ក្រសួងធនធានទឹក និងឧតុនិយម បានណែនាំទៅដល់ប្រជាពលរដ្ឋនៅតំបន់មាត់សមុទ្រ មានការប្រុងប្រយ័ត្នខ្ពស់ពីសុវត្ថិភាពចំពោះបាតុភូតខ្យល់កន្រ្តាក់ ផ្គររន្ទះ និងរលកសមុទ្រ ចាប់ពីថ្ងៃនេះរហូតដល់សប្ដាហ៍ក្រោយ។
ក្នុងសេចក្ដីជូនដំណឹងនៅថ្ងៃនេះ ក្រសួងបានឲ្យដឹងថា ប្រទេសកម្ពុជានឹងទទួលរងភ្លៀងធ្លាក់រាយប៉ាយពីកម្រិតតិចទៅបង្គួរស្ទើទូទាំងប្រទេស ដែលបណ្ដាលមកពីប្រព័ន្ធសម្ពាធទាបអូសបន្លាយកាត់ប្រទេសថៃ ឡាវ និងវៀតណាម និងព្យុះបៃលូនៅភាគខាងកើតប្រទេសហ្វីលីពីន ដែលនឹងមានឥទ្ធិពលខ្លាំងមកលើកម្ពុជា។
ក្រសួងបានបន្ថែមថា ចាប់ពីចុងសប្ដាហ៍នេះរហូតដល់សប្ដាហ៍ក្រោយ ភ្លៀងនឹងធ្លាក់បង្គួរទៅច្រើននៅតាមបណ្តាលខេត្តចាប់ពីតំបន់ទំនាបភាគកណ្តាលឡើងទៅលើ និងរាជធានីខេត្តប៉ែកខាងក្រោម រួមទាំង នៅតំបន់មាត់សមុទ្រ ជាពិសេសនៅខេត្តកោះកុង និងខេត្តព្រះសីហនុជាដើម នឹងធ្វើឲ្យផ្ទៃសមុទ្រមានខ្យល់បោកបក់ខ្លាំង បង្កឲ្យមានរលកសមុទ្រខ្ពស់ផងដែរ។
ករណីនេះ ក្រសួងធនធានទឹក អំពាវនាវទៅសាធារណជនមានការប្រុងប្រយ័ត្នខ្ពស់ចំពោះបាតុភូត ខ្យល់ ផ្គរ រន្ទះ និងរលកសមុទ្រ ដែលអាចកើតមានឡើងជាយថាហេតុ៕
