រដ្ឋាភិបាលហុងកុង បាននិយាយថា មន្ត្រីប៉ូលិសប្រហែល ១៨០នាក់ បានរងរបួសអំឡុងបាតុកម្មទីក្រុងហុងកុងកាលពីថ្ងៃម្សិលមិញនេះ ខណៈដែលសមាជិកគ្រួសាររបស់ពួកគេ បានទទួលរងការប្រមាថមើលងាយផងដែរ។ នេះបើតាមការចុះផ្សាយរបស់សារព័ត៌មានសិង្ហបុរី Channel News Asia នៅថ្ងៃនេះ។
សារព័ត៌មានមួយនេះ បានចុះផ្សាយបែបនេះតាមរយៈការដកស្រង់សម្ដីអ្នកនាំពាក្យរដ្ឋាភិបាលទីក្រុងហុងកុង ដែលបានបង្ហាញការសោកស្ដាយចំពោះបាតុកម្មកាលពីថ្ងៃម្សិលមិញនេះ។ រដ្ឋាភិបាលទីក្រុងហុងកុង បានហៅបាតុកម្មរបស់ពលរដ្ឋកាលពីថ្ងៃម្សិលមិញនេះថា សំដៅទៅលើប៉ូលិស។
ទីក្រុងហុងកុងបានជាប់គាំងក្នុងចលនាបាតុកម្មរបស់ប្រជាជនអស់រយៈពេលជាង ៤ខែមកហើយចាប់តាំងពីចុងខែមីនាកន្លងមក ដែលការតវ៉ាជំទាស់ទៅនឹងគម្រោងបង្កើតច្បាប់បត្យាប័ន។ សំណើច្បាប់ដែលត្រូវបានរដ្ឋាភិបាលទម្លាក់ចោលទៅហើយនោះ ត្រូវបានចាត់ទុកជាវិធីដែលជួយឲ្យរដ្ឋាភិបាលក្រុងប៉េកាំងអាចបង្ក្រាបលើក្រុមអ្នករិះគន់មានមូលដ្ឋាននៅទីក្រុងហុងកុង។
ក្រុមអ្នករៀបចំបាតុកម្មឈ្មោះថា រណសិរ្សសិទ្ធិមនុស្សស៊ីវិល (CHRF) បានចាត់ទុកបាតុកម្មនាចុងសប្ដាហ៍កន្លងមកនេះថា ជាការតវ៉ាដោយអហិង្សា ដែលប្រមូលផ្ដុំទៅដោយបាតុកររាប់រយពាន់នាក់ ច្រើនជាងចំនួនពលរដ្ឋតវ៉ាកាលពីខែមិថុនា និងខែកក្កដាទៅទៀត។
ក្រុមបាតុករបានប្រមូលផ្ដុំគ្នានៅឧទ្យាន Victoria កាលពីថ្ងៃម្សិលមិញ ដើម្បីបង្ហាញទៅមេដឹកនាំទីក្រុងហុងកុងថា ចលនាបាតុកម្មរបស់ពួកគេនៅតែទាក់ទាញការគាំទ្រពីសាធារណជន បើទោះបីជាប្រឈមនឹងការបង្ក្រាបដោយហិង្សាក៏ដោយ។
តែយ៉ាងណា អ្នកនាំពាក្យរដ្ឋាភិបាលទីក្រុងហុងកុង បាននិយាយថា ប៉ូលិសបានប្រើប្រាស់កម្លាំងក្នុងកម្រិតទាបបំផុត នៅពេលដែលពួកគេគ្មានជម្រើសណាមួយនោះ៕
