អគ្គនាយកដ្ឋានពន្ធដារ លោក គង់ វិបុល ប្រកាសចាត់វិធានការប្រឆំាងអំពើពុករលួយ ដោយថា ដើម្បីបន្តជំរុញយន្តការធ្វើកំណែទម្រង់របស់ខ្លួន ធានាដល់ប្រសិទ្ធិភាពនៃការប្រមូលពន្ធ ខណៈសហភាពអឺរ៉ុបគំរាមកាត់ផ្តាច់ប្រព័ន្ធអនុគ្រោះពន្ធ។
លោក គង់ វិបុល ក្នុងពិធីផ្សព្វផ្សាយច្បាប់ស្តីពីអំពើពុករលួយ នៅថ្ងៃចន្ទម្សិលមិញ ក្នុងរាជធានីភ្នំពេញ មានប្រសាសន៍ថា ការប្រមូលពន្ធ ៥ឆ្នាំមកនេះ មានការកើនឡើងជាបន្តបន្ទាប់លើសពីផែនការកំណត់នៃថវិកាជាតិ។ លោកថា កំណើននេះកើតឡើងក្រោយពីមានការធ្វើកំណែទម្រង់ទប់ស្កាត់អំពើពុករលួយ។
លោក គង់ វិបុល អះអាងទៀតថា កន្លងទៅមន្ត្រីខិលខូចខ្លះ ត្រូវរ៉ូវជាមួយអ្នកជាប់ពន្ធ ឯខ្លះទៀតទារពីអ្នកជាប់ពន្ធច្រើនជាងចំនួនដែលតម្រូវឲ្យបង់ចូលថវិការដ្ឋ និងខ្លះទៀតបង្កការលំបាកដល់អ្នកបង់ពន្ធ ដើម្បីទារកម្រៃក្រៅផ្លូវការណ៍ដែលលោកថាជាអំពើពុលរលួយ។
មន្ត្រីជាន់ខ្ពស់នៅស្ថាប័នប្រមូលពន្ធមួយនេះ ព្រមានថា វិធានការធ្វើកំណែទម្រង់នៅតែបន្ត តាមរយៈសហការជាមួយអង្គភាពប្រឆាំងអំពើពុករលួយ ដើម្បីធានាពីប្រសិទ្ធភាពនៃការប្រមូលពន្ធនេះ។
លោក គង់ វិបុល ថ្លែងថា៖ «ត្រូវជម្រះគ្នានៅថ្ងៃនេះថាកន្លែងពន្ធដារមិនមែនជាកន្លែងខ្លាញ់សម្រាប់មកប្រមូលលុយសម្រាប់ខ្លួនទេ ប្រមូលលុយសម្រាប់រដ្ឋ។ ដូច្នេះ រដ្ឋាភិបាលបានដាក់ចេញ និងបង្កើតអង្គភាពប្រឆាំងអំពើពុករលួយនេះ គឺដើម្បីពង្រឹងអភិបាលកិច្ចល្អសម្រាប់រដ្ឋទាំងមូល»។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង ថ្លែងក្នុងពិធីនេះថា វិធានការនៅតែបន្តចាត់វិធានការទៅលើមន្ត្រីខិលដូចដែលធ្វើឲ្យខាតប្រយោជន៍ជាតិ។
លោក ឱម យ៉ិនទៀង ថ្លែងថា៖ «សូមកុំភ្លេចថា ទារ ឬទទួល ទទួលតាមបែបណាក៏ដោយជាប់ហើយ[បទអំពើពុករលួយ]សូកវិញយ៉ាងម៉េង? ជូន ឬសន្យាជូន គ្រាន់តែសន្យាឲ្យជាប់បទសូកបាត់ហើយ សូមប្រយ័ត្ន!»។
សហភាពអឺរ៉ុបបានបញ្ចប់នីតិវិធ ៦ខែដំបូងរបស់ខ្លួនត្រឹមថ្ងៃទី១២សីហានេះ លើវិធានាការព្យួរ EBA ហើយត្រូវប្រើពេល ៦ខែទៀត ទើបសម្រេចថា ព្យួរ ឬមិនព្យួរ អាស្រ័យលើកការព្យាយាមស្តារសិទ្ធិមនុស្ស និងប្រជាធិបតេយ្យឡើងវិញតាមលក្ខណ្ឌរបស់ខ្លួន។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជា លោក សន ជ័យ ហៅវិធានការនេះថា អាចនឹងជោគជ័យទៅបានលុះណានីតិវិធនៃការប្រមូលពន្ធ លុបបំបាត់នូវភាពស្មុកស្មាញដល់អ្នកជាប់ពន្ធ ហើយត្រូវធានាថា ទាំងអ្នកមានទាំងអ្នកក្រ និងអ្នកមានអំណាចផង ត្រូវជាប់កាតព្វកិច្ចបង់ពន្ធដូចគ្នា។
លោក សន ជ័យ ប្រាប់ថា៖ «ដើម្បីធានានូវប្រសិទ្ធភាពនៃការធ្វើកំណែទម្រង់ពន្ធដារ ពិសេសការទប់ស្កាត់កុំឲ្យមន្ត្រីរបស់ខ្លួនមានការពាក់ព័ន្ធពីអ្នកទារលុយក្រោមតុ[ទារលុយក្រៅច្បាប់]ពីអ្នកបង់ពន្ធការពង្រឹងនៃការប្រមូលពន្ធជាពិសេសធ្វើឲ្យមានភាពសាមញ្ញនៃនីតិវិធីនៃការប្រមូលពន្ធ និងការប្រមូលពន្ធគឺជារឿងចាំបាច់»។
លោក គង់ វិបុល ជាទីប្រឹក្សាផ្ទាល់របស់លោកនាយករដ្ឋមន្រ្តី ហ៊ុន សែន ត្រូវបានតែងតាំងជាអគ្គនាយកនៃអគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ ចាប់តាំងពីឆ្នាំ២០១២។
ប៉ុន្ត មន្ត្រីស្និទ្ធនឹងលោកនាយករដ្ឋមន្ត្រី ហ៊ុន សែន នេះ ត្រូវបានសារព័ត៌មានអូស្រ្តាលីចុះផ្សាយកាលឆ្នាំ២០១៧ថា ជាប់ពាក់ព័ន្ធនឹងបទក្លែងបន្លំថា ជាអ្នករស់នៅប្រទេសអូស្រ្តាលី ហើយបើកអាជីវកម្មគេចពន្ធ និងការផ្ទេរលុយរាប់លានដុល្លារពីកម្ពុជា ដែលអាចនឹងជាប់ពន្ធនាគាររយៈពេល ២ឆ្នាំ និងពិន័យជាប្រាក់ជាង ២ម៉ឺនដុល្លារថែមទៀត បើសិនជាលោកធ្វើដំណើរទៅកាន់ទឹកដីអូស្រ្តាលី៕