សមាជិកព្រឹទ្ធសភាគណបក្សប្រជាជនកម្ពុជាមួយរូបដែលមានក្តីក្តាំជាមួយធនាគារវៀតណាម ហៅការផ្សព្វផ្សាយលក់ឡៃឡុងអចលនទ្រព្យរបស់ខ្លួនជាង២០កន្លែង ថាបានធ្វើឲ្យប៉ះពាល់យ៉ាងធ្ងន់ធ្ងរដល់កិត្តិយសរបស់លោកស្រី ហើយក៏ជាការបំបាក់ស្មារតី និងដើម្បីលេបយកទ្រព្យសម្បត្តិក្រុមហ៊ុនផងដែរ។
យោងតាមលិខិតលើទំព័រហ្វេសប៊ុករបស់លោកស្រីកែវម៉ាលីដែលចេញកាលពីថ្ងៃ១៥ ខែសីហា ម្សិលមិញ ក្រុមហ៊ុន កែវ ម៉ាលី គ្រុប អះអាងថាព័ត៌មានទាំងនោះពុំទាន់ជាក់លាក់និងច្បាស់ការនោះឡើយ។ ប្រភពដដែលឲ្យដឹងថាភាគីក្រុមកែវ ម៉ាលី គ្រុប បានប្តឹងជំទាស់ទៅសាលាឧទ្ធរណ៍ ដែលមានន័យថាសាលាដំបូងរាជធានីភ្នំពេញមិនអាចបន្តនីតិវិធីបានទេ ដោយរង់ចាំសេចក្តីសម្រេចរបស់សាលាឧទ្ធរណ៍សិន។
លិខិតដដែលចាត់ទុកការផ្សព្វផ្សាយព័ត៌មាននោះ ជាការបំបាក់ស្មារតី ដើម្បីលេបយកដី និងទ្រព្យសម្បត្តិរបស់ក្រុមហ៊ុនកែវ ម៉ាលី គ្រុប ។
ខ្លឹមសារក្នុងលិខិតនោះមានអត្ថន័យថា៖ «ក្រុមហ៊ុនរបស់លោកស្រី កែវ ម៉ាលី ចាត់ទុកការទម្លាយព័ត៌មានពាក់ព័ន្ធការលក់ឡាយឡុងពីខាងធនាគារវៀតណាម ដែលពុំទាន់ជាក់លាក់ទាំងអស់នេះ វាបានធ្វើឱ្យប៉ះពាល់កិត្តិយស និងសេចក្តីថ្លៃថ្នូរ របស់លោកស្រី កែវ ម៉ាលី ប្រធានក្រុមហ៊ុន យ៉ាងធ្ងន់ធ្ងរ ក៏ដូចជាការបំបាក់ស្មារតី
ដើម្បីលេបយកដី និង ទ្រព្យសម្បត្តិរបស់ក្រុមហ៊ុនទាំង២៦ប័ណ្ណ ពីតម្លៃខ្ពស់ជាង ២០លានដុល្លា មកត្រឹមទាបជាង ៧លានដុល្លាប៉ុណ្ណោះ»។
កាលពីថ្ងៃទី០១ ខែសីហា សាលាដំបូងរាជធានីភ្នំពេញ បានប្រកាសជាសាធារណៈអំពីការលក់ឡៃឡុងលើអចលវត្ថុក្រុមហ៊ុនលេនប្រផឹធី អិលធីឌី របស់លោកស្រី កែវ ម៉ាលី និងលោកស្រី កែវ ស៊ុយឆេង ចំពោះដី និងអាគារ ចំនួន ២៦កន្លែង ក្នុងតម្លៃលក់អប្បបរមាជាង៧លាន ២សែនដុល្លារ។
វីអូឌី បានទំនាក់ទំនងទៅបុគ្គលិកធនាគារវិនិយោគ និងអភិវឌ្ឍន៍កម្ពុជា (BIDC) របស់វៀតណាមដែរ នៅថ្ងៃនេះ ប៉ុន្តែពួកគេឆ្លើយយ៉ាងខ្លីថា មិនបានដឹងរឿងនេះទេ។
មេធាវី សំ សុគង់ ពន្យល់តាមនីតិវិធីច្បាប់ថា ការលក់ឡាយឡុងទ្រព្យសម្បត្តិរបស់កូនបំណុលបាន លុះត្រាតែមានសាលក្រម ឬសាលដីការបស់តុលាការចេញជាស្ថាពរ។ លោកបញ្ជាក់ថា ទ្រព្យដែលលក់នោះ ត្រូវកំណត់តម្លៃសមស្របតាមទីផ្សារបច្ចុប្បន្ន និងមានការការវាយតម្លៃត្រឹមត្រូវពីក្រុមហ៊ុនអចលនាទ្រព្យ ទើបផ្តល់ភាពយុត្តិធម៌ដល់គូភាគី។
លោកពន្យល់ថា៖«ការលក់ឡាយឡុង ត្រូវមានការវាយតម្លៃជាមុន បើសិនជាអត់មានការវាយតម្លៃជាមុនទេ ជាការអនុវត្តនីតិវិធីមិនស្របទៅតាមច្បាប់ទេ នៅពេលដែលយើងអនុវត្តនីតិវិធីមិនស្របតាមច្បាប់ វាប៉ះពាល់ធ្ងន់ជាងគេ គឺផលប្រយោជន៍ ប្រសិនបើរឿងរដ្ឋប្បវេណីវាប៉ះពាល់ដល់ផលប្រយោជន៍របស់ភាគីទាំងសងខាង កាលណាយើងមិនអនុវត្តតាមនីតិវិធីច្បាប់ ដូចយើងដឹងហើយ ដូចតម្លៃផ្ទះគាត់១០ម៉ឺន ហើយយើងលក់ឲ្យគាត់១ម៉ឺនដុល្លារ វាប៉ះពាល់នូវទ្រព្យសម្បត្តិឬផលប្រយោជន៍អ្នកចាញ់ក្តីដ៏ធ្ងន់ធ្ងរ»។
គួរបញ្ជាក់ថា ក្រុមហ៊ុន លេនប្រផឹធី មានឈ្មោះម្ចាស់កម្មសិទ្ធិករ ចំនួនពីរនាក់ គឺឈ្មោះ លោកស្រី កែវ មាលី និងលោកស្រី កែវ ស៊ុយឆេង សរុបមានចំនួន២៦កន្លែង។
ក្នុងចំណោមអចលនទ្រព្យទាំង២៦កន្លែងនោះ មាន២០កន្លែង ស្ថិតនៅខុនដូវិមាន កែវចរណៃ ក្នុងភូមិតាង៉ូវ សង្កាត់និរោធ ខណ្ឌមានជ័យ រាជធានីភ្នំពេញ។ ចំណែក៦កន្លែងទៀត ស្ថិតនៅមូលដ្ឋានដូចគ្នា ប៉ុន្តែនៅក្រៅវិមានកែវចរណៃ៕
សេចក្ដីកែតម្រូវ៖ សារព័ត៌មានវីអូឌីសូមកែតម្រូវថា អ្នកស្រី កែវ សុម៉ាលី បច្ចុប្បន្ននេះមិនមែនជាសមាជិកព្រឹទ្ធសភាទៀតនោះឡើយ។