ក្រសួងរៀបចំដែនដី នគររូបនីយកម្ម និងសំណង់ នៅតែរក្សាជំហរមិនផ្ដល់ដំណោះស្រាយដល់ប្រជាពលរដ្ឋ ១៩៧គ្រួសារ ដែលអះអាងថា មានជម្លោះដីធ្លីជាមួយក្រុមហ៊ុនចម្ការអំពៅ ហេង ហ៊ុយ នៅស្រុកស្រែអំបិល ខេត្តកោះកុងនោះឡើយ បើទោះបីជាពលរដ្ឋទាំងនោះ បន្តនាំគ្នាឡើងមកតវ៉ានៅភ្នំពេញយ៉ាងណាក៏ដោយ។
កាលពីម្សិលមិញនេះ ពលរដ្ឋប្រហែល ១០០នាក់ ដែលអះអាងថា ជាតំណាងឲ្យពលរដ្ឋ ១៩៧ គ្រួសារមកពីឃុំជីខលើ និងជីខក្រោម បានឡើងមកតវ៉ាមុខក្រសួងរៀបចំដែនដីជាថ្មីទៀត ដើម្បីស្វែងរកដំណោះស្រាយវិវាទដីធ្លីពីរដ្ឋមន្ត្រីដែនដី លោក ជា សុផារ៉ា ក៏ដូចជាអន្តរាគមន៍ពីលោកនាយករដ្ឋមន្ត្រី ហ៊ុន សែន ផងដែរ។
ប៉ុន្តែ នៅក្នុងសេចក្ដីប្រកាសព័ត៌មា ក្រសួងដែនដីបានបដិសេធជាថ្មីទៀតមិនទទួលដោះស្រាយវិវាទដីធ្លីរបស់ពលរដ្ឋទាំងនោះទេ ហើយនៅតែអះអាងថា ទីតាំងដីធ្លីដែលពលរដ្ឋទាំងនោះទាមទារ គឺជាកម្មសិទ្ធិរបស់ក្រុមហ៊ុន ហេង ហ៊ុយ ដែលត្រូវបានដោះស្រាយរួចរាល់ហើយ។
កាលពីខែកក្តដា ក្រសួងរៀបចំដែនដីបានបដិសេធ ២លើករួចមកហើយចំពោះដំណោះស្រាយវិវាទដីធ្លីសម្រាប់ពលរដ្ឋមកពីខេត្តកោះកុងទាំងនោះទេ ហើយក្រសួងក៏បានប្រាប់ទៅសមត្ថកិច្ចឲ្យចាត់វិធានការផ្លូវច្បាប់ចំពោះពលរដ្ឋទាំងនោះទៀតផង។
បច្ចុប្បន្ននេះ ពលរដ្ឋ ១០នាក់ក្នុងចំណោមពលរដ្ឋទាំង ១៩៧ គ្រួសារនោះ ត្រូវបានតុលាការខេត្តកោះកុង កោះហៅជាបន្តបន្ទាប់ ទៅតាមបណ្ដឹងចោទប្រកាន់ពីបទបរិហារកេរ្តិ៍ជាសាធារណៈដែលប្ដឹងឡើងដោយលោក ហេង ហ៊ុយ ដែលជានាយកក្រុមហ៊ុនចម្ការស្ករអំពៅមួយនេះ៕