាកាតាព្វកិច្ចរបស់អាជ្ញាធរជាជាងផ្ដល់ដំណោះស្រាយជូនប្រជាពលរដ្ឋ ឬក៏ការពារផលប្រយោជន៍របស់ប្រជាពលរដ្ឋ។ ហើយដោយសារទំនុកចិត្តនៃការបរិភោគ និងការជឿជាក់នេះហើយបានជាធ្វើឱ្យការបរិភោគសាច់ក៏ដូចជាការប្រើប្រាស់ផលិតផលផ្សេងៗទៀតនៅកម្ពុជាហ្នឹងគឺមានផលប៉ះពាល់ដល់ប្រជាជន(កាលពីកន្លងមក) » ។
បើតាមលោក ថេង សាវឿន រដ្ឋាភិបាលគួរតែមានវិធានការទប់ស្កាត់បញ្ហាប៉េស្តជ្រូកនេះតាំងពីដំបូងមក មិនគួរពេលដែលវាជៀតចូលដល់កម្ពុជាហើយទើបមានវិធានការបែបនេះនោះទេ។
ជំងឺប៉េស្តជ្រូកអាហ្វ្រិក បានផ្ទុះឡើងកាលពីខែសីហា ឆ្នាំ២០១៨ ក្នុងប្រទេសចិន បានរីករាលដាលដល់ប្រទេសវៀតណាមនៅដើមឆ្នាំនេះ និងបានឆ្លងចូលដល់ខេត្តរតនគិរី នៃប្រទេសកម្ពុជាកាលពីចុងខែមីនាកន្លងទៅ។ គិតមកដល់ពេលនេះជំងឺនេះបានផ្ទុះដល់ខេត្តនៅកម្ពុជាចំនួន៥ហើយ ដែលរួមមាន ខេត្តរតនគិរី ខេត្តកំពង់ចាម ខេត្តតាកែវ ខេត្តស្វាយរៀង និងខេត្តកណ្ដាល។
កាលពីថ្ងៃទី១១ ខែកក្កដា ក្រសួងអះអាងថា មានជ្រូកដែលឆ្លងជំងឺប៉េស្តនេះងាប់ និងត្រូវបានសម្លាប់មានជាង ២ពាន់ក្បាលហើយ ដែលក្នុងនោះជិត ៨រយក្បាល ត្រូវបានរដ្ឋាភិបាលយកទៅបំផ្លាញចោល ដែលតម្លៃខាតបង់ខ្ទង់ ៥០ម៉ឺនដុល្លារអាមេរិក៕