ប្រមុខដឹកនាំទីក្រុងហុងកុង លោកស្រី Carrie Lam បានថ្លែងថា លោកស្រីនឹងបង្កើតកិច្ចសន្ទនាមួយជាមួយក្រុមបាតុករ ដើម្បីស្តារស្ថានការណ៍ដែលកំពុងជាប់គាំង បន្ទាប់ពីចលនាបាតុកម្ម បានបន្តអូសច្រើនខែ។ នេះបើយោងតាមប្រភពព័ត៌មានពី ទូរទស្សន៍ TRTWorld របស់ទួគី ចេញផ្សាយថ្ងៃអង្គារ៍។
យោងតាមប្រភពដដែល លោកស្រី Carrie Lam មានប្រសាសន៍ថា៖ «យើងនឹងចាប់ផ្តើមធ្វើការបង្កើតកម្មវិធីជាបន្ទាន់មួយសម្រាប់កិច្ចសន្ទនា។ ខ្ញុំសង្ឃឹមថា វាគឺជាការចាប់ផ្តើមនៃការទាញស្ថានការវឹកវរក្នុងសង្គមឱ្យវិលទៅរកភាពប្រក្រតី និងជៀសផុតពីអំពើហិង្សា»។
ការថ្លែងបែបនេះរបស់ប្រមុខដឹកនាំលោកស្រី Lam គឺធ្វើឡើងបន្ទាប់ពីចលនាបាតុកម្មចុះផ្លូវតវ៉ានៅតែបន្តអូសបន្លាយ និងបង្កជាអំពើហិង្សារវាងក្រុមបាតុករ និងប៉ូលីស អស់រយៈពេល៤ខែ ដោយផ្តើមពីការទាមទារលុបចោលសំណើច្បាប់ធ្វើបត្យាបណ្ណជនជាប់សង្ស័យហុងកុងទៅកាត់ក្តីនៅប្រទេសចិន នៅចុងខែមិនា។
លោកស្រីបន្ថែមថា កម្មវិធីសន្ទនានោះ នឹងបើកផ្លូវតភ្ជាប់ទំនាក់ទំនងរវាងរដ្ឋាភិបាលនៃដែនកោះមួយនេះ ជាមួយក្រុមបាតុករមហាជន ក្នុងការស្វែងយល់ពីការពិតនៅពីក្រោយមូលហេតុបង្កឱ្យមានបាតុកម្មទាមទារឱ្យលោកស្រីលាលែងពីតំណែង និងការបង្ក្រាបដោយហិង្សាពីសំណាក់ប៉ូលីសទៅលើក្រុមបាតុករ។
ចាប់ពីខែឧសភា មក បាតុករជាង៧០០ នាក់ ត្រូវបានចាប់ខ្លួន ខណៈក្រុមប៉ូលីសរងការរិះគន់ថាបានប្រើវិធីបង្ក្រាបហិង្សាកាន់តែខ្លាំងឡើងនាពេលកន្លងមកដើម្បីបំបែកហ្វូងបាតុករ ប៉ុន្តែ នៅថ្ងៃអាទិត្យសប្តាហ៍មុន វត្តមានរបស់ពួកគេ ត្រូវគេមើលឃើញមានចំនួនតិចតួច និងពុំមានបាតុករណាម្នាក់ត្រូវបានចាប់ខ្លួន៕