សហភាពអ៊ឺរ៉ុបផ្ដល់ជំនួយ១១២លានអ៊ឺរ៉ូដល់កម្ពុជាឱ្យធ្វើការលើកកម្ពស់វិស័យជលផល ដោយមានការចូលរួមពីគ្រប់ភាគីពាក់ព័ន្ធ ដើម្បីផលប្រយោជន៍ប្រជាពលរដ្ឋខ្មែរនៅទូទាំងប្រទេស។
ពិធីផ្ដល់ជំនួយនេះជាផ្លូវការនេះ ធ្វើឡើងក្រោមអធិបតីភាព របស់ឯកអគ្គរដ្ឋទូតសហភាពអ៊ឺរ៉ុបប្រចាំនៅកម្ពុជាដែលទើបផុតអាណត្តិ លោក ចច អេដហ្គា( GeorgeEDGAR) និងរដ្ឋមន្ត្រីក្រសួងកសិកម្មលោក វ៉េង សាខុន នៅព្រឹកថ្ងៃទី២១សីហានាក្រសួងកសិកម្ម។
ក្រសួងកសិកម្មលើកឡើងក្នុងសេចក្ដីប្រកាសព័ត៌មានថាជំនួយរបស់សហភាពអ៊ឺរ៉ុបនេះធ្វើឡើងក្នុងគម្រោងអភិវឌ្ឍន៍វិស័យជលផលប្រកបដោយចេរភាព(ភាពស្ថិតស្ថេរ) និងបរិយាប័ន្ន(ការរួមបញ្ជូលគ្រប់ភាគី)នៅក្នុងប្រទេសកម្ពុជា។ ភាគីទាំងពីរដាក់ក្ដីរំពឹងថា គម្រោងនេះ នឹងអាចនាំឱ្យវិស័យជលផល កាន់តែប្រសើរឡើង។
ឯកអគ្គរដ្ឋទូតសហភាពអ៊ឺរ៉ុប លោក ចច អេដហ្គា( GeorgeEDGAR) មានប្រសាសន៍ថា ថវិកាជំនួយនេះ ជាផ្នែកមួយនៃការជំរុញទំនាក់ទំនងរវាងសហភាពអ៊ឺរ៉ុបនិងកម្ពុជា។ លោកបន្តថា សហភាពអ៊ឺរ៉ុបរំពឹងថាគម្រោងនេះនឹងអាចរួមចំណែកជួយឱ្យ ការប្រើប្រាស់ធនធានជលផលនៅកម្ពុជានឹងមាននិរន្តភាពដែលផ្ដល់ផលប្រយោជន៍សម្រាប់ប្រជាពលរដ្ឋខ្មែរនៅទូទាំងប្រទេស។
លោក ចច អេដហ្គា៖ «ជំនួយនេះយើងបានសម្រេចថានឹងជួយតាំងពីឆ្នាំ២០១៤មកម្ល៉េះ ហើយគម្រោងនេះគ្របដណ្ដប់ស្ទើរ គ្រប់សកម្មភាពជំរុញវិស័យជលផលនៅកម្ពុជា។ អ៊ឺរ៉ុបយល់ថា ធនធានជលផលផ្ដល់ប្រូតេអ៊ីនច្រើនសម្រាប់សុខភាពពលរដ្ឋមានសារៈសំខាន់ណាស់សម្រាប់ពលរដ្ឋខ្មែរទើបយើងជួយជំនួយនេះ។»
ទន្ទឹមនឹងនេះ រដ្ឋមន្ត្រីក្រសួងកសិកម្ម លោក វេង សាខុន មានប្រសាសន៍ថា គម្រោងថ្មីនឹងអាចជួយឱ្យវិស័យជលផល កាន់តែប្រសើរឡើង។ លោកបន្តថា តាមគម្រោងនេះកម្ពុជានឹងពង្រឹងការអនុវត្តច្បាប់គ្រប់គ្រងធនធានជលផលតាមរយៈការបង្ក្រាបបទល្មើសនេសាទខុសច្បាប់ឱ្យមានប្រសិទ្ធភាព ពង្រឹងសមត្ថភាពភាគីពាក់ព័ន្ធរួម សង្គមស៊ីវិល សហគមនេសាទ ជាដើម។
លោក វេង សាខុន៖ «កម្ពុជារបស់យើងពេលត្រូវត្រីតែ២ឬបីខែទេក្នុងមួយឆ្នាំដូច្នេះយើងត្រូវវេចខ្ចប់បែបណា យើងត្រូវការការចូលរួមទាំងអស់រាប់តាំងពីសហគមន៍នេសាទរហូតដល់ផ្នែកឯកជន។ បញ្ហាសំខាន់មួយទៀតគឺជួយបណ្ដុះបណ្ដាលសង្គមស៊ីវិលដែលធ្វើការងារខាងហ្នឹង ជាការតាមដានត្រួតពិនិត្យឬផ្ដល់ចំណេះដឹងអីផ្សេងៗទៀត។»
សេចក្ដីប្រកាសព័ត៌មានរបស់ក្រសួងកសិកម្មលើកឡើងថា ជំនួយថវិកា១១២លានអ៊ឺរ៉ូនេះ ត្រូវបែងចែកចំណាយលើផ្នែកធំៗ២គឺការគ្រប់គ្រងធនធានជលផលទទួលបាន៨៧លានអ៊ឺរ៉ូ ចំណែកឯវារីវប្បកម្ម២៥លានអ៊ឺរ៉ូ។ សេចក្ដីប្រកាសព័ត៌មានបន្ថែមថា ការគ្រប់គ្រងជលផល ផ្តោតជាពិសេសទៅលើការគ្រប់គ្រងជលផលប្រកបដោយភាពស្ថិតស្ថេរយូរអង្វែងនៅតំបន់បឹងទន្លេសាបនិងធនធានជលផលសមុទ្រ។
អ្នកអនុវត្តគម្រោងនេះគឺរដ្ឋបាលជលផល និងអង្គការអន្តរជាតិនានាពាក់ព័ន្ធ ព្រមទាំងសង្គមស៊ីវិលក្នុងស្រុកមួយចំនួនទៀតដែលត្រូវបានជ្រើសរើសតាមរយៈការដាក់សំណើ។ ចំពោះផ្នែកវារីវប្បកម្មវិញ គឺមានបំណងជំរុញពលរដ្ឋចិញ្ចឹមមច្ឆជាតិ ឱ្យមានទិន្នផលខ្ពស់ដើម្បីបំពេញតម្រូវការក្នុងប្រទេសកម្ពុជា។
កាលពីអាណត្តិមុន២០១៣ដល់២០១៨ សហភាពអ៊ឺរ៉ុបបានផ្តល់ជំនួយឥតសំណងចំនួន២០លានអ៊ឺរ៉ូ ដែលគម្រោងនោះគាំទ្រដល់ការគ្រប់គ្រងធនធានធម្មជាតិនិងចិញ្ចឹមសត្វ។ ក្រសួងកសិកម្មបញ្ជាក់ថា គម្រោងនោះបានផ្ដល់ប្រយោជន៍ដល់ប្រជាពលរដ្ឋដល់ពេទ្យសត្វភូមិ៦ ៦៤៧នាក់ និងជួយបណ្ដុះបណ្ដាលផ្លូវច្បាប់ជូនដល់ សហគមន៍នេសាទ១៦២នៅទួទាំងប្រទេស។
របាយការណ៍របស់ក្រសួងកសិកម្មបង្ហាញថា ចាប់តាំងពីឆ្នាំ១៩៩៥ដល់ឆ្នាំ២០២៣ សហភាពអ៊ឺរ៉ុប បានផ្ដល់ជំនួយឥតសំណង ជួយដល់វិស័យកសិកម្មរុក្ខាប្រម៉ាញ់និងនេសាទនៅកម្ពុជាចំនួន ២៥៨លានអ៊ឺរ៉ូ។