ក្រុមកម្មកររោងចក្រកាត់ដេរ ហ៊ឹង ជីង បានចោទថៅកែ និងរដ្ឋបាលរោងចក្រនេះថា បានប្រើអំពើហិង្សាទៅលើពួកគេអំឡុងពេលពួកគេតវ៉ាទាមទារប្រាក់អតីតភាពការងារកាលពីថ្ងៃសុក្រសប្ដាហ៍មុន ប៉ុន្តែ ភាគីរោងចក្របានច្រានចោលការចោទប្រកាន់នេះ។
ក្រុមកម្មករប្រហែល ៤០នាក់ ដែលបម្រើការងារនៅរោងចក្រ ហ៊ឹង ជីង លើសពី ៥ឆ្នាំមកហើយនោះ បានផ្ទុះការតវ៉ានៅមុខច្រកចូលនៃរោងចក្រនេះកាលពីព្រឹកថ្ងៃទី១៦ ខែសីហាកន្លងមកនេះ ដើម្បីទាមទារឲ្យថៅកែរោងចក្របើកប្រាក់រម្លឹកអតីតភាពការងារ ដែលក្រុមកម្មករអះអាងថា ថៅកែមិនទាន់បើកឲ្យពួកគេ។
លោក គឹម ឫទ្ធី ជាគណនេយ្យករនៅរោងចក្រ និងជាតំណាងរបស់ក្រុមកម្មករ បានឲ្យដឹងថា កូដកម្មរបស់ក្រុមកម្មករបានឈានដល់ការប៉ះទង្គិចគ្នា បន្ទាប់ពីការប្រទាញប្រទង់គ្នារវាងក្រុមកម្មការិនី និងមន្ត្រីរដ្ឋបាល និងថៅកែរោងចក្រ។
កម្មកររូបនេះ បានឱ្យដឹងថា បុគ្គលិករដ្ឋបាលរោងចក្រឈ្មោះ អួយ ណៃស៊ីម បានទាញកម្មករឱ្យចូលធ្វើការដោយបង្ខំ ខណៈពួកគេកំពុងឈរតវ៉ាមុខរោងចក្រ ហើយបន្ទាប់មករួចថៅកែរោងចក្រជនជាតិចិន លោក តាយ ជីនចែរ៍ បានមកដល់ក៏រុញបន្ថែម ធ្វើឱ្យពួកគេដួល និងរងរបួស។
លោក គឹម ឫទ្ធី រៀប់រាប់ថា៖ «គាត់[កម្មករ]ឈរតវ៉ាឈរគៀនៗ គាត់[រដ្ឋបាលរោងចក្រ]ទាញមកទីណាត់ទីណែងប៉ះក៏រុញចុះរុញឡើងទៅស្រាប់តែខាងថៅកែរោងចក្រហ្នឹងវាមកពីក្រោយវារុញបន្ថែមហ្មង»។
លោកបញ្ជាក់បន្ថែមថា កម្មការិនី ២នាក់ បានរបួសមេជើង ថ្លោះដៃ និងរលាត់ផ្ទៃមុខ ខណៈដែលមន្ត្រីរដ្ឋបាលរោងចក្រ អ្នកនាង អួយ ណៃស៊ីម រងរបួសរលាត់ក្បាលជង្គង់ទាំងសងខាង។
លេខាសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា (ស៊ីខាវឌូ)ប្រចាំនៅរោងចក្រ ហ៊ឹង ជីង កញ្ញា ពៅ លីណា ដែលបានរងរបួសនោះ បានចោទអ្នកនាង ណៃស៊ីម បានបង្ករបួសស្នាមលើផ្ទៃមុខរបស់កម្មការិនីអំឡុងពេលប្រទាញប្រទង់នោះ ហើយកញ្ញាបានស្នើឲ្យពន្លឿនដំណោះស្រាយទៅតាមការទាមទាររបស់ក្រុមកម្មករ។
អ្នកនាង អួយ ណៃស៊ីម បានបដិសេធចំពោះការចោទប្រកាន់ខាងលើ និងអះអាងថា ពួកគេបានប្រើហិង្សាទៅលើខ្លួន ហើយចោទក្រុមកម្មករវិញថា ប៉ុនប៉ងបិទច្រកចូលរោងចក្រដោយមិនព្រមយោគយល់ទទួលយកដំណោះស្រាយដែលខាងរោងចក្រផ្តល់ឱ្យ។
លោកស្រី ណៃស៊ីម ប្រាប់ថា៖ «រោងចក្រអត់ទាន់មានលុយគុណចែកឱ្យគាត់។ រោងចក្ររកដំណោះស្រាយឱ្យគាត់ដែរ ប្រាប់ដែរថា សុំពន្យាពេលថ្ងៃនេះៗ ដើម្បីឱ្យខាងក្រុមហ៊ុនរកលុយមកបើកឱ្យកម្មករសិន តែកម្មករគាត់អត់ជឿទុកចិត្ត។ គាត់បាតុកម្ម ១ខែបួនដង»។
ក្រុមកម្មករ និងមន្ត្រីរដ្ឋបាលរោងចក្រនេះ សុទ្ធតែអះអាងថា ពួកគេបានដាក់បណ្ដឹងទៅប៉ុស្តិ៍នគរបាលរដ្ឋបាលសង្កាត់ស្ទឹងមានជ័យ២ ក្រោយពីពួកគេបានប៉ះទង្គិចគ្នាកាលពីសប្ដាហ៍មុន។
មេប៉ុស្តិ៍រដ្ឋបាលសង្កាត់ស្ទឹងមានជ័យ២ លោក ណេង សាមឿន បានឱ្យដឹងថា លោកបានទទួលបណ្តឹងពីភាគីសងខាងហើយ និងកំពុងកោះហៅភាគីពាក់ព័ន្ធឱ្យចូលខ្លួនមកធ្វើការដោះស្រាយ។
មន្រ្តីសម្របសម្រួលផ្លូវច្បាប់សហជីពស៊ីខាវឌូ លោក គឹម មករា ឱ្យវីអូឌីដឹងថា ភាគីរោងចក្រតែងតែលើកឡើងពីបញ្ហាហិរិញ្ញវត្ថុរបស់ខ្លួន មិនអាចដោះស្រាយតាមការទាមទាររបស់កម្មករ។
លោក មករាថា៖ «រោងចក្រហ្នឹង គាត់ប្រើភាសាមួយថា អត់មានលទ្ធភាព អត់មានលុយណាបើកឱ្យទេ ហើយគាត់ថា រោងចក្រខាតជារៀងរាល់ខែ។ អីចឹង ចំណុចនេះ គ្រាន់តែជាការគេចវេសរបស់និយោជកទេ»។
លោក មករា បន្ថែមថា បើនៅតែគ្មានដំណោះស្រាយទៀត លោក និងកម្មករ អាចនឹងប្រើវិធីដើរចុះផ្លូវតវ៉ាទៅកាន់ក្រសួងការងារ ឬផ្ទះលោកនាយករដ្ឋមន្រ្តី ហ៊ុន សែន។
ទោះយ៉ាងណា នៅម៉ោង ២រសៀលថ្ងៃចន្ទនេះ មន្ត្រីសហជីពរូបនេះ បានឲ្យដឹងថា ខាងភាគីក្រសួង ថៅកែរោងចក្រ និងកម្មករ កំពុងធ្វើការដោះស្រាយគ្នា ប៉ុន្តែ រហូតមកទល់ពេលនេះ ខាងវីអូឌីមិនទាន់ទទួលបានព័ត៌មានស្តីពីដំណោះស្រាយថាយ៉ាងណានៅឡើយទេ។
កាលពីឆ្នាំ២០១៨ ក្រសួងការងារបានផ្លាស់ប្តូរនីតិវិធីអនុវត្តការទូទាត់ប្រាក់អតីតភាពការងារជូនកម្មករនិយោជិកក្នុងវិស័យវាយនភណ្ឌកាត់ដេរ និងផលិតស្បែកជើង ពីការបើកសរុបនៅពេលបញ្ចប់ការងាររបស់កម្មករ មកបើកជាទៀងទាត់ក្នុង ១ឆ្នាំ ២ដងវិញ ហើយត្រូវអនុវត្តជាដំណាក់កាលទាំងប្រាក់អតីតភាពការងារថ្មី និងប្រាក់អតីតភាពការងារមុនឆ្នាំ២០១៩ ដោយចាប់ពីខែ មិថុនា ឆ្នាំ២០១៩៕