រដ្ឋមន្ត្រីក្រសួងធនធានទឹក និងឧតុនិយម លោក លឹម គានហោ បន្ទោសបញ្ហាទឹកជំនន់ក្នុងរយៈពេលជាង ១សប្ដាហ៍មកនេះ ទៅលើបាតុភូតធម្មជាតិ ខណៈលោកថា ប្រទេសកម្ពុជាមានស្ថានភាពទឹកជំនន់ប្រសើរជាងប្រទេសមួយចំនួននៅក្នុងតំបន់ផងដែរ។
រដ្ឋមន្ត្រីរូបនេះ បានថ្លែងបែបនេះនៅក្នុងក្នុងសន្នីសិទកាសែតនៅទីស្តីការគណៈរដ្ឋមន្ត្រីនៅព្រឹកនេះ តែជាង ១សប្ដាហ៍ប៉ុណ្ណោះក្រោយពីខេត្តព្រះសីហនុ បានលិចលង់ក្រោមទឹកជំនន់។
លោក លឹម គានហោ ថ្លែងថា៖ «វាមិនខុសពីយកកែវមួយចំណុះមួយលីត្រ ចាក់ទឹកមួយលីត្រអត់អីទេ លើសតែមួយលីត្របន្ដិចហៀរកែវហើយ ឱ្យហៀរហៅថា ជំនន់ហើយ នេះជាបញ្ហា! អញ្ចឹង ខ្ញុំអាចឆ្លើយយ៉ាងសាមញ្ញថា មកពីភ្លៀងវាហួសហេតុពេកដែលកន្លែងនោះទីតាំងនោះមិនអាចទទួលយកបាន»។
សកម្មជនបរិស្ថាន លោក សាន ម៉ាឡា ទទួលស្គាល់ការលើកឡើងរបស់លោក លឹម គានហោ ប៉ុន្ដែ លោកថា បញ្ហារបស់មនុស្សដែលបង្កើតឡើងក៏ជាផ្នែកដែលធ្វើឱ្យមានបញ្ហានេះកើតឡើងផងដែរ។ លោកបន្ថែមថា ខេត្តដែលរងផលប៉ះពាល់ធ្ងន់ធ្ងរពីទឹកជំនន់នេះ ភាគច្រើនជាខេត្តដែលមានទំនប់វារីអគ្គិសនីដូចជាខេត្តកំពត ខេត្តរតនៈគិរី និងខេត្តដែលអភិវឌ្ឍលឿនដោយមិនសូវបានគិតគូរពីបរិស្ថាន ដូចជា ខេត្តព្រះសីហនុជាដើម ដែលនេះសុទ្ធតែជាបញ្ហាដែលមនុស្សបង្កើតឡើង។
លោក សាន ម៉ាឡា ប្រាប់ថា៖«ព្រោះពេលណាដែលយើងអភិវឌ្ឍន៍ យើងកសាងទំនប់វារីអគ្គិសនីដោយមិនបានគិតពីផលប៉ះពាល់ច្បាស់លាស់ អញ្ចឹង នៅពេលដែលមានបាតុភូតធម្មជាតិ នៅពេលដែលមានភ្លៀងធ្លាក់ខ្លាំងអញ្ចឹង វានឹងធ្វើឱ្យផ្នែកខាងលើនៃទំនប់វារីអគ្គិសនី។ វាត្រូវបានជន់លិចដោយស្វ័យប្រវត្តិហើយនៅក្នុងលក្ខខណ្ឌថា ប្រសិនជាក្នុងករណីណាមួយដែលទ្វារទំនប់ត្រូវបើកបន្ទាន់ភ្លាមៗធ្វើឱ្យបាក់ទំនប់ ឬមួយក៏យ៉ាងមិចយ៉ាងម៉ាប្រជាពលរដ្ឋដែលរស់នៅផ្នែកខាងក្រោមនោះក៏រងគ្រោះដោយសារតែ ការសាងសង់ទំនប់វារីអគ្គិសនី ឬក៏ការអភិវឌ្ឍន៍ដែលមិនបានគិតស៊ីជម្រៅលើធនធានធម្មជាតិហ្នឹង»។
របាយការណ៍គណៈកម្មាធិការគ្រប់គ្រងគ្រោះមហន្តរាយគិតត្រឹមថ្ងៃ១៤ សីហា ម្សិលមិញឱ្យដឹងថា គ្រោះទឹកជំនន់បានធ្វើឱ្យប៉ះពាល់ដល់ខេត្តចំនួន ៨ ដែលរួមមានខេត្តព្រះសីហនុ កំពត កែប កោះកុង រតនគិរី មណ្ឌលគិរី បាត់ដំបង និងកំពង់ធំ ដែលធ្វើឱ្យប៉ះពាល់ដល់ប្រជាជនជិត ៨ពាន់គ្រួសារ ជម្លៀសទៅកាន់ទីទួលសុវត្ថិភាពជិត ១ពាន់គ្រួសារ ស្លាប់ ៤នាក់ ខូចខាតស្រូវ និងដំណាំរួមផ្សំជាង ១២០០ហិកតា និងប៉ះពាល់ដល់ហេដ្ឋារចនាសម្ព័ន្ធផ្លូវថ្នល់មួយចំនួនទៀត។
ទោះជាយ៉ាងណា អ្នកនាំពាក្យរាជរដ្ឋាភិបាល លោក ផៃ ស៊ីផាន ថា រដ្ឋាភិបាលកំពុងសិក្សាពីបញ្ហាដែលនៅពីក្រោយការលិចលង់នេះផងដែរ។
លោក ផៃ ស៊ីផាន ប្រាប់ថា៖ «អ្វីដែលយើងរៀនសូត្រដូចជា នៅកំពង់សោម ដូចដែលយើងរៀនសូត្រជាបន្កបន្ទាប់ទៀត។ ឥឡូវនេះ គ្រាន់តែដោះទឹកឱ្យធ្លាក់ទៅកន្លែងផ្សេងទៀត ដើម្បីសម្រាលការរស់នៅរបស់មហាជនរបស់យើងទេ ក៏ប៉ុន្តែ បន្ទាប់ពីហ្នឹងមក បានយើងធ្វើការរៀនសូត្រ។ វាពាក់ព័ន្ធដល់ក្រសួងដែនដីនគរូបនីយកម្ម ក្រសួងសាធារណៈការ ក្រសួងដទៃទៀត ដែលយើងនឹងស្រាវជ្រាវតទៅទៀត»។
គិតរហូតមកទល់នឹងពេលនេះ រដ្ឋាភិបាលនៅមិនទាន់វាយតម្លៃពីទំហំខូចខាតដែលកើតចេញពីផលប៉ះពាល់នៃទឹកជំនន់នេះនៅឡើយទេ៕