មន្ត្រីជាន់ខ្ពស់មួយរូបនៃក្រសួងកសិកម្ម ត្រូវបានតុលាការខេត្តមណ្ឌលគិរីកោះហៅឲ្យចូលបំភ្លឺនៅថ្ងៃស្អែកនេះ ពាក់ព័ន្ធនឹងការផ្ដល់ដីជាច្រើនកន្លែងដល់ក្រុមហ៊ុនឯកជនមួយ។
ក្នុងដីកាកោះហៅចេញកាលពីថ្ងៃទី៥ ខែសីហា ព្រះរាជអាជ្ញានៃសាលាដំបូងខេត្តមណ្ឌលគិរី លោក ហៀង សុភក្ត្រ បានកោះហៅអនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ លោក ឡោ រស្មី ឲ្យចូលបំភ្លឺនៅថ្ងៃស្អែកនេះ។
ក្នុងដីកាដដែលនោះ តុលាការខេត្តមណ្ឌលគិរីគ្រោងសាកសួរលោក ឡោ រស្មី ឲ្យបំភ្លឺពាក់ព័ន្ធនឹងការផ្ដល់ដី ៥កន្លែងមានទំហំសរុបដល់ទៅជាង ៩ពាន់ហិកតា ទៅឲ្យក្រុមហ៊ុន ផេស៊ីហ្វិក ហ្គ្រេន នៅក្នុងខេត្តមណ្ឌលគិរី។
អនុរដ្ឋលេខាធិការក្រសួងកសិកម្ម រុក្ខាប្រមណ និងនេសាទ លោក ឡោ រស្មី សុំមិនធ្វើអធិប្បាយលើរឿងនេះទេ ពេលសួរនាំពាក់ព័ន្ធការកោះហៅរបស់តុលាការខេត្តមណ្ឌលគិរី ដោយលោកថា ជាប់រវល់នៅខាងក្រៅ៕