នគរបាលជាតិ បានប្រតិកម្មទៅនឹងលោក សម រង្ស៊ី បន្ទាប់ពីអតីតមេដឹកនាំបក្សប្រឆាំងរូបនេះ បានបង្ហោះសារនៅលើទំព័រហ្វេសប៊ុករបស់លោកថា មេនគរបាលជាតិកម្ពុជា ត្រៀមរត់គេចចេញពីប្រទេសកម្ពុជា។
កាលពីថ្ងៃទី០៩ ខែសីហានេះ លោក សម រង្ស៊ី ដែលអះអាងដោយខ្លួនឯងថាជាប្រធានស្ដីទីគណបក្សសង្គ្រោះជាតិដែលត្រូវបានរំលាយចោលបាត់ទៅហើយនោះ បានបង្ហោះ រូបថត និងសារអត្ថាធិប្បាយថា អគ្គស្នងការនគរបាលជាតិ លោក នេត សាវឿន ត្រៀមចាកចេញពីប្រទេសកម្ពុជា។
លោក សម រង្ស៊ី បានរៀបរាប់ថា៖ «ក្រៅពីលោក នេត សាវឿន មានមន្ត្រីធំៗគណបក្សប្រជាជនកម្ពុជាច្រើននាក់ទៀត ដែលបានទិញសញ្ជាតិបរទេស ហើយត្រៀមរត់ចោលស្រុក ដោយពួកគេដឹងថា របបលោក ហ៊ុន សែន ជិតដល់ទីបញ្ចប់របស់វាហើយ»។
ប៉ុន្តែ សេចក្ដីបំភ្លឺរបស់អ្នកនាំពាក្យនគរបាលជាតិកាលពីថ្ងៃម្សិលមិញនេះ បានចាត់ទុកសាររបស់លោក សម រង្ស៊ី ថា ជាព័ត៌មាន «ប្រឌិត បំផ្លើសបំភ្លៃនូវការពិត» និងជាសារ«ញុះញង់»។
សេចក្ដីបំភ្លឺដដែលនេះ បានច្រានចោលនូវសាររបស់អតីតមេបក្សប្រឆាំងរូបនេះ ហើយថា លោក នេត្រ សាវឿន មិនរត់ចោលស្រុកនោះឡើយ។
សេចក្ដីបំភ្លឺរៀបរាប់ថា៖ «នេត សាវឿន អគ្គស្នងការនគរបាលជាតិ មានតួនាទីដឹកនាំកម្លាំងនគរបាលជាតិគ្រប់លំដាប់ថ្នាក់ក្នុងការថែរក្សាសន្តិសុខ សណ្ដាប់ធ្នាប់សាធារណៈ និងសុវត្ថិភាពសង្គមជូនប្រជាពលរដ្ឋ និងជាពិសេសដឹកនាំកម្លាំងអនុវត្តច្បាប់ដើម្បីតាមចាប់ខ្លួនឧក្រិដ្ឋជន សម រង្ស៊ី និងបក្សពួកតាមអំណាចសាលក្រមរបស់តុលាការ»។
លោក នេត សាវឿន ជាក្មួយប្រសាររបស់លោកនាយករដ្ឋមន្ត្រី ហ៊ុន សែន បន្ទាប់ពីបានរៀបការជាមួយអ្នកស្រី ហ៊ុន គឹមឡេង ដែលជាកូនស្រីរបស់លោក ហ៊ុន ណេង អតីតអភិបាលខេត្តកំពង់ចាម និងបច្ចុប្បន្នជាតំណាងរាស្ត្រមណ្ឌលកំពង់ចាម។
ទោះជាយ៉ាងណា រូបថត ៦សន្លឹកដែលបង្ហោះដោយលោក សម រង្ស៊ី បានបង្ហាញ លោក នេត សាវឿន និងភរិយា ទទួលបានសញ្ជាតិជាពលរដ្ឋនៃដែនដីកោះ Saint Christopher និង Nevis ដោយភ្ជាប់ជាមួយកូនស្រីទាំង ៣នាក់របស់លោកផងដែរ។
សហព័ន្ធ Saint Christopher និង Nevis ឬហៅម្យ៉ាងទៀតថា Saint Kitts និង Nevis គឺជាបណ្ដុំកោះតូចៗចំនួន ២ ស្ថិតនៅឈូងសមុទ្រការ៉ាប៊ីន ឬតំបន់អាមេរិកកណ្ដាល ដែលមានប្រជាជនខ្ទង់ ៥៥,០០០នាក់ប៉ុណ្ណោះ។ បណ្ដុំកោះនេះ ដែលមានផ្ទៃដី ២៦១គីឡូម៉ែត្រការ៉េ ឬតូចជាងផ្ទៃដីរាជធានីភ្នំពេញដល់ទៅជាងពាក់កណ្ដាលទៅទៀតនោះ ស្ថិតនៅក្រោមកិច្ចការពារនៃរដ្ឋាភិបាលអង់គ្លេស។
ប្រទេសដែនដីកោះមួយនេះ បានតម្រូវឲ្យអ្នកស្នើសុំចូលសញ្ជាតិបរិច្ចាគប្រាក់ចន្លោះពី ២៥ម៉ឺនដុល្លារ ទៅ ៣០ម៉ឺនដុល្លារ ចូលទៅក្នុងមូលនិធិឧស្សាហកម្មស្ករស ដើម្បីទទួលបានសញ្ជាតិ។
យោងតាមច្បាប់សញ្ជាតិឆ្នាំ១៩៨៤ របស់ដែនដីកោះមួយនេះ លោក នេត សាវឿន ត្រូវបង់ប្រាក់ដល់ទៅ ៣០ម៉ឺនដុល្លារដើម្បីបានទទួលសញ្ជាតិនៃដែនដីកោះមួយនេះ។
លោក សម រង្ស៊ី ដែលកំពុងរស់នៅនិរទេសខ្លួនឯងនៅបរទេសនោះ បានបង្ហោះសារបែបនេះ បន្ទាប់ពីនគរបាលជាតិ បានប្រកាសកាលពីថ្ងៃទី២៧កក្កដាថា ពួកគេនឹងប្រើគ្រប់មធ្យោបាយ ដើម្បីស្វែងរកចាប់ខ្លួនអតីតមេបក្សប្រឆាំងរូបនេះ៕
